Hiram okintitlan tlajtojkamej itech David
(2 S 5.11-12)
14
Hiram, rey de Tiro, okintitlan itlajtojkauan itech David. No okintitlan cedrokojtin, tepanchijkej niman kojxinkej para kichijchiuiliskej ipalacio David. 2 Niman David okajsikamat ika toTEKO kuajli ika okalaktij ken rey ne Israel, niman okipaleuij para on país okipix poder niman ueyilistli para on israelitas.Oksekimej ikoneuan David
(2 S 5.13-16; 1 Cr 3.5-9)
3 Ne Jerusalén, David ononamiktij inuan más siuamej, niman okimpix más ikoneuan tlakamej niman siuamej. 4 On ikoneuan yejuan otlakatkej ne Jerusalén intoka katka: Samúa, Sobab, Natán, Salomón, 5 Ibnar, Elisúa, Elpelet, 6 Noga, Nefeg, Jafía 7 Elisama, Eliada niman Elifelet.
David okintlan on filisteos
(2 S 5.17-25)
8 Ijkuak on filisteos okimatkej ika David yokikuatêkijkej ikan aceite para okalaktijkej ken rey ipan nochi Israel, okiskej nochimej iminsoldados para okitejtemotoj. Pero David okimat niman okis okinmixnamikito. 9 On filisteos oyakatstiajkej* niman okinuijsokej on chanejkej ipan on ixtlauatl Refaim. 10 Yejua ika in, David okinots toTEKO, niman okitlajtoltij:
—¿Uelis nikinmixnamikis on filisteos? ¿Tikchiuas para ma nikintlani?
Niman toTEKO okinankilij:
— Kemaj, xkinuijsoki, pampa nikchiuas para