On tiotlajtojketl Jehú okajuak Josafat
19
Josafat, on rey de Judá, kuajli onokuep ipan ipalacio ne Jerusalén. 2 Kemaj on tiotlajtojketl Jehú, ikoneu Hanani, okinamikito niman ijkin okijlij: “¿Tline tikpaleuiya on yejuan xompayejyejua niman iminuan timouika on yejuan kitlauelitaj toTEKO? Pampa ijkon otikchiu, toTEKO kualani mouan. 3 Pero, no onkaj tlen kuajli otikchiu, pampa otikinxoxotonij ixneskayouan on diosa Asera yejuan onkatkaj ipan in país, niman no, pampa yotiktlalij ipan moyojlo ika nochipa tiktokas Dios.”Josafat okinteneu jueces
4 Josafat chantiya ne Jerusalén, pero kamanian yaya komintaya on israelitas ipan on uejueyikalpanmej kampa yejua tlamandarouaya.Yaya desde on ueyikalpan Beerseba hasta ipan itepeyoj Efraín, para kominijliaya on israelitas ma nokuepakan itech toTEKO, iminDios iminachtojtajuan. 5 Niman no okintlalij teyolkuitijkej nochiuiyan ipan nochimej on uejueyikalpanmej yejuan kuajli tepanyeualtsakutikatkaj ne Judá. 6 Niman ijkin okinmijlij on jueces: “Sanoyej xpiyakan cuidado de on tlen nenkichiuaskej, pampa ijkuak nentetlajtlakolmakaskej xnenkichiuaskej ika intoka on tlakamej, yej nenkichiuaskej san ika itokatsin toTEKO, pampa yejua nemis nemouan ijkuak nenkijtoskej tlen castigo nenkitemakaskej. 7 Ijkon tej, xtlakaitakan toTEKO niman xpiyakan cuidado de on tlen nenkichiuaskej, pampa toTEKO Dios nion achijtsin xkuelita kitas kichiuaj tlen xmelajki, nion on techikoitalistli, nion on ichtakatlaxtlauijli.”
8 No ijki, Josafat okintlalij ne Jerusalén keskimej levitas, tiopixkej niman tlayekankej intech on familias israelitas, para ma tekitikan ken teyolkuitijkej ijkuak on tlakamej xkitlakamatij ileyes Dios niman ijkuak nokualaniaj on chanejkej ne Jerusalén. 9 Niman ijkin okinminnauatij ma kichiuakan: “Nemejuamej nochipa xtlakaitakan toTEKO, maka kaman nenkitlalkauiskej, niman nochipa xtlakamatikan. 10 Ijkuak on nemochanejkauan yejuan chantij ipan on sesentlamantikej uejueyikalpanmej uajlaskej nemotech pampa itlaj kimpajsoloua, noso pampa yakaj okimiktijkej, noso pampa kinekij más kimatiskej de on leyes, niman okseki tlanauatiltin, nemejuamej xkinchikajkanauatikan para maka ma tlajtlakokan ixpan toTEKO para maka kualanis nemotech nion imintech nemokniuan. Tla nenkichiuaj tlinon nemechnauatia, nemejuamej xok nenkipiyaskej tlajtlakojli. 11 Amarías, on yejuan más ueyixtikaj tiopixki, yejua mechyekanas ipan nochi tlajtlamach itech ika toTEKO. Niman Zebadías, ikoneu Ismael, niman tlayekanki ipan itribu* Judá, yejua mechyekanas ipan nochi tlajtlamach notech ika nejua yejuan nirey. Niman on levitas mechpaleuiskej. ¡Xmoyolchikauakan tej, niman peua xtekitikan! ¡ToTEKO ma kipaleui on yejuan kichiuas tlen melajki!”