16
On iyekcaja Dios okiktikej niman okitlalijkej ijtik on kuamankajli yejuan David okuektlalij san para on yekcaja. Kemaj okitemakakej uentin yejuan nochi tlatla niman de yoltlalilistli ixpan Dios. 2 Niman ijkuak David otlan tlauentlalia okintiochiu on tlakamej ikan itokatsin toTEKO. 3 Kemaj nochimej on israelitas, tlakamej niman siuamej, okinmakak sen pan, sen memelatsin de dátiles niman sen memelatsin de uvajtetsojli.4 David okintlapejpenij intech on levitas on yejuan tekitiskiaj ixpan on iyekcaja toTEKO, para ma kimauistilikan toTEKO, Dios de Israel ikan noueyikatsajtsilistli, tlajsojkamachilistli, niman ueyiteneualistli. 5 On yejuan tlayekanki, katka Asaf, niman on ika ome, Zacarías. Jehiel, Matatías, Eliab, Benaía, niman Obed-edom kintsotsonayaj on arpas. Asaf kitsotsonaya on platillos, 6 niman on tiopixkej Benaía niman Jahaziel kimpitsayaj nochipa on tlapitsaltin ixpan on yekcaja yejuan kipiyaya ipacto* Dios.
On kuikatl yejuan David ika okimakak tlaxtlauijli toTEKO
(Sal 105.1-15; 96.1-13; 106.47-48)
7 Sano ipan on tonajli ijkuak David okinmakak kemach yeyika Asaf niman on levitas on tekitl para kinokuikatiskej in kuikatl de tlajsojkamachilistli itech toTEKO.
8 “¡Xmakakan tlajsojkamachilistli toTEKO!
¡Xkueyi teneuakan itokatsin!
Xkintlajtlajtouilikan on naciones tlen okichiu.
9 Xmokuikatikan kuikamej de yekteneualistli para yejua.
¡Xtlajtlajtokan de on uejueyi tlajtlamach* yejuan okichiu!
10 "Xmoueyimatikan ipampa iyektokatsin.
¡Ma yolpakikan on yejuan kitejtemouaj toTEKO!
11 Xtejtemokan itlapaleuil toTEKO, niman iueyi poder,
nochipa xtejtemokan itlapaleuil toTEKO.
12 Xkelnamikikan on uejueyi tlajtlamach*
niman on tetlatlachalistin yejuan okichiu,
niman on tlanauatiltin yejuan yokinteneu
13 nemejuamej, iuejkakoneuan Israel itekitkau,
nemejuamej, ikoneuan Jacob, tlatlapejpeniltin.
14 “Yejua toTEKO, toDios,
¡Yejua kimandaroua nochi in tlaltikpaktli!
15 Maski panoskej se mil teixuiuan,
Xkaman kelkauaskej on itlajtolmakalisuan
yejuan onkaj ipan ipacto*,
16 de on pacto* yejuan okichiu iuan Abraham,
de on tlen okitlajtolmakak Isaac,
17 niman yejuan okitlalij ken ley para Jacob,
ken sen pacto* uejuan xkaman tlami para Israel,
18 ijkuak okijtoj:
‘Nimitsmakas on tlajli de Canaán
yejuan tikselis ken se herencia.’
19 “Maski nemotajuan ueuetkej achijtsitsimej katkaj,
keskimej yejuan xchanejkej ipan on tlajli,
20 yejuan okakalakej ipan sen nación
para yayaj ipan okse nación
niman kisayaj ipan sen reino
para yayaj ipan okse reino,
21 Dios xokitekauilij para yakaj ma kintlajyouilti,
niman okiachtojijlij on reyes:
22 'Maka itlaj xkinchiulikan on yejuan yonikintlapejpenij,
nion maka xkintlajyouiltikan notiotlajtojkauan.'
23 “Xkuikatlalikan toTEKO, chanejkej ipan nochi tlaltikpaktli,
xtemachistikan mojmostla ken yejua temakixtia.
24 Xtlajtlajtokan de iueyilis niman itlamajuisoluan
intech nochimej on tlakamej niman naciones,
25 pampa toTEKO ueyixtikaj
niman sanoyej kinamiki ma kiyekteneuakan,
niman más sanoyej temojtij ken nochimej on dioses.
26 On dioses de oksekimej kalpanmej xitlaj* kijtosneki,
pero toTEKO okinchijchiu on cielos.
27 ¡Onkaj ueyi petlanalistli kampa yejua nemi!
¡Onkaj poder niman pakilistli ipan iyektiopan!
28 “Xmakakan toTEKO yekteneualistli nochimej familias ipan nochi naciones,
xyekteneuakan ipoder niman iueyilis toTEKO.
29 Xmakakan toTEKO on tlakaitalistli yejuan kinamiki,
ikan uentin xuiyan ixpan yejua,
xmauistilikan toTEKO ipan on kualtsin iyektiopan.
30 ¡Nochi tlakatl ma kuekuetlaka ixpan yejua!
Yejua okitlalij in tlaltikpaktli para maka ma ojolini.
31 ¡Ma pakikan on cielos niman in tlaltikpaktli!
Xkimijlikan on naciones: ‘¡ToTEKO yejua rey!’
32 ¡Ma kakisti chikauak on mar,
niman nochi on ayolkej yejuan nemij
ipan sanoyej kiueyiteneuaj toTEKO!
¡Ma paki on campo niman nochi yejuan onkaj ipan!
33 ¡Ma tsajtsikan ikan pakilistli on kojtin*
ipan on kojyoj ixpan toTEKO,
pampa uajlas para tlamandaros ipan in tlaltikpaktli!
34 “Xmakakan tlajsojkamachilistli toTEKO, pampa yejua sanoyej kuajli iyojlo,
pampa itetlajsojtlalis toTEKO xkaman tlami.
35 Xkijlikan:
'¡Xtechmakixti, Dios totemakixtijkau!
¡Xtechsentlali niman xtechmanaui de intech on naciones
para ma kueyilikan moyektokatsin,
para ika pakilistli ma timitsueyilikan!'
36 ¡Ma tikyekteneuakan toTEKO, Dios de Israel,
aman niman para nochipa!”
Niman nochimej on israelitas otlanankilijkej: “Ma ijki nochiua,” niman okueyilijkej toTEKO.
37 Ijki tej, ompa ixpan on yekcaja yejuan kipiya ipacto* toTEKO, David okau Asaf niman on levitas para nochipa ma tlamauistilikan ijkon ken nonekiya mojmostla. 38 Niman no okau Obed-edom, Hosa, ikoneu Jedutún yejuan no itoka Obed-edom, niman 68 oksekimej levitas ken tsakuijlotlapixkej ipan on kuamankajli. 39 David okau Sadoc iuan on oksekimej tiopixkej para kitekichiuiliaj ipan on itabernáculo toTEKO ikuapan on tepetsintli ne Gabaón. 40 Yejuamej okimakakej on uentli yejuan nochi tlatla ipan on tlaixpan* cada kualkan niman tiotlak nochi ijkon ken tlajkuilolnestikaj ipan iley toTEKO yejuan okinmakak on israelitas. 41 Niman no okajteu iminuan yejuamej Hemán, Jedutún niman on oksekimej yejuan okintlapejpenijkaj niman okintokayotijtiajkej para nokuikatiskej on kuikatl itoka: “Xmakakan tlaxtlauijli toTEKO pampa itetlajsojtlalis xkaman tlami.” 42 Hemán niman Jedutún kimpitsayaj tlapitsaltin, niman kintsotsonayaj platillos niman okseki tlatsotsonaltin chika oksekimej kuikatlaliayaj Dios. On ikoneuan Jedutún yejuamej tlajpiyayaj ipan on tsakuijlotl.
43 Sakin nochimej onokuepkej iminchan, niman David no onokuep ichan para okitiochiuato ifamilia.