Salomón okipatlak David
28
David okinsentlalij ne Jerusalén nochimej on tlayekankej ipan Israel. Okinsentlalij: 1) on tlayekankej de tribus, 2) intlayekankauan on yejuan xexelijtikatkaj ken kitocarouaya on tekitl itech on rey, 3) on tlayekankej intech se mil soldados niman on tlayekankej intech 100 soldados, 4) on yejuan cuidarouayaj itlaluan niman iyolkauan on rey 5) niman on yejuan kincuidarouayaj ikoneuan, 6) inuan on tlakamej yejuan más uejueyixtokej, 7) niman nochimej on soldados yejuan xmojkej.2 Kemaj David onotelkets niman okinmijlij, nochanejkaxijuan: “Xnechkakikan, nokniuan niman nochannekauan*. Nejua niknekiya nikchijchiuilis toTEKO kampa nochipa onyaskia iyekcaja niman kampa toDios kitlaliskia itrono. Niman nochi ye nikpiyaya para nikchijchiuas, 3 pero Dios onechijlij: 'Xtejua tinechchijchiuilis sen yektiopan para notlakaitalis, pampa tejua otikchiu miyek nouijsokilistli niman otiktoyau miyek yestli.' 4 Pero toTEKO, Dios de Israel, onechtlapejpenij itech nochi nofamilia para onechkalaktij rey de israel niman nouekakoneuan yeskej reyes para nochipa. Ijkon tej, yejua okitlapejpenij itribu* Judá ken tlayekanki ipan on oksekimej tribus. Ipan itribu* Judá okitlapejpenij nofamilia, niman de intech nokniuan onechtlapejpenij nejua para yes nirey ipan nochi Israel. 5 Yejua onechinmakak miyekej nokoneuan, niman de intech nochimej yejuamej, yokitlapejpenij nokoneu Salomón para tlamandaros ipan Israel on yejuan ireino toTEKO. 6 ToTEKO no onechijlij: 'Mokoneu Salomón yejua kichijchiuas noyektiopan niman on ome ikiauak. Yejua ika, yoniktlapejpenij ken nokoneu, niman nejua nitajtli yes para yejua. 7 Niman nikmanauis ireino para nochipa, tla yejua nochipa kintlakamati notlanauatiluan ken hasta aman kichiua.'
8 “Aman tej, ixpan nochi Israel, yejuan itlasentlalil toTEKO, niman de toDios yejuan techkaki, kuajli xkejeuakan itlanauatiluan toTEKO, yejuan nemoDios, para ijki in kualtsin país sanken* nemoyaxka*yes niman kemaj uelis nenkinkauilijteuaskej nemouejkakoneuan ken herencia. 9 Niman tejua Salomón nokoneu, xseli iDios motataj, niman xtekipano ika nochi moyojlo niman kuajli motlamachilis, pampa toTEKO kixtlaloua nochi tlamachilistli niman kimati san tlinon se kichiua niman tlinon kinemilia. Ijkon tej, tla tejua tiktejtemoua, mitskauilis tiknextis, pero tla tiktlalkauiya, mitstlalkauis para nochipa. 10 Xmati ika toTEKO yomitstlapejpenij para xchijchiua sen kajli yejuan yes iyektiopan. Yejua ika tej, ¡Xmoyolchikaua niman xpeualti on tekitl!”
11 Kemaj David okimakak Salomón ikoneu, on amatl kampa tlajkuilolnestikaj kenijki kichijchiuaskej ikalixpan on yektiopan, on kaltin, de on cuartos kampa tlayejyeuaj, de on cuartos kampa tlakpak, de on cuartos yejuan tlaijtik niman on kampa más tlayekkan. 12 Niman no okimakak kampa tlajkuilolnestikaj nochi on tlen kinemiliaya para ikiauak on yektiopan niman on cuartos yejuan nonekiya onyaskej iyejyeualkan, on cuartos kampa keuaskej on tlajtlamach* patioj, niman kampa kejeuaskej on tetlayokoliltin yejuan on tlakamej kimakayaj Dios. 13 Niman no okimakak ken ijki noxexeloskej on tiopixkej niman on levitas ipan on tekitl para tekitiskej ipan iyektiopan toTEKO, niman ika on tlajtlamach* yejuan kintekitiltiskej para mauistilistli niman ijkuak kinuentlaliskej.
14 No okimakak nochi kech oro niman plata nonekiya para nochi on tlajtlamach* de oro niman plata yejuan notekitiltiskej ipan on yektiopan. 15 Para on lamparas niman intlauiltsitsiuan, on yejuan de oro niman de plata, okimakak ijkon ken nonekiya yetik yes cada se. 16 Niman no okimakak oro nochi kech nonekiya para kichijchiuas on mesa yejuan ipan kitlaliskej on pan yejuan tlatiochijtli, niman nochi kech plata noneki para kinchijchiuas on okseki mesas. 17 Niman no okimakak oro yejuan más kuajli, nochi kech nonekiya para kichijchiuas on tepochijkoltsitsimej, on tazas uejueyimej, niman on jarras. No okimakak oro niman plata nochi kech nonekiya yejuan ika okichijchikej on copas niman okseki tepostli. 18 No okimakak miyek oro yejuan más kuajli para on tlaixpan* kampa kitlatiskej kopajli. No ijki, okimakak oro para ma kichijchiuakan on carreta para on querubines* yejuan kitlapachojtikatkaj on yekcaja ikan inmastlakapaluan yejuan kimpatlajtokej.
19 Nochi yejua in tlajkuilolnestikatka, ijkon ken toTEKO okimachistij David, ijkuak kijliaya nochi on tekitl yejuan nonekiya kichiuaskej ken tlajkuilolnestikaj.
20 Kemaj David okijlij Salomón: “¡Xmoyolchikaua niman maka xmomojti, niman xpeualti on tekitl! ¡Maka xmomojti niman xmoyoleua, pampa noTEKO Dios mouan nemis! Yejua xmitstlalkauis nion xmitskauas, yej mitspaleuis hasta tlamis nochi on tekitl ipan on yektiopan. 21 Nikan tlajkuilolnestikaj kenijki nopatlatiaskej ipan intekiu on tiopixkej niman levitas. Para nochi on tekitl, no tikimpiyas miyekej yejuan san kinekiskej mitspaleuiskej, yejuan uelij nochi tekitl, niman on tlayekankej niman nochimej on israelitas nemiskej para mitspaleuiskej."