David okitlan on ueyikalpan Rabá
(2 S 12.26-31)
20
Se tonajli, ijkuak ipan atliuetskatla*, ijkuak on reyes nomatiyaj kisayaj ontlauijsokij, Joab okinsentlalij isoldados niman okitlan nochi on ueyitlalpan amonita. Onejnen, okiyejyeualoj on ueyikalpan itoka Rabá niman okuijsok hasta nochi okixoxotonij. Chika ijkuakon David onokau Jerusalén. 2 Sakin David okikuik ipan itsontekon on rey amonita, on corona tlachijtli ikan oro, yejuan kipiyaya tetsitsimej kualtsitsimej, niman yetik katka 33 kilos, niman okitlalijkej ipan itsontekon David. Niman no okixtij ipan on ueyikalpan miyek tlajtlamach* yejuan patioj. 3 Niman on tlakamej yejuan sanken* nemiyaj ipan on ueyikalpan okinkixtij de ompa niman okinchiualtij ma tekitikan ikan sierras, tepostlalmakakej niman hachas. No ijki okichiu David iminuan on tlakamej ipan nochimej on uejueyikalpanmej amonitas. Kemaj onokuep Jerusalén iminuan nochimej isoldados. Nouijsokilistin iminuan on uejueyi tlakamej.
(2 S 21.18-20)
4 Sakin oonyak nouijsokilistli iminuan on filisteos ne Gezer. In onochiu ijkuak Sibecai yejuan ualeua Husa okimiktij Sipai yejuan katka teuejkakoneu intech on uejueyi tlakamej. Ijkuakon, on israelitas okinmandarokej on filisteos. 5 Niman ipan okseki nouijsokilistin yejuan oonyak iminuan on filisteos, Elhanán, ikoneu Jair, okimiktij Lahmi, ikniu Goliat on yejuan ualeua Gat. Ilanza kojyo tomauak katka ken on kojtli* yejuan kitekitiltiaj ijkuak kichijchiuaj tela.
6 Ipan on ueyikalpan Gat oonyak okse nouijsokilistli. Ompa nemiya sen ueyi tlakatl, yejuan kipiyaya majtlaktli uan ome ikxipiluan niman majtlaktli uan ome imajpiluan: chikuasen ipan cada ikxi niman chikuasen ipan cada ima. Yejua no katka teuejkakoneu intech on uejueyi tlakamej. 7 Pero okinmixnamik on israelitas. Niman Jonatán, ikoneu Simea, yejuan ikniu David, okimiktij. 8 In yeyimej uejueyi tlakamej katkaj iuejkakoneuan Refa, on yejuan ualeua Gat, pero ouetskej imak David niman iuejueyitekiuajkauan.