Tlajpixkej ipan itsakuijlouan on yektiopan niman oksekimej tekitkej
26
Ijkuak yokinxexelojkej on turnos ken tekitiskej on tlajpixkej ipan tsakuijlomej, ijkin onokajkej: De iclan on coreitas katkaj: Meselemías, ikoneu Coré, yejuan ikoneu Ebiasaf. 2 On ikoneuan Meselemías katkaj: Zacarías, yejuan yekatstiu; Jediael, yejuan ika ome; Zebadías, yejuan ika yeyi; Jatniel, yejuan ika naui, 3 Elam, yejuan ika makuijli; Johanán, yejuan ika chikuasen, niman Elioenai, yejuan ika chikome.
4 On ikoneuan Obed-edom katkaj: Semaías, yejuan yakatstiu; Jozabad, yejuan ika ome; Joa, yejuan ika yeyi; Sacar, yejuan ika naui; Natanael, yejuan ika makuijli; 5 Amiel, yejuan ika chikuasen; Isacar, yejuan ika chikome, niman Peultai, yejuan ika chikueyi. Ijkon tej, Dios okitiochiu Obed-edom, ikan miyek ikoneu.
6 Semaías, ikoneu Obed-edom, okipix ome ikoneu yejuan katkaj tlayekankej ipan iminfamilias pampa katkaj tlakamej yejuan xmojkej niman okipixkej miyek uelilistli. 7 On ikoneuan Semaías katkaj: Otni, Rafael, Obed, Elzabad, Eliú niman Samaquías, tlakamej yejuan xmojkej katkaj niman okipixkej miyek uelilistli. 8 Nochimej yejuamej in katkaj iuejkakoneuan Obed-edom, iminkoneuan niman iminikniuan, katkaj tlakamej yejuan xmojkej niman okipixkej miyek uelilistli yejuan kiteititiayaj ipan on tekitl. Nochimej katkaj 62 iuejkakoneuan Obed-edom.
9 Ikoneuan niman ikniuan Meselemías katkaj: 18, nochimej tlakamej yejuan xmojkej katakj niman okipixkej miyek uelilistli.
10 Ikoneuan Hosa yejuan iuejkakoneuan Merari katkaj: Simri, (maski xyejua achtoj katka, itataj okiteneu tlayekanketl); 11 Hilcías, yejuan ika ome; Tebalías, yejuan ika yeyi; niman Zacarías, yejuan ika naui. Nochimej on ikoneuan niman ikniuan Hosa katkaj matlaktli uan yeyi.
12 Intlayekankauan on grupo yejuan tsakuijlotlajpixkej, niman on levitas, yejuamej tlajpiyayaj ipan itemplo toTEKO. 13 Cada familia okichiu sen sorteo para okimakakej katlejua tsakuijlotl kitlapiyaskej. Ipan on sorteo okintenejkej nochimej, yejuan ueyi familia noso, maski xueyi familia.
14 Niman Selemías okimakakej on tsakuijlotl para kitlajpiyas yejuan onkaj kampaka ikisayan tonaltsintli, niman Zacarías, ikoneu, on tetlakanonotsketl yejuan tlamatki* okimakakej on tsakuijlotl para kitlajpiyas yejuan onkaj kampaka norte. 15 Obed-edom okimakakej on tsakuijlotl para kitlajpiyas yejuan onkaj kampaka sur, niman ikoneuan okinmakakej on tsakuijlotl para kitlajpiyaskej ne ipan on kaltlayejyeualoyan kampa keuaj on tlajtlamach* tlatiochijtin de on yektiopan. 16 Hosa niman Supim okinmakakej on tsakuijlotl para kitlajpiyaskej kampaka ikalakiyan tonaltsintli kampa onkaj on tsakuijlotl itoka Salequet, ipan on ojtli kampa tlaixko.
