David okintlan miyekej naciones
18
Sakin ijkuak yonochiu yejua in, David okinuijsok on filisteos okintlan niman okinkuilij on ueyikalpan Gat iuan ikalpanuan pipitikej. 2 No David okintlan on amonitas, niman okinmandaroj, niman okinchiualtij ma kitlaxtlauilikan impuestos.3 Ijkuak Hadad-ezer, rey de Soba, yoajsika itech on ueyikalpan Hamat para kinoyaxkatis iregión on río Éufrates, David okitlan. 4 David okinmajsik se mil carretas de guerra niman okinmajsik chikomej mil soldados yejuan yayaj ipan caballos niman sempoajli mil on yejuan nejnentiayaj. Niman no okinkotstlaluayotek on caballos yejuan kintilanayaj on carretas de guerra. San okinkau on caballos yejuan nonekiya kintilanaskej 100 carretas de guerra.
5 Kemaj oajsikej on sirios yejuan oualejkej Damasco para kipaleuiskej Hadad-ezer, rey de Soba. Pero David okintlan on sirios niman okinmiktij 22 mil de yejuamej. 6 Kemaj David okinkau miyekej soldados ipan campamentos ne Damasco ipan iueyitlalpan Siria, niman yejua okinmandaroj niman okinchiualtij ma kitlaxtlauakan impuestos. Ijkon tej, toTEKO kichiuaya ma tetlani David nochiuiyan kampa yaya.
7 Sakin David okinnoyaxkatij on tepostlatsakuililtin de oro yejuan kitekitiltiayaj iueyitekiuajkauan Hadad-ezer, niman okinmiktik Jerusalén. 8 Niman no okinoyaxkatij* sanoyej miyek bronce de Tibnat niman Cun, on iuejueyikalpanuan Hadad-ezer. (Sakin ika on bronce, Salomón okichijchiu sen ueyi ajpastli para atl, on columnas niman on okseki tlajtlamach* de bronce para on ueyitiopan.)
9 Ijkuak Toi, on rey de Hamat, okimat ika David yokintlan nochimej isoldados Hada-ezer, yejuan rey de Sobá, 10 okititlan Adoram, ikoneu, para ma kitlapajloti on rey David niman ma kijliti ika kuajli ika okitlan Hadad-ezer, pampa Toi no iuan onouijsoka. Adoram okiktik miyek tlajtlamach* de oro, de plata niman de bronce para okitlayokolij.
11 David okitiochijkatlalij ixpan toTEKO nochi in tlajtlamach*, san sekan iuan on oro niman on plata yejuan okinkuilij on naciones, Edom, Moab, niman on amonitas, on filisteos niman on amalecitas.
12 No ijki Abisai, ikoneu Sarvia okintlan 18 mil edomitas ipan on Ixtlauatl yejuan itoka Istatl. 13 Kemaj David okintlalij miyekej soldados ipan campamentos ne Edom para tlajpiyayaj, niman nochimej on edomitas okinchiualtij ma tekitikan para yejua. Niman toTEKO kichiuaya para David nochiuiyan ma tetlani kampa yaya.
Iueyitekiuajkauan David
(2 S 8.15-18; 20.23-26)
14 David otlamandaroj ken rey ipan nochi Israel, niman okichiu tlen melajki niman tlen kuajli iuan nochi tlakatl. 15 On tlayekanki intech soldados katka Joab, ikoneu Sarvia. Josafat, ikoneu Ahilud, katka itlajkuilojkau on rey. 16 Sadoc, ikoneu Ahitob, niman Ahimelec, ikoneu Abiatar, tiopixkej katkaj. Sausa katka amatlajkuilojketl. 17 Benaía, ikoneu Joiada, kinyekanaya on soldados cereteos niman peleteos yejuan cuidarouayaj on rey. On ikoneuan David katkaj itlapaleuijkauan yejuan más uejueyixtokej.