11
Ijkuak Roboam oajsik Jerusalén, okinsentlalij 180 mil soldados yejuan okintlapejpenij itech itribu Judá niman itech itribu Benjamín, para kinuijsokiskej on tribus de Israel yejuan nemiyaj kampaka norte de on país, niman para oksejpa kinmandaros nochimej on israelitas. 2 Pero toTEKO okinots Semaías, itekitkau Dios, niman okijlij: 3 “Xkijli Roboam, rey de Judá, yejuan ikoneu Salomón, niman nochimej on israelitas de itribu Judá niman Benjamín 4 ika nikinnauatia para maka kinuijsokiskej iminikniuan. Xkinmijli para nochimej ma nokuepakan iminchan, pampa on tlen onochiu nejua ijki oniknek.”Ijkuak yejuamej okakakkej on tlen toTEKO okinmijlij, onokuepkej iminchan, niman xok oyajkej para okuijsokitoj Jeroboam.
Roboam okintepanyeualtsaku on uejueyikalpanmej ne Judá
5 Roboam onochantij Jerusalén, niman okinyeualtsaku ikan tepantli sekimej uejueyikalpanmej ne Judá para okinmanauij. 6 Yejua okinyeualtsaku ikan tepantli on uejueyikalpan: Belén, Etam, Tecoa, 7 Bet-sur, Soco, Adulam, 8 Gat, Maresa, Zif, 9 Adoraim, Laquis, Azeca, 10 Zora, Ajalón niman Hebrón. In uejueyikalpanmej onkatkaj ipan iueyitlalpan Judá niman Benjamín. 11 No ijki, okuektlalij on tepantli yejuan ika yeualtsakutikatkaj on uejueyikalpanmej. Niman ipan on uejueyikalpanmej okintlalij soldadostlayekankej para ma tlacuidarokan, niman no, ompa okeu tlajtlamach tlakuajli, aceite niman vino. 12 No ijki, Roboam okintemakak miyek escudos niman lanzas ipan nochimej on uejueyikalpanmej, niman sanoyej kuajli okinyeualtsaku ken xkaman yakaj okse kichiuaya. Ijkon tej, Roboam tlamandarouaya ipan itribu Judá niman Benjamín.
13 Nochimej on tiopixkej niman on levitas de nochi Israel oyajkej ne Judá para onotemakakej itech Roboam. 14 On levitas okajtejkej imintlaluan kampa tlajpiyayaj, niman no okajtejkej okseki imintlaluan tlen kipiyayaj para oyajkej Jerusalén niman oksekan tlajtlaluis ipan on ueyitlalpan Judá. Ijkin okichijkej pampa Jeroboam niman ikoneuan xok okinkauilijkej ma kitekipanokan toTEKO ken tiopixkej. 15 Jeroboam sano yejua okintlalij itiopixkauan ipan on pipitikej tiopanmej ne inkuapan on tepetsitsimej kampa kinmauistiliaj on xkuajkualtin espíritus niman on becerros, ídolos yejuan okinchijchiu. 16 Niman on israelitas yejuan ikan nochi inyojlo kinekiyaj kimauistiliskej toTEKO, on Dios de Israel, no oyajkej Jerusalén kenon tiopixkej niman on levitas okichijkej. Ompa oyajkej para okimakakej uentli toTEKO, iminDios iminachtojtajuan. 17 Ijki tej, on reino de Judá más okipix poder niman okipaleuijkej Roboam, ikoneu Salomón yeyi xipan, pampa san yeyi xipan onouikak ken onouikak David niman Salomón.
18 Roboam ononamiktij iuan Mahalat, ichpoch Jerimot, ikoneu David iuan Abihail, ichpoch Eliab, niman ixuiu Isaí. 19 Ikoneuan Roboam iuan Mahalat katkaj: Jehús, Semarías, niman Zaham. 20 Sakin, Roboam ononamiktij iuan Maaca, ichpoch Absalón. Niman iminkoneuan katkaj: Abiam, Atai, Ziza niman Selomit. 21 Roboam okipix majtlaktli uan chikueyi isiuauan niman 60 itlakpasiuauan, pero Maaca yejua más kinekiya xken on oksekimej isiuauan. Okimpix 28 ikoneuan yejuan tlakamej niman 60 ichpochuan. 22 Roboam okitlalij Abiam, ikoneu Maaca, tlayekanki intech nochimej itlakaikniuan, pampa kinekiya kitlalis rey. 23 Roboam kuajli okichiu ijkuak okinxexeloj on oksekimej itelpochuan ipan nochi iueyitlalpan Judá, niman Benjamín, niman ipan nochimej on uejueyikalpanmej yejuan tepanyeualtsakutokej. Okiminmakak miyek tlajtlamach tlen kikuaskej, niman okiminmakak miyek insiuauan.