Itlajtolmakalis Dios para David
(2 S 7.1-29)
17
Ijkuak David ye nemiya ipan ipalacio, okijlij on tiotlajtojketl Natán:—¡Nikan ye nichantitikaj ipan in palacio tlachijchitli ikan cedro chika on iyekcaja toTEKO uej onkaj ipan se kuamankajli.
2 Natán okinankilij:
—Xchiua on tlen moyojlo mitsijlis, pampa Dios mouan nemi.
3 Pero ipan on tlayoua, itlajtoltsin Dios oyejkok itech Natán niman okijlij: 4 "Xkijli notekichiuilijkau David, ijkin kijtoua toTEKO: 'Xtejua yes yejuan tinechchijchiuilis sen kajli para nejua ompa nichantis. 5 Nejua xe nichanti ipan se kajli desde ipan on tonajli ijkuak onemechkixtij Egipto nemejuamej israelitas hasta in tonajli. Yej yoniuajchantitiaj ipan sen kuamankajli yejuan kiktij san kanon. 6 Nochiuiyan kampa onikistinen iuan on israelitas, xkaman onikintlajtlanilij on tleyekankej yejuan onikintlapejpenij para kinyekanaskej nokoneuan ma nechchijchiuilikan sen yektiopan ikan kojtli de cedro.' 7 No xkijli: 'In yejua kijtoua toTEKO yejuan nochi ueli kichiua: Yonimitskixtij itech on borregos yejuan tikintlakuajkualtiaya, niman onimitstlalij para tikinyekanas nokoneuan israelitas. 8 Nejua ninemiya mouan san kanon kampa tejua tiaya. Yonikintlan motlauelikniuan ne mixpan niman aman nikchiuas para sanoyej ma mitsixmatikan ipan in tlaltikpaktli. 9 No niktlalis sen lugar para nokoneuan israelitas. Ompa uelis chantiskej para nochipa niman nion xitlaj* konmatstiaskej. Nion on imintlauelikniuan xkaman uajlaskej para kinuajpajsoloskej ken okichijkej achtoj, 10 desde on tonaltin ijkuak onikinteneu on jueces intech nokoneuan israelitas. Nejua nikintlanis nochimej motlauelikniuan. Niman nikneki xmatstia ika nimitsinmakas mouejkakoneuan para tlamandaroskej sakin* ijkuak yotimik. 11 Ijkuak yotimik, niman yomitstôkakej iuan mouejkatajuan, nejua niktlalis ipan motrono semej de mouejkakoneuan, niman nikchiuas para ireino kipiyas miyek poder. 12 Yejua nechchijchiuilis sen yektiopan niman ireino onyas para nochipa. 13 Nejua niitataj yes, niman yejua nokoneu yes. Xkaman nikixtilis notetlajsojtlalis itech ken onikchiu iuan Saúl yejuan otlamandaroj achtoj de tejua. 14 Yej, nikmakas tekiuajyotl intech nokoneuan niman noreino, niman itlanauatil yes para nochipa.' "
15 Natán okitlajtlajtouilij David nochi tlen Dios yokijlijka ipan on tlatlachalistli yejuan okiselij ipan itemik.
Iueyikatsajtsilis David
16 Kemaj on rey David okalak ipan itabernáculo toTEKO niman okijlij: "ToTEKO, ¿Akin nejua, niman akinon nofamilia, ika otinechmakak sanoyej miyek tlatiochiualistin? 17 Niman xsan yejua on yej aman noTEKO, tejua otikprometerouilij in motekitkau ken yaskej ipan iminnemilis nouejkakoneuan. Niman no noTEKO, tinechita ken tla yeskia sen tlakatl yejuan sanoyej ueyixtikaj. 18 ¿Nejua tlinon más uelis nikijtos de on tlakaitalistli yejuan tejua otinechmakak, maski tejua tinechixmati nejua nimotekitkau? 19 NoTEKO, tejua tikchiua nochi in uejueyi tlatlachalistin pampa ijki otiknek, niman nopampa nejua nimotekitkau para tinechititia nochi in tlajtlamach yejuan nochiuas intech nouejkakoneuan. 20 NoTEKO, xakaj ijki ken tejua. Nion xnemi okse dios. Nochi on tlen yotikakkej, tikitaj ika xnemi okse Dios ken tejua. 21 Niman xonkaj okse nación ipan in tlaltikpaktli ken monación Israel, yejuan otikixtij ne Egipto kampa nemiyaj esclavos. Otikchiu ikan miyek tlajtlamach* tlamauisoltin yejuan sanoyej tetlatlachaltij, niman yejua ika on tlakamej nochiuiyan okitakej ika sanoyej tiueyixtika. Niman no, otikinmanauij mokoneuan intech oksekimej naciones. 22 NoTEKO, otikmoyaxkatij on nación Israel para nochipa, niman sano tejua otimochiu iDios.
23 "Niman aman noTEKO, xchiua on tlen otinechprometerouilij nejua niman nouejkakoneuan para nochipa tlamandaroskej. Xchiua ijkon ken yotikijtoj. 24 Ijkon motokatsin kiueyiteneuaskej para nochipa, niman nochimej kijtoskej: '¡ToTEKO yejuan nochi ueli kichiua, yejua Dios de Israel!' Tla ijkon, nouejkakoneuan nejua motekitkau, nokauaskej para mitstekipanoskej para nochipa. 25 NoDios, pampa tejua otikmachistij in motekitkau ika xpopoliuiskej nouejkakoneuan, yej nochiuaskej reyes. Yejua ika, nimotekitkau nikchiua in ueyikatsajtsilistli mixpan. 26 NoTEKO, tejua tiDios, niman otinechprometerouilij nochi in tlen kuajli nejua motekitkau David. 27 Yejua ika, nimitsiknotlajtlanilia para tikintiochiuas nouejkakoneuan para mitstekipanoskej para nochipa. Ijkon tej, yejuamej nokauaskej kuajli tlatiochijtin para nochipa."