Tlanechikoltin para kichijchiuaskej on yektiopan
29
On rey David okinmijlij nochimej on chanejkej ne Israel: "Nokoneu Salomón, san yejua okitlapejpenij Dios. Pero sanken* telpokakonetl niman xe itlaj kimati. On tekitl sanoyej ueyi pampa on yektiopan, xpara sen tlakatl yej para toTEKO Dios. 2 Nejua yonikchiu kanika para oniksentlalij nochi on tlajtlamach* para kichijchiuaskej iyektiopan noDios. Oniksentlalij oro, plata, bronce, tepostli, niman kojtli*. Niman no, oniksentlalij miyek tetsitsimej de ónice, tetsitsimej yejuan tlaxintli de miyek colores, tetsitsimej yejuan tlilijkej, miyek tetsitsimej yejuan kualtsitsimej niman sanoyej miyek tetl de marmol. 3 Niman aparte de nochi on yejuan yoniksentlalij para iyektiopan noDios, no niktemakas para on yektiopan oro niman plata yejuan noyaxka. 4 Niktemakas 100 mil kilos oro de Ofir niman 230 mil kilos de plata yejuan más kuajli, para kalauiliskej on tepantli de on kaltin, 5 para nochi on tlajtlamach* yejuan de oro niman de plata, niman para nochi on tekitl yejuan on tlamachijchijkej kichiuaskej. Niman aman, ¿Akinon de nemejuamej kineki kitemakas ikan nochi iyojlo sen tetlayokolijli* para toTEKO?"6 Kemaj on tlayekankej de familias, on tlayekankej de on tribus* de Israel, on soldadojtlayekankej de se mil niman de 100, niman on yejuan iuejueyitekiuajkauan on rey, okimakakej tetlayokolijli ika nochi iminyojlo. 7 Okitemakakej para on tekitl de iyektiopan toTEKO 165 mil kilos oro, 10 mil tomin de oro, 330 mil kilos de plata, 600 mil kilos de bronce niman 300 millones 300 mil kilos de hierro.
8 Nochimej on yejuan kipiyayaj temej kualtsitsimej okitemakakej kampa keuaj on tlen patioj para iyektiopan toTEKO. Niman Jehiel, iuejkakoneu* Gersón, yejua kicuidarouaya on tlajtlamach*.
9 Nochi tlakatl sanoyej pakiyaj pampa okitemakakej on tetlayokolijli* ika iminpakilis. Niman on rey David no pakiya.
Iueyikatsajtsilis David
10 Kemaj David onoueyikatsajtsilij itech toTEKO inmixpan nochimej on chanejkej niman ijkin okijtoj: “¡NoTEKO, Dios de toachtojtajta Israel, ma mitsyekteneuakan desde nochipa niman para nochipa. 11 NoTEKO, tejua moyaxka* on ueyilistli, on poder, on ueyi yekteneualistli, on tetlanilistli niman nochi tlakaitalistli, pampa nochi on tlen onkaj ne iluikak niman ipan tlaltikpaktli nochi moyaxka. No titlamandaroua nochiuiyan pampa tejua más tiueyixtikaj de nochimej. 12 De motech ualejtikaj on ricojyotl niman on tetlakaitalistli, tejua titekiuajti nochiuiyan. Ipan momauan tikpiya poder niman chikaualistli, niman tejua ueli tikueyilia on chikaualistli para nochimej. 13 Tejua toDios, timitsmakaj tlaxtlauijli niman tikueyiteneuaj moyektokatsin. 14 Pero ¿Akin nejua in noso akinon on nochanejkauan para timitsmakaskej itlaj tetlayokolijli*? Melauak, nochi tejua moyaxka*, niman on yejuan yotimitsmakakej, on tlen tejua otinechmakak. 15 Pampa mixpan, tejuamej xtichanejkej niman san tipanotikijsaj no ijki ken on touejkakoneuan. On tonaltin ipan in tlaltikpaktli ken sen tlaseuajlotl niman xtipiyaj ken ijki titomanauiskej para xtimikiskej.
16 "ToTEKO niman toDios, nochi in tlajtlamach* yejuan yotiksentlalijkej para tikchijchiuaskej moyektiopan para tiktlakaitaj moyektokatsin, nochi tejua moyaxka* katkaj. 17 Nejua nikmatstikaj noDios ika tejua tikita iyojlo on tlakatl, niman mitspaktia on kuajli tlakatl. Yejua ika, nimitsmaka nochi yejua in ikan pakilistli niman ika nochi noyojlo. No nikita ika nochi in chanejkej yejuan nikan nemij kimatij paktli para mitsmakaskej nochi in tetlayokoliltin. 18 NoTEKO Dios de noachtojtajuan Abraham, Isaac niman Jacob, nimitstlajtlanilia para nochipa kuajli ma tlanemilikan mokoneuan niman ma kipiyakan kuajli inyojlo motechika. 19 No xmaka nokoneu Salomón kuajli iyojlo para ma kintlakamati motlanauatiluan niman moleyes. Xpaleui ma kichijchiua on yektiopan para on yejuan nejua oniksentlalij nochi on tlajtlamach*."
20 Kemaj okinmijlij nochimej: "Xkueyiteneuakan nemoTEKO Dios." Kemaj nochimej okiueyitenejkej iminTEKO, iminDios inuejkatajuan, niman onotlakuantelketskej ixpan Dios niman ixpan on rey.
Israel okiselij Salomón ken rey
21 Uajmostla okinmiktijkej yolkej niman okimakakej toTEKO ken uentli yejuan nochi tlatla. Okimiktijkej se mil becerros, se mil borregos niman se mil borreguitos. Okichijkej uentli de vino niman okimakakej miyek okseki uentin ipampa nochi Israel. 22 Ipan on tonajli nochimej otlaonikej* niman otlakuajkej ikan pakilistli ixpan toTEKO. Kemaj, ika okpa okitemachistijkej ken rey Salomón ikoneu David, niman okikuatêkijkej ikan aceite ixpan toTEKO, niman Sadoc okitenejkej ken tiopixki. 23 Kemaj Salomón onotlalij ken rey ipan on trono yejuan toTEKO okimakak. Ijkon okipatlak David, itataj niman nochi kuajli okis. Nochimej on israelitas okitlakamatkej. 24 Nochimej iuejueyitekiuajkauan David, on soldadojtlayekankej niman ikoneuan on rey David okiprometerouilijkej xkaman kitlalkauiskej on rey Salomón. 25 ToTEKO okichiu para Salomón sanoyej ueyixtikatka imixpan nochimej on israelitas. Niman okichiu para itekiuajyo ken sanoyej ueyixtikatka xken nochimej on oksekimej reyes yejuan yotlamandarokaj ipan on país de Israel.
Imikilis David
26 David ikoneu Isaí katka rey ipan nochi Israel, 27 para 40 xipan. Otlamandaroj chikomej xipan ne Hebrón niman 33 xipan ne Jerusalén. 28 David omik ijkuak sanoyej yeueuentsin katka. Kipiyaya miyek xipan, riquezas, tlakaitalistli niman ueyilistli. On itrono okimakak Salomón, ikoneu.
29 Nochi on tlajtlamach* tlen onochiu ijkuak tlamandaroya David desde ipeuyan hasta itlamiyan, tlajkuilolnestikaj ipan inamamox in yeyimej tiotlajtojkej: Samuel, Natán, niman Gad. 30 Ipan on amamoxtin nochi kuajli nestikaj de on tlajtlamach* tlen David okichiu ijkuak tlamandarouaya, niman ipoder, niman on tlajtlamach* tlen yejua ipan onochiu, niman ipan onochiu Israel niman ipan on países yejuan nokauaj nijnisiu.