On israelitas oksejpa peua kimauistiliaj toTEKO
3
Ipan chikome metstli ijkuak on israelitas yonochantijkaj ipan inueyikalpanuan, nochi on israelitas onosentlalijkej Jerusalén. 2 Kemaj Josué, ikoneu Josadac, iuan on icompañeros tiopixkej, niman Zorobabel ikoneu Salatiel, no iuan ifamilia, opejkej kichijchiuaj itlaixpan* iminDios on israelitas para ipan kuentlaliskej on uentli yejuan kitlatiskej. Okichijkej ken kiminnauatia iley Moisés, on itekitkau Dios. 3 Maski kinmakajsiyaj on chanejkej yejuan chantiyaj ipan on región yejuan nisiu onokej, oksejpa okichijchijkej on tlaixpan* kampa achtoj onkatka. Niman mojmostla kualkan niman tiotlak kimakayaj toTEKO uentin yejuan tlatla. 4 No ijki, okichijkej on ueyi iluitl de kalmatsitsimej, ken kinminnauatiaya on ley. Mojmostla kitemakayaj uentin yejuan tlatla ikon ken nonekiya cada tonajli 5 No ijki, opeu mojmostla okimakakej toTeko uentin yejuan tlatla, niman no kimakayaj uentin ipampa on yenkuik metstli. No okimakakej on uentin de on uejueyi iluimej de toTEKO, niman on oksekimej uentin yejuan san kinekiyaj kimakayaj ikan iminpakilis. 6 Maski xe kipeualtiayaj oksejpa kichijchiuaj on ueyitiopan, desde on achtoj tonajli ipan on chikome metstli, on israelitas opeu kimakaj uentin toTEKO.On israelitas opeu oksejpa kichijchiuaj on ueyitiopan
7 Kemaj okinmakakej tomin on tepanchijkej niman on kojxinken para ma tekitikan. Niman okintitlanilijkej tlakuajli, tlaonijli niman aceite para okintlaxtlauilikej on Sirios niman on Tirios para ma kinmiktikan tablas de cedro ikan barcos, desde Líbano hasta on ueyikalpan Jope. Nochi okichijkej san ijkon ken Ciro irey Persia okinkauijlij. 8 Zorobabel, ikoneu Salatiel, niman Josué, ikoneu Josadac, iminuan nochimej on incompañeros yejuan tiopixkej niman yejuan levitas, niman nochimej on yejuan okinkixtijkaj iminchan niman onokuepkej Jerusalén, opejkej oksejpa kichijchiua iueyitiopan toTEKO. Opejkej kichijchiuaj on ueyitiopan ipan on ome metstli ijkuak ye kipiyaya ome xipan ika oajsikej ne Jerusalén. On tekitl okiyekankej on levitas yejuan kipiyayaj sempoajli xipan para tlakpak. 9 On levitas Josué iuan nochimej ikoneuan niman ikniuan, san sekan onosentlalijkej iuan Cadmiel iuan ikoneuan. (Yejuamej iuejkakoneuan katka Judá.) No ijki, imiuan onosentlalijkej ikoneuan, iuejkakoneuan niman ikniuan Henadad. Yejuamej levitas katkaj niman kinyekanayaj on tlakamej yejuan tekitiyaj ipan iueyitiopan Dios.
10 Ijkuak on tekitkej okintlalijkej on temej para peuas kichijchiuaskej icimiento* on iueyitiopan toTEKO, on tiopixkej onotelketskej, tlakemejkej katkaj ika imintiopixkatlaken, niman kipiyayaj imintlapitsal impan inmauan. Niman on levitas, iuejkakoneuan Asaf, kiktiyaj platillos yejuan ika kuikatlaliayaj toTEKO, ijkon ken David, on rey de Israel yotlanauatijka. 11 Sekimej nokuikatiayaj niman kiueyiteneuayaj toTEKO, niman oksekimej ijkin tenankiliayaj: “Xmakakan tlaxtlauijli toTEKO pampa yejua sanoyej kuajli iyojlo, niman itetlajsojtlalis* para on israelitas xkaman tlamis.” Niman nochimej tsajtsiyaj ikan paktli niman kiueyiteneuayaj toTEKO pampa yokipeualtijkaj icimiento* on iueyitiopan toTEKO. 12 Pero miyekej on tiopixkej, on levitas, niman on tlayekankej intech on familias israelitas yejuan ye ueuentsitsimej katkaj niman okitakaj on achtoj ueyitiopan yejuan okichijchijka Salomón, opeu sanoyej chikauak chokaj pampa okitakej ika oksejpa yokipeualtijkej kichijchiua on yenkuik ueyitiopan. Niman on oksekimej uej sanoyej pakatsajtsiyaj. 13 Niman xok kuajli kakistiya tla tsajtsiyaj ikan pakilislti noso tla chokayaj. Pampa sanoyej chikauak tsajtsiyaj, sanoyej uejka onkakistiya.