David okinpou on israelitas
(2 S 24.1-17)
21
Satanás okichiu ma nochiua tlen xkuajli impan on israelitas, yejua ika, okichiu para David okimpou on israelitas. 2 Kemaj David okinauatij Joab niman on tlayekankej intech on israelitas:—Xuiyan niman xkimpouakan on israelitas desde Berseba hasta Dan, niman xnechmachistikan keskimej nemij.
3 Pero Joab okinankilij:
—ToTEKO ma kinmiyekili ikoneuan okse 100 más de on yejuan aman nemij. Pero no ueyi Rey, ¿Tlen xtinochimej ye tinemij mouan niman timitstekipanouaj? ¿Tline* tikneki ma tikimpouakan on tochanejkauan, tejua ueyixtikaj Rey? Tla tikchiuaskej in tlapouajli, nochimej on israelitas uelis impan uajlas iueyicastigo Dios.
4 Pero on rey David okichiualtij Joab para ma kichiua on poualistli. Yejua ika, Joab oyaj okistinen ipan nochi Israel niman kemaj onokuep Jerusalén. 5 Joab okijlij David keskimej okinmijkuilojkej ipan on tlapouajli de on chanejkej. Ne Israel nemiyaj se millón ipan 100 mil tlakamej yejuan ueliskej yaskej ipan nouijsokilistli, niman ne Judá nemiyaj 470 mil. 6 Pero ipan on tlapouajli xteuan nestiayaj on itribus Leví niman Benjamín, pampa Joab xokuelitak itlanauatil on rey.
7 Dios xokuelitak on tlapouajli, niman okuajtitlan sen castigo ipan Israel. 8 Pero David onoyolkuitij itech toTEKO. Niman ijkin okijlij:
—Onikchiu sen ueyi tlajtlakojli ika onikchiu yejua in. Pero nimitsiknotlajtlanilia aman xtlapojpolui itlajtlakol in motekitkau, pampa onikchiu ken yakaj yejuan xtlamachilisyej.
9 Kemaj toTEKO okijlij Gad, on tiotlajtojketl yejuan tekiti iuan David: 10 “Xuiya xkitati David, niman xkijli yejua in tlen nikijtoua: 'Ma kitlapejpeni kajtlejua de in yeyi castigo tiknekis ma nikchiua'.” 11 Gad oyaj okitato David, niman okijlij:
—Yejua in kijtoua toTEKO: "Xtlapejpeni 12 tla yeyi xipan ma onya mayantli, tla yeyi metstli ma mitstojtokatinemikan motlauelikniuan ikan espada, noso tla yeyi tonajli ma onya temojtij kokolistli ipan nochi in país, ijkuak niktilanis noángel yejuan kichiuas xoxotonilistli ipan nochi iueyitlalpan Israel." Xkijto aman tlinon nikijlis on yejuan onechajtitlan.
13 David okinankilij Gad:
—Ninemi ipan sen ueyi problema yejuan sanoyej tejmojti. Tla ijkon tej, xnikneki on tlakamej nechcastigaroskej. Más kuajli ma nechcastigaro noTEKO, pampa iteiknelilis* sanoyej ueyi.
14 Kemaj toTEKO okuajtitlan temojtij kokolistli ipan nochi Israel, niman omikkej 70 mil israelitas. 15 Niman Dios okititlan se iángel ne Jerusalén para ma kixoxotoni. Pero ijkuak opeu kixoxotonia, toTEKO okitak, niman okajman on tlajyouilistli. Yejua ika, okinauatij on ángel yejuan kinkokouaya: “¡Ma ijki, makasa xchiua!”
Ijkuakon, on iángel toTEKO nemiya nisiu ne kampa Ornán, on jebuseo, kiteiniaya on trigo. 16 Ijkuak David oajkotlachix ipan cielo, okitak ika iángel toTEKO nemiya tlajkotian de ipan cielo niman ipan tlaltikpaktli, ika sen espada ipan ima yokixtij kampa keua, niman kontlachaltijtikatka kampaka Jerusalén. Kemaj David niman on uejueyitlayekankej, kitlalijtikatkaj ajmankatlakentli, niman onopachojkej hasta ipan tlajli. 17 Niman David okijlij Dios:
—¡Nejua akin onitlanauatij ma kinchiuilikan tlapouajli, on chanejkej! ¡Nejua yejuan onitlajtlakoj niman onikchiu tlen xkuajli! ¿Pero tlinon okichijkej yejua in yejuan xkipiyaj tlajtlakojli? NoTEKO Dios, nejua nimitsiknotlajtlanilia xnechcastigaro nejua iuan nofamilia, pero makasa xkintlajyouilti mokoneuan.
David okichijchiu sen tlaixpan*
(2 S 24.18-25)
18 Kemaj iángel toTEKO okinauatij Gad ma kijli David ma kichijchiuili toTEKO sen tlaixpan* ne kampa Ornán on jebuseo kiteiniaya trigo. 19 Kemaj David oyaj okichiuato on tlen Gad okijlij ijkon ken toTEKO otlamandaroj. 20 Ornán kiteiniaya trigo iuan nauimej ikoneuan. Ijkuak Ornan onokuep niman okitak on ángel, ikoneuan nimantsin oyejtekej niman oniyanatoj. 21 Ijkuak David ononisiuij ne kampa nemiya Ornán, yejua in ontlachix, niman ijkuak okitak David, ouajkis de ne kampa kiteiniaya trigo niman onopachoj hasta ipan tlajli ixpan David. 22 Kemaj David okijlij Ornán:
—Xnechnamakilti on tlalij kampa tikteinia trigo, para ompa nikchijchiuilis toTEKO sen tlaixpan*. Xnechnamakilti ken kitocaroua on ikechyo, para ijki on temojtij kokolistli ma kisa ipan Israel.
23 Niman Ornán okinankilij:
—Xkui ueyixtikaj rey niman xchiua tlen tikitas más kuajli. Nejua nimitsinmakas on uakaxtin para uentli yejuan nochi tlatla. No nimitsmakas on kojtli* yejuan niktekitiltia para nikteinia trigo para on tlitl, niman on trigo para on uentli. ¡Nochi yejua in nimitsmaka tejua ueyixtikaj rey!
24 Pero on rey David okinankilij:
—Nimitstlajsojkamachilia, pero noneki nikouas nochi ken kitocaroua, pampa xnimitskuilis tlen moyaxka* para nikmakas toTEKO niman nikmakas uentli yejuan tlatlas yejuan xitlaj* oniktlaxtlau.
25 Ijkon tej, David okitlaxtlauilij Ornán ne kampa kiteiniaya trigo ika 600 tepostomin de oro. 26 Niman ompa David okichijchiuilij toTEKO sen tlaixpan* niman okimakak uentin yejuan tlatlaj niman uentin para yoltlalilistli. Kemaj onoueyikatsajtsilij itech toTEKO, niman yejua okinankilij ika sen tlitl yejuan okuajtitlan desde ipan cielo ipan on tlaixpan* kampa okitlatij on uentli. 27 Kemaj toTEKO okinauatij on ángel oksejpa ma keua iespada.
On kampa onyas on yektiopan
28 Ijkuak David, okitak ika toTEKO okinankijli iueyikatsajtsilis ne kampa Ornán on jebuseo kiteiniaya trigo, ompa okimakak más uentin. 29 On tabernáculo* yejuan Moisés okichijchiu para toTEKO ne ipan xalpatlajkan niman on tlaixpan* de on uentli yejuan nochi tlatla onkatkaj ikuapan on tepetsintli ne Gabaón. 30 Pero David xouel oyaj ompa para itlaj kitlajtoltitis Dios, pampa sanoyej onomojtij ijkuak okitak iespada iángel toTEKO.