On tekitl ijkin kixexelouayaj: 17 Mojmostla nemiyaj chikuasemej tlajpixkej kampaka ikisayan tonaltsintli, nauimej kampaka norte, niman nauimej kampaka sur, niman omemej ipan cada se de on kaltlayejyeualoyan kampa kejua on tlajtlamach* tlatiochijtin. 18 Ixpan ikiauak on yektiopan, kampaka ikalakiyan tonaltsintli, nemiyaj nauimej tlajpixkej itech on tsakuijlotl yejuan kisa ipan ojtli niman omemej tlajpixkej kampa ikalakiyan on kiauak. 19 Ijkin xexelijtikatka imintekiu on tlajpixkej ipan tsakuijlomej, iuejkakoneuan Coré niman Merari.
20 Oksekimej levitas yejuan Ahías kinyekanaya, intekiu katka tlajpiyaskej ipan on kaltlayejyeualoyan kampa kejuaj kampa keuaj tlajtlamach* yejuan patioj, niman kampa keuaj on tetlayokoliltin yejuan on tlakamej kimakyaj Dios. 21 On ikoneuan Laadán, yejuan teuejkakoneuan itech Gersón niman de Jehiel, 22 katkaj on inkoneuan Jehiel yejuan intoka Zetam niman Joel. Yejuamej cuidarouayaj on tlajtlamach* tlen patio de iyektiopan toTEKO.
23 On inuejkakoneuan Amram, Ishar, Hebrón niman Uziel yejuan okintenekej para tlayekankej, katkaj: 24 Sebuel, teuejkakoneu itech Gersón niman Moisés, tlayekanaya ipan on tekitl kampa keuayaj on tlajtlamach* yejuan patioj.
25 (On yejua ken kinta itechkopa Eliezer, katkaj: Rehabías, ikoneu Eliezer; Jesahías, ikoneu Rehabías; Joram, ikoneu Jesahías; Zicri, ikoneu Joram; niman Selomit, ikoneu Zicri.)
26 Selomit niman ikniuan tlajpiyayaj ne kampa keuayaj on tlajtlamach* tlatiochijtin, yejuan David okimaktilij toTEKO, inuan on tlayekankej de familias, niman on soldadojtlayekankej intech se mil, niman on soldadojtlayekankej intech 100 soldados, niman oksekimej soldadojtlayekankej. 27 Onkatkaj seki tlajtlamach* yejuan okitekuilijkej ipan nouijsokilistli, yejuan okitemakakej para ma kuektlalikan on yektiopan. 28 No ompa onkatka on tlen okitiochijkatlalijkaj Samuel on tiotlajtojketl, Saúl ikoneu Cis, Abner ikoneu Ner, niman Joab ikoneu Sarvia. Nochi on tlajtlamach* tlatiochijtin, cuidarouaya Selomit niman ikniuan.
29 De on iuejkakoneuan Ishar, nemiyaj on Quenanías niman ikoneuan yejuan uejueyitekiuajkej katkaj niman jueces. Pero xtekitiyaj ipan on yektiopan, yej nochiuiyan ipan on país de Israel.
30 De on iuejkakoneuan Hebrón nemiyaj tlakamej yejuan okipixkej miyek uelilistli niman yejuan tlacuidaroayaj ne Israel kampaka ikalakiyan tonaltsintli de on río Jordán, ipan nochi on itekiu toTEKO niman para kitekichiuiliayaj on rey. Yejuamej katkaj Hasabías niman on yejuan ken kinta, nochiuayaj 1 mil 700 tlakamej yejuan xmojkej.
31 Ijkuak David kipiyaya 40 xipan ika otlamandaroj ken rey, okitejtemojkej imintoka infamilias iuejkakoneuan Hebrón yejuan ye uejkaui onenkaj. Niman okinextijkej ika intsajlan yejuamej nemiyaj tlakamej yejuan xmojkej niman okipixkej miyek uelilistli ne Jazer ipan iueyitlalpan Galaad. Intlayekankau iuejkakoneuan Hebrón katkaj Jeraías. 32 San sekan iuan yejuan ken kinta, tlakamej yejuan xmojkej niman okipixkej miyek uelilistli, katkaj 2 mil, 700 tlayekankej ipan infamilias. On rey David okinteneu para kinyekanaskej itribu* Rubén niman itribu* Gad niman itlajko tribu* Manasés, para nochi on itekiu Dios niman para kitekichiuiliayaj on rey.