Isoldados David onoxexelojkej
27
Nikan nestokej intoka on israelitas yejuan katkaj tlayekankej de familias, soldadojtlayekankej intech se mil, niman intech 100 soldados, niman uejueyitekiuajkej intech on grupos de isoldados on rey. Cada grupo kipiyaya 24 mil soldados niman nopatlatiayaj ipan intekiu cada metstli, ipan nochi on xipan para on rey.2 Jasobeam, ikoneu Zabdiel, soldadojtlayekanki katka itech on achtoj grupo yejuan kipiyaya 24 mil soldados, niman yejuamej kichiuayaj intekiu ipan on achto metstli. 3 Yejua iuejkakoneu* katka Fares, niman yejua tlayekanki katka de nochimej on soldadojtlayekankej yejuan tekitiyaj ipan on achtoj metstli.
4 Dodai, iuejkakoneu* Ahoa, soldadojtlayekanki katka itech on ika ome grupo yejuan kipiyaya 24 mil soldados, niman yejuamej kichiuayaj intekiu ipan on ika ome metstli. On ika ome tlayekanki de on grupo katka Miclot.
5 Benaías, ikoneu on ueyitlayekanki tiopixki itoka Joiada, soldadojtlayekanki katka itech on ika yeyi grupo yejuan kipiyaya 24 mil soldados niman yejuamej kichiuayaj intekiu ipan on ika yeyi metstli. 6 Benaías katka semej de on tlauijsokej niman tlayekanki de on ika tlakajtli grupo de 30 de isoldados David. On ika ome tlayekanki ipan in grupo katka Amisabad yejuan ikoneu Benaías.
7Asael yejuan ikniu Joab, soldadojtlayekanki katka itech on ika naui grupo yejuan kipiyaya 24 mil soldados, niman yejuamej kichiuayaj intekiu ipan on ika naui metstli. Zebadías yejuan ikoneu Asael onopatlak iuan itataj.
8 Samhut, on izraíta, soldadojtlayekanki katka itech on ika makuijli grupo yejuan kipiyaya 24 mil soldados, niman yejuamej kichiuayaj intekiu ipan on ika makuijli metstli.
9 Ira, ikoneu Iques yejuan uajleua ipan on kalpan Tecoa, soldadojtlayekanki katka itech on ika chikuasen grupo yejuan kipiyaya 24 mil soldados, niman yejuamej kichiuayaj intekiu ipan on ika chiuasen metstli.
10 Heles, iuejkakoneu* Efraín yejuan ualeua ipan on ueyikalpan Palti, soldadojtlayekanki katka itech on ika chikome grupo yejuan kipiyaya 24 mil soldados, niman yejuamej kichiuayaj intekiu ipan on ika chikome metstli.
11 Sibecai, iuejkakoneu* Zera yejuan ualeua Husá, soldadojtlayekanki katka itech on ika chikueyi grupo yejuan kipiyaya 24 mil soldados, niman yejuamej kichiuayaj intekiu ipan on ika chikueyi metstli.
12 Ebiezer, iuejkakoneu* Benjamín yejuan uajleua ipan on kalpan Anatot, soldadojtlayekanki katka itech on ika chiknaui grupo yejuan kipiyaya 24 mil soldados, niman yejuamej kichiuayaj intekiu ipan on ika chikanui metstli.
13 Maharai, iuejkakoneu* Zera yejuan ualeua ipan on ueyikalpan Netofa, soldadojtlayekanki katka itech on ika majtlaktli grupo yejuan kipiyaya 24 mil soldados, niman yejuamej kichiuayaj intekiu ipan on ika matlaktli metstli.
14 Benaía iuejkakoneu* Efraín yejuan ualeua Piratón, soldadojtlayekanki katka itech on ika majtlaktli uan se grupo yejuan kipiyaya 24 mil soldados, niman yejuamej kichiuayaj intekiu ipan on ika majtlaktli uan se metstli.
15 Heldai iuejkakoneu* Otoniel yejuan ualeua ipan on ueyikalpan Netofá, soldadojtlayekanki katka itech on ika matlaktli uan ome grupo yejuan kipiyaya 24 mil soldados, niman yejuamej kichiuayaj intekiu ipan on ika majtlaktli uan ome metstli.
Tlayekankej ipan on tribus
16-22 On tlayekankej ipan on tribus de Israel katkaj:
| 16 Tribu*: | Tlayekanketl: |
| Rubén | Eliezer, ikoneu Zicri |
| Simeón | Sefatías, ikoneu Maaca |
| 17 Leví | Hasabías, ikoneu Quemuel |
| Iuejkakoneuan Aarón | Sadoc |
| 18 Judá | Eliud, se ikniu David |
| Isacar | Omri, ikoneu Micael |
| 19 Zabulón | Ismaías, ikoneu Abdías |
| 20 Neftalí | Jerimot, ikoneu Azriel |
| Efraín | Oseas, ikoneu Azazías |
| Manasés (ikalakiyan tonajli) | Joel, ikoneu Pedaías |
| 21 Manasés (ikisayan tonajli) | Iddo, ikoneu Zacarías |
| Benjamín | Jaasiel, ikoneu Abner |
| 22 Dan | Azareel, ikoneu Jeroham |
Nochimej yejuamej in katkaj tlayekankej ipan itribus Israel.
23 David xokimpou on tlakamej yejuan xe kajxitiayaj sempoajli xipan pampa toTEKO yokimprometerouilijka on israelitas, ika kinmiyekilis ken sitlalimej yejuan onkaj ipan cielo. 24 Joab yejuan ikoneu Sarvia opeu kichiua on poualistli, pero xotlan pampa Israel okiselij icastigo Dios ipampa on poualistli. Yejua ika xnestikaj ipan in amamoxtli* kampa tlajkuilolnestikaj inemilis on rey David.
Tlayekankej yejuan otekitkej para on rey David
25 Azmavet, ikoneu Adiel, tominyejyejkij katka ipan on palacio. Jonatán, ikoneu Uzías, cuidarouaya on tlajtlamach* ipan on kaltlayejyeualtin yejuan onkaj ipan campo, uejueyikalpanmej, kalpanmej niman kampa chantij soldados.
26 Ezri, ikoneu Quelub, yejua kinyekanaya on yejuan tekitiyaj ipan campo. 27 Simei yejuan ualeua Ramat, yejua kiyekanaya on tekitl ipan uvasyoj. Zabdi yejuan ualeua Sefam, yejua kipiyaya on tekitl para keuaya on vino ipan on kaltlayejyeualoyan. 28 Baal-hanán yejuan ualeua Gedera yejua kipiyaya on tekitl para cuidarouaya on kojyoj de olivos niman de on kojyoj de sicómoros ipan on tepetsitsimej ne Judá. Joás yejua kipiyaya tekitl kampa keuayaj aceite de oliva. 29 Sitrai yejuan ualeua Sarón, yejua kipiyaya tekitl para on yolkej yejuan kintlakuajkualtiayaj ne Sarón. Safat ikoneu Adlai, yejua kipiyaya on tekitl para on yolkej ipan ixtlauayo. 30 Obil on ismaelita yejua kipiyaya on tekitl para kincuidarouaya on camellos. Jehedías, yejuan ualeua Meronot, yejua kipiyaya tekitl para kincuidarouaya on polokomej*. 31Jaziz on agareno, yejua kipiyaya on tekitl para kincuidarouaya on borregos. Nochimej in yejuamej katkaj itlayekankauan on rey.
32 Jonatán, on itio David tekitiya ken sen tlakatl yejuan kipiya tlamachilistli niman kitlajtolmakaya on rey. Jehiel ikoneu Hacmoni, kincuidarouaya ikoneuan on rey. 33 Ahitofel katka okse yejuan kitlajtolmakaya on rey. Husai on arquita, sen tlakatl yejuan itlajsojkaikniu* katka on rey. 34 Ijkuak yomik Ahitofel, Joida ikoneu Benaías niman Abiatar yejuamej kitlajtolmakayaj on rey. Joab katka soldadojtlayekanki itech isoldados on rey.