Imintekiu on levitas
23
Ijkuak David sanoyej ye ueuentsin okiteneu Salomón, ikoneu, ken rey de Israel, 2 niman okinsentlalij nochimej on tlayekankej israelitas, on tiopixkej niman on levitas. 3 Kemaj okimpojkej on levitas yejuan kipiyayaj 30 xipan para tlakpak. Niman ijkuak otlan kimpouaj, katkaj 38 mil yejuan tlakamej. 4 De yejuamej in, 24 mil okintlalij para kiyekanaskej on tekitl ipan on yektiopan, 6 mil okintlalij para uejueyitekiuajkej niman jueces, 5 4 mil okintlalij para tlajpiyaskej ipan tsakuijlomej, niman okse 4 mil okintlalij para kuikatlaliskej toTEKO ika on tlatsotsonaltin yejuan David otlanauatijka ma kinchijchiuakan para ika kiueyiteneuaskej. 6 David okinxexeloj ipan grupos, ijkon ken otlakatitiajkej ikoneuan Leví: Gersón, Coat niman Merari.7 On ikoneuan Gersón katkaj: Laadán niman Simei. 8 On ikoneuan Laadán katkaj: Jehiel on yejuan yenkuiyotl, Zetam niman Joel. 9 On ikoneuan Simei no katkaj yeyimej: Selomit, Haziel niman Harám. Yejuamej in katkaj tlayekankej ipan ifamilias iuejkakoneuan Laadán. 10 On oksekimej ikoneuan Simei katkaj nauimej: Jahat, Ziza, Jeús niman Bería. 11 On yejuan yenkuiyotl katka Jahat, niman yejuan ika ome Ziza. Pero ika Jeús niman Bería xokimpixkej miyekej iminkoneuan, okimpojkej ken san se familia niman ijkon okipixkej san se tekitl.
12 On ikoneuan Coat katkaj nauimej: Amram, Izhar, Hebrón niman Uziel. 13 On ikoneuan Amram katkaj Aarón niman Moisés. (Aarón inuan ikoneuan okintlapejpenij Dios para kimakaskej on uentin yejuan más tlatiochijtin, para kitlatiskej kopajli ixpan toTEKO, kitekichiuiliskej niman nochipa ikan intlajtol kintiochiuaskej on tlakamej. In tekitl Aarón niman ikoneuan noneki para nochipa kichiuaskej. 14 Moisés, itekitkau Dios, niman ikoneuan okimpojkej ipan itribu* Leví.)
15 On ikoneuan Moisés katkaj: Gersón niman Eliezer. 16 Ikoneu Gersón, yejuan yenkuiyotl katka Sebuel. 17 Eliezer san okipix sentetl ikoneu, niman yejua itoka katka Rehabías. Pero Rehabías kemaj okimpix miyekej ikoneuan. 18 Ikoneu Izhar yejuan yenkuiyotl katka Selomit, niman yejua tlayekanketl katka itech sen clan*. 19 On ikoneuan Hebrón katkaj: Jeraías yejuan achtoj, Amarías yejuan ika ome, Jahaziel yejuan ika yeyi, niman Jecaman yejuan ika naui. 20 On ikoneuan Uziel katkaj: Micaías, yejuan achtoj, niman Isaías yejuan ika ome.
21 On ikoneuan Merari katkaj: Mahli niman Musi. On ikoneuan Mahli katkaj: Eleazar niman Cis. 22 Eleazar omik niman xokimpix ikoneuan yejuan tlakamej. Yejua san okimpix ikoneuan yejuan siuamej. Yejuamej ononamiktijkej iuan ikoneuan Cis, yejuan iminprimos katkaj. 23 On ikoneuan Musi katkaj yeyimej: Mahli, Edar niman Jeremot.
24 Yejuamej in katkaj iuejkakoneuan Leví, ijkon ken ifamilias yejuan tlajkuilolnestikaj imintoka, ken tlayekankej ipan familias, yejuan kipiyayaj sempoajli xipan para tlakpak, on yejuan tekitiyaj ipan on iyektiopan toTEKO.
25 David okijtojka: “ToTEKO, iDios Israel, yokinmakak yolseuilistli ikoneuan, niman chantis para nochipa nikan Jerusalén. 26 Yejua ika, on levitas xok nonekis kiktitinemiskej on tabernáculo* kampa nemi Dios, nion on tlajtlamach* tlatiochijtin yejuan ompa kitekitiltiaj.”
27 Ijkon tej, sa ika nochi itlanauatiluan David, otlanauatij on tlapouajli de on iuejkakoneuan Leví yejuan kipiyayaj sempoajli xipan para tlakpak. 28 Yejuamej kimpaleuiyayaj on tiopixkej, iuejkakoneuan Aarón, para on tekitl ipan on yektiopan. Tekitiyaj ipan on yektiopan kiauak, ipan on cuartos, niman kichipauayaj on tlajtlamach* tlatiochijtin. No ijki okichijkej okseki tlajtlamach* tekitl ipan on yektiopan. 29 No imintekiu katka: on pan tlatiochijtli yejuan kintekpanayaj ipan on mesa yejuan onkaj kalijtik de on tabernáculo* , on harina para on uentli de harina, de on uentli de memelatsitsimej yejuan xkipiya tlaxokolilistli*, de on uentli yejuan kikxitiaj ipan komajli, on uentli de on tixtli yejuan noneloua ikan aceite, niman yejuamej okitemachijkej nochi on uentli. 30 Niman no nonekiya kimakaskej tlaxtlauijli niman kiueyiteneuaskej toTEKO ipan yektiopan mojmostla kualkan niman tiotlak, 31 niman ijkuak kimakayaj toTEKO nochi on uentin yejuan nochi tlatla ipan on tonaltin sábado, ipan on iluimej de on yenkuik metsli niman ipan oksekimej iluimej ika tlakajtin. Nochimej on levitas kitekichiuiliayaj toTEKO san kichiuayaj ijki ken kiminnauatiayaj para kichiuaskej on intekiu. 32 Kipiyayaj on tekitl de cuidaroskej on tabernáculo* kampa kampa nonamikij iuan Dios, niman on yektiopan. Yejuamej kimpaleuiyayaj iuejkakoneuan Aarón on tiopixkej ne ipan on yektiopan.