On tetlauelikniuan okinekkej ma kiteltikan on tekitl
4
Ijkuak itlauelikniuan Judá niman Benjamin okimatkej ika on yejuan okinuikakaj Babilonia yonokuepkej niman oksejpa ye kichijchijtokej iueyitiopan toTEKO, iminDios on israelitas, 2 oyajkej okitatoj Zorobabel, Josué niman on tlayekankej intech on familias israelitas, niman okinmilijkej: —Xtechkauilikan ma temechpaleuikan ipan on tekitl, pampa tejuamej no tikmauistiliaj nemoDios ken nemejuamej, niman tikmakaj uentli desde on tonaltin ijkuak Esar-hadón, on rey de Asiria otechajuikak nikan.
3 Pero Zorobabel, Josué niman on oksekimej tlayekankej intech on familias israelitas ijkin okiminankilijkej:
—Ka, xuelis nemouan tikchijchiuaskej iueyitiopan toDios. San tejuamej toseltimej tikchijchiuaskej iueyitiopan toTEKO, iminDios on israelitas, pampa ijki otechnauatij Ciro on rey de persia.
4 Kemaj on chanejkej ipan on región opeu kinyolmajxalouaj niman kinmomojtiaj on israelitas yejuan chanejkej ne Judá niman yejuan tekitiyaj, para makasa ma tekitikan. 5 Niman no okinmichtaka tlaxtlauilijkej sekimej itlapaleuijkauan on gobierno para xotekauilijkej ma kichiuakan on tekitl. Yejua in onochiu ipan nochi on tonaltin ijkuak Ciro rey katka ne Persia, hasta ijkuak Darío okalak rey ne Persia. 6 Ijkuak opeu tlamandaroua on rey Asuero, okinteixpanuijkej ikan amatlajkuiloltin on israelitas yejuan chanejkej ne Judá niman Jerusalén. 7 Kemaj ijkuak Artajerjes okalak rey ne Persia, in tlakamej: Bislan, Mitrídates, Tabeel niman on oksekimej icompañeros, no okitlajkuiluijkej on rey Artajerjes. On amatlajkuilojli okijkuilojkej ikan tlajtojli Arameo, niman okipatlakej. 8 No ijki, Rehum, yejuan ueyi tlayekanki katka, niman Simsai yejuan tlajkuilojketl katka, okitlajkuiluijkej on rey Artajerjes para okinteixpanuijkej on chanejkej Jerusalén. 9 (Ipan on tiempo okijkuilojkej on ueyi tlayekanki Rehum, on tlajkuilojketl Simsai, niman inuan incompañeros: on teyolkuitijkej, on generales niman on gobernadores de Persia, de Erec, de Babilonia, niman de Susa yejuan no itoka Elam, 10 niman on oksekimej naciones yejuan on ueyixtikaj Asnapar okintlan niman okinnoyaxkatij, niman in chanejkej okinchantij ipan on uejueyikalpanmej de Samaria niman itech nochi iueyitlalpan on río Éufrates kampaka ikalakiyan tonaltsintli.) 11 On amatlajkuilojli ijkin kijtoua:
“Para on rey Artajerjes: Tejuamej motekitkauan yejuan chantij nanika itech in río Éufrates kampaka ikalakiyan tonaltsintli mitstlajpalouaj.
12 "Timitsmachistiaj tejua ueyixtikaj rey, ika on judíos yejuan otikinuajtitlan, yoyejkokej nikan Jerusalén niman oksejpa ye kichijchijtokej in ueyikalpan kampa ochantikej on tlakamej yejuan xompayejyeuamej niman xipan teitaj. Yopejkej kichijchiuaj on cimiento para kitepanyeualtsakuaskej on ueyikalpan. 13 Niman no timitsmachistiaj ueyixtikaj rey, ika tla oksejpa kichijchiuaj in ueyikalpan niman kitepanyeualtsakuaj, on chanejkej xok kinekiskej kitlaxtlauaskej impuestos nion nochi tlajtlamach yejuan kitocaroua kitlaxtlauaskej, niman tejua tikpolos miyek tomin. 14 Niman pampa tejuamej timotekitkauan tejua rey, xuelis tiktekauiliskej ma mitspijpinajtikan. Yejua ika, timitstitlaniliaj in amatlajkuilojli para xmatstia tlinon nochiua. 15 Timitstlajtlaniliaj xtlanauati ma kitejtemokan ipan on amamoxtin kampa tlajkuilolnestokej moachtojtajuan para tikmatis ika ipan on ueyikalpan, on chanejkej sanoyej xompayejyeuamej, niman no tikmatis ika yeuejkaui okimixnamikej on reyes niman gobiernos. No ijki, tikmatis ika on ueyikalpan okixoxotonijkej pampa on yejuan yeuejkaui ompa chantiyaj sanoyej teixnamikiyaj. 16 Yejua ika tej, timitsmachistiaj, tejua ueyixtikaj rey, ika tla in ueyikalpan oksejpa kichijchiuaj, niman tlamij oksejpa kitepanyeualtsakuaj, tikpolos on región kampa titlamandaroua itech on río Éufrates kampaka ikalakiyan tonaltsintli."
17 Kemaj on rey Artajerjes no okintlajkuiluij, para ikin okiminankilij:
“Para Rehum, on ueyi tlayekanki, niman Simsai, on tlajkuilojketl, niman oksekimej icompañeros yejuan chantij Samaria niman ipan on oksekimej regiones yejuan nokauaj itech on río Éufrates kampaka ikalakiyan tonaltsintli:
"Nemechtlajpaloua. 18 On amatlajkuilojli yejuan onennechatitlanilijkej, okitlajtolkuepkej ikan totlajtol niman yokinomachtijkej* nixpan. 19 Nejua onitlanauatij para ma kitejtemokan ipan on amamoxtli* kampa tlajkuilolnestokej noachtojtajuan yejuan reyes katkaj. Niman okinextijkej ika melauak on yejuan achtoj ochantikej ipan on ueyikalpan Jerusalén miyekpa okinmixnamikej on reyes niman ika miyekpa onosentlalijkej on chanejkej ne Jerusalén para xipan okitakej on reyes. 20 Melauak, ipan on ueyikalpan Jerusalén onenkej keski reyes yejuan ikan poder otlamandarojkej ipan on regiones yejuan nokauaj itech on río Éufrates kampaka ikalakiyan tonaltsintli. Yejuamej in reyes kitechiualtiayaj ma kintlaxtlauilikan impuestos de nochi. 21 Yejua ika, xkiminauatikan on tlakamej ma kiteltikan on tekitl, hasta ijkuak nejua oksejpa nikinkauilis ijkuakon uelis tekitiskej. 22 Nemechnauatiaj kuajli xkitakan ken nenkichiuaskej para maka ueyikatias on tlen xkuajli nikan kampa nitlamandaroua."
23 Ijkuak on amatlajkuilojli yejuan okititlan on rey Artajerjes okinomachtijkej* ixpan Rehum, niman on tlajkuilojketl Simsai niman imixpan incompañeros, nimantsin nochimej oyajkej Jerusalén. Niman okinchiualtijkej on judíos ma kiteltikan on tekitl. 24 Okiteltijkej on tekitl ne Jerusalén, niman ijkon xok okichijchijkej iueyitiopan toTEKO, hasta ijkuak on rey Dario ome xipan ye tlamandarouaya ne Persia.