David okiktik iyekcaja toTEKO ne Jerusalén
(2 S 6.12-23)
15
David otlanauatij ma kichijchiuilikan kaltin ipan on Iueyikalpan David, niman no okichijchiu sen kajkajli kampa onyas iyekcaja Dios. 2 Kemaj ijkin otlanauatij: "Ika onkaj para on levitas san yejuamej kiktiskej iyekcaja Dios pampa toTEKO yejuamej yokintlapejpenij para ma kiktikan on iyekcaja niman para nochipa yejuamej ma kitekipanokan”3 Kemaj okinsentlalij nochimej on israelitas ne Jerusalén para kitaskej ijkuak kuakiskej iyekcaja toTEKO ne kampa yokitlakuektlalilij. 4 No okinsentlalij on iuejkakoneuan Aarón, niman on levitas. 5 Nikan onkaj on lista de levitas yejuan onosentlalijkej:
On iuejkakoneuan Coat katkaj 120,
niman Uriel imintlayekankau katka.
6 On iuejkakoneuan Merari katkaj 220,
niman Asaías imintlayekankau katka.
7 On iuejkakoneuan Gersón, katkaj 130,
niman Joel imintlayekankau katka.
8 On yejuan iuejkakoneuan Elizafán katkaj 200,
niman Semaías imintlayekankau katka.
9 On yejuan iuejkakoneuan Hebrón katkaj 80,
niman Eliel, imintlayekankau katka.
10 On yejuan iuejkakoneuan Uziel katkaj 112,
niman Aminadab imintlayekankau katka.
11 Kemaj David otlatitlan ma kinotsatij on tiopixkej Sadoc niman Abiatar, niman on levitas Uriel, Asaías, Joel, Eliel niman Aminadab. 12 Niman okinmijlij: “Nemejuamej ika nentlayekankej ipan on familias levitas, xmochipauakan ixpan Dios iminuan on yejuan ken nenkintaj, para ijki uelis nenkiktiskej iyekcaja toTEKO, Dios de Israel, nikan kampa yoniktlakuektlalilij. 13 Pampa nemejuamej levitas xonenkitlajtoltijkej toTEKO ijkuak achtoj nenkiktisnekiyaj, yejua ika okualan niman otechcastigaroj ika on tlakatl yejuan omik."
14 Kemaj on tiopixkej niman levitas onochipajkej ixpan toTEKO para uelis kiktiskej iyekcaja toTEKO, yejuan iDios Israel. 15 On Levitas okiktikej ika on kojtin* ueueyakej yejuan ika kechpanojtiayaj, ijkon ken okinnauatijka Moisés ika itlanauatil toTEKO.
16 David no okinnauatij on intlayekankauan on levitas ika, de itech intribu, ma kinteneuakan on yejuan nokuikatiskej, niman ma uiyan ikan tlatsotsonaltin: salterios, arpas niman platillos para ma kiteititikan ika sanoyej pakij. 17 On levitas okitenejkej Hemán, ikoneu Joel, Asaf, ikoneu Berequías, niman Etán ikoneu Cusaías yejuan iuejkakoneuan Merari. 18 Niman no okintenejkej oksekemej ken topilejkej: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías, niman on omemej tsakuijlotlajpixkej Obed-edom niman Jeiel.
19 On nokuikatijkej Hemán, Asaf niman Etán imintekiu katka kitsotsonaskej on plaltillos de bronce. 20 Zacarías, Aziel, Semiramot, Jehiel, Uni, Eliab, Maasías niman Benaía kipiyayaj on tlatsotsonaltin salterios para kintsotsonaskej ijkon ken elamitas, 21 chika Matatías, Elifelehu, Micnías, Obed-edom, Jeiel niman Azazías kipiyayaj arpas para kintsotsonaskej ken siminita, kiyekanayaj on kuikatl. 22 Quenanías, intlayekankau on levitas, yejua kinyekanaya on yejuan nokuikatiayaj niman yejuan tlatsotsonayaj, pampa yejua sanoyej kajsikamatiyaj tlatsotsonajlotl. 23 Berequías niman Elcana yejuan tsakuijlotlajpixkej katkaj, cuidarouayaj on yekcaja. 24 Niman on tiopixkej Sebaías, Josafat, Natanael, Amasai, Zacarías, Benaías niman Eliezer katkaj on yejuan kimpitsayaj on tlapitsaltin iyakapan on iyekcaja Dios. Obed-edom niman Jehías no cuidarouayaj on yekcaja.
25 Kemaj David, on uejueyitlayekankej de Israel niman on tlayekankej intech on soldados oyajkej ikan paktli okuitoj ichan Obed-edom on yekcaja ikan ipacto* toTEKO. 26 Niman ika Dios kimpaleuiyaya on levitas yejuan kiktiyaj on yekcaja, okimiktijkej chikome uakax niman chikome borrego para uentli. 27 David onotlakentij ika sen tlakentli* de lino yejuan más kuajli. No ijki onotlaketikej nochimej on levitas yejuan kiktiyaj on yekcaja, on yejuan nokuikatiaj niman Quenaías, yejuan kinyekanayaj on yejuan kiktiyaj on yekcaja. Niman no David kitlalijtiaya sen efod* de lino. 28 Nochimej on israelitas kuajcuidarojtiayaj ne Jerusalén on yekcaja yejuan kipiyaya ipacto* toTEKO ikan pakatsajtsilistli niman on ikakistilis inkuakuauuan borregos, tlapitsaltin, platillos salterios niman intlatsotsonajlo on arpas.
29 Ijkuak on yekcaja ikan ipacto* toTEKO okaxitijkej ipan Iueyikalpan David, Mical, ichpoch Saúl, ontlachix ipan iventana. Niman ijkuak okitak on rey David nijtotijtiaya ikan pakilistli, okimat sanoyej okualanij.