22
Niman David okijtoj: “Nikan onyas iyektiopan toTEKO Dios, niman no nikan onyas on tlaixpan* kampa on israelitas kitemakaskej uentli yejuan nochi tlatla."David okisentlalij miyek tlajtlamach* para okichijchikej on yektiopan
2 Sakin David otlanauatij ma kinsentlalikan nochimej on xchanejkej yejuan chantiyaj ipan iueyitlalpan Israel, niman de yejuamej okinteneu on yejuan kiximaskej temej para kichijchiuaskej iyektiopan Dios. 3 David okisentlalij sanoyej miyek tepostli para on clavos niman on bisagras para on tsakuijlomej, niman sanoyej miyek bronce. 4 Niman no okisentlalij miyek kojtli* de cedro pampa on chanejkej de Sidón niman de Tiro okuajkikej kojtin* de cedro sanoyej miyek.
5 David okinemilij: "On yektiopan yejuan kichijchiuaskej para toTEKO ika onkaj yejua más ueyi yes niman kixmatiskej ipan nochi tlaltikpaktli, pero nokoneu Salomón sanken* semi konetl niman xe itlaj kimati. Yejua ika, nikauas miyek tlajtlamach* para kichijchiuaskej on yektiopan."
Ijkon tej, chika xemiki, David okau nochi ye onkaj. 6 Kemaj David okonnots Salomón, ikoneu, niman okinauati ma kichijchiua iyektiopan toTEKO Dios de Israel. 7 David okijlij Salomón: “Nokoneu, nejua niknemiliaya nikchijchiuas on yektiopan para tlakaitalistli de noTEKO, Dios. 8 Pero toTEKO onechijlij: 'David, tejua otikchiu miyek nouijsokilistli, niman otikmiktij miyek tlakatl nixpan. Yejua ika, xtejua tinechchijchiuilis noyektiopan. 9 Pero tikpiyas mokoneu yejuan yes sen tlakatl yejuan xkichiuas nouijsokilistli, niman nejua nikchiuas para xkipiyas pajsolouilistli impampa itlauelikniuan. Itoka yes Salomón niman ijkuak tlamandaros, on país de israel nochipa kipiyas yolseuilistli niman nemis ika kuajlotika. 10 Yejua yes akin kichijchiuas noyektiopan para kitlakaitas notoka. Yejua yes nokoneu niman nejua yes niitataj. Nejua nikchiuas para iuejkakoneuan kinmandaroskej on israelitas para nochipa.' 11 Aman, nokoneu, toTEKO ma mitspaleui para tikchijchiuas iyektiopan toTEKO Dios, ijkon ken yejua yokijtoj. 12 Ijki tej, toTEKO ma mitsmaka on tlamachilistli niman tlamatkilistli para ijkuak yejua mitstlalis ken ueyitekiuaj uelis tiktlakamatis ileyes toTEKO Dios. 13 Tla tiktlakamatis nochi ileyes niman itlanauatiluan yejuan toTEKO okimakak Moisés para on israelitas, kemaj nochi kuajli kisas. Xmoyolchikaua niman maka xmomojti, nion maka xmoyolmajxalo. 14 Xkita, ikan miyek tekitl oniuel oniksentlalij on tlajtlamach* para iyektiopan toTEKO. Oniksentlalij 3 mil 300 toneladas de oro niman 33 mil toneladas de plata niman sanoyej miyek bronce niman tepostli. Niman no oniktlalij miyek kojtli* niman temej, pero ika onkaj tejua tiksentlalis más. 15 No ijki nemij sanoyej miyekej tekitkej: on yejuan kiximaj temej, tepanchijkej, kojxinkej niman tlamachijchijkej yejuan uelij nochi tekitl 16 ikan oro, plata, bronce niman tepostli. Ijkon tej, xpeualti on tekitl, niman ma toTEKO mouan nemi."
17 Sakin David okinnauatij nochimej on tlayekankej de Israel para ma kipaleuikan Salomón ikoneu. 18 Okinmijlij: "ToTEKO Dios nemi nemouan niman omechmakak yolseuilistli nochiuiyan. Yejua onechkauilij para nikintlanis nochimej on chanejkej de in país, niman ika yokinnoyaxkatij, aman kitlakamatij toTEKO niman nemejuamej yejuan nenikoneuan. 19 Aman, tej, xtejtemokan toTEKO Dios ikan san se nemoyojlo niman ikan san se nemoalma. Xpeualtikan xchijchiuakan iyektiopan toTEKO para ijkon nenueliskej nenkitlaliskej ipan iyektiopan toTEKO iyekcaja niman on tlajtlamach* yejuan tlatiochijtin yejuan kitekitiltiskej para nenkiueyiteuaskej toTEKO."