Imintekiu on tiopixkej
24
Iuejkakoneuan Aarón ijkin onoxexelokej ipan on tekitl. Ikoneuan Aarón katkaj: Nadab, Abiú, Eliazar niman Itamar. 2 Nadab niman Abiú achtoj omikkej xken intataj, niman xokipixkej inkoneuan. Ijkon tej, Eleazar niman Itamar yejuamej onokajkej ken tiopixkej. 3 Ikan itlapaleuil Sadoc, iuejkakoneu* Eleazar, niman de Ahimelec, iuejkakoneu* Itamar, David okinxexeloj on tiopixkej cada se kamanon niman tlinon itekiu kichiuas. 4 Pampa más nemiyaj on tlakakamej tlayekankej intech iuejkakoneuan Eleazar xken de itech iuejkakoneuan Itamar, okinxelojkej majtlaktli uan chikuasen tlayekankej de iuejkakoneuan Eleazar, niman chikueyi tlayekankej de iuejkakoneuan Itamar. 5 Para okinxexelojkej, okichijkej suertes, pampa intech iuejkakoneuan Eleazar niman Itamar nemiyaj uejueyitekiuajkej ipan on yektiopan niman itiopixkauan Dios.
6 Ne kampa nochiuaj suertes, ompa nemiyaj ken testigos: on rey, on uejueyitekiuajkej, on tiopixki Sadoc, Ahimelec yejuan ikoneu katka Abiatar, niman on tlayekankej ipan cada familia de on tiopixkej niman on levitas. Niman on levita Semaías yejuan ikoneu katka Natanael niman on amatlajkuilojketl okitlajkuiloltlalij ken ijki okis on suertes. On suerte okichijkej okpa para ifamilia Eleazar niman san sejpa para ifamilia Itamar.
7 On achtoj suerte okitocaro Joiarib,
on ika ome suerte para Jedaías.
8 Ika yeyi suerte para Harim,
ika naui suerte para Seorim,
9 Ika makuijli suerte para Malquías,
ika chikuasen suerte para Mijamín,
10 Ika chikome suerte para Cos,
ika chikueyi suerte para Abías,
11 Ika chiknaui suerte para Jesúa,
ika majtlaktli suerte para Secanías,
12 Ika majtlaktli uan se suerte para Eliasib,
ika majtlaktli uan ome suerte para Jaquim,
13 Ika majtlaktli uan yeyi suerte para Hupa,
ika majtlaktli uan naui suerte para Jesebead,
14 Ika majtlaktli uan makuijli suerte para Bilga,
ika majtlaktli uan chikuasen suerte para Imer,
15 Ika majtlaktli uan chikome suerte para Hezir,
ika majtlaktli uan chikueyi suerte para Afses,
16 Ika majtlaktli uan chiknaui suerte para Petaías,
ika sempoajli suerte para Hezequiel,
17 On ika 21 suerte para Jaquín,
on ika 22 suerte para Gamul,
18 On ika 23 suerte para Delaía,
on ika 24 suerte para Maazías.
19 Ijkon tej, okixexelojkej on turnos para kenijki tekitiskej ipan iyektiopan toTEKO, ijkon ken yokinauatijkaj Aarón, inuejkataj de yejuamej.
On oksekimej levitas
20 De iuejkakoneuan Leví yejuan nokauayaj, katkaj: Subael, yejuan iuejkakoneu* Amram, Jehedías yejuan iuejkakoneu* Subael. 21 De iuejkakoneuan Rehabías, achtoj katka Isías. 22 De iuejkakoneuan Izhar, katka Selomot, niman de iuejkakoneuan Selomot katka, Jahat. 23 De on iuejkakoneuan Hebrón katkaj: Jerías yejuan achtoj, Amarías ika ome, Jahaziel ika yeyi, niman Jecamán ika naui. 24 De iuejkakoneu* Uziel katka Micaía. De iuejkakoneuan Micaía katka Samir. 25 De ikniu Micaía katka Isías. De iuejkakoneuan Isías katka Zacarías. 26 De iuejkakoneuan Merari katkaj: Mahli niman Musi. De iuejkakoneuan Jaazías katka: Beno. 27 De iuejkakoneuan Merari katka: Jaazías, niman de iuejkakoneuan Jaazías katkaj Soham, Zacur, niman Ibri. 28 De iuejkakoneuan Mahli katka: Eleazar yejuan xokipix ikoneuan. 29 De iuejkakoneuan Cis katka Jerahmeel. 30 De iuejkakoneuan Musi katkaj: Mahli, Edar niman Jerimot.
Yejuamej in katkaj on levitas intech infamilias. 31 No ijki ken infamilias on iuejkakoneuan Aarón, yejuamej okinxexelojkej ikan suerte para kimatiskej tlen tekitl kichiuaskej ne ipan on yektiopan. Ijkon okichijkej ixpan on rey David, Sadoc, Ahimelec, niman inmixpan on tlayekankej de infamilias on tiopixkej niman de on levitas. Ipan cada familia, on tlayekankej okintenejkej ikan suerte no ijki ken okintenejkej on yejuan xuejueyixtokej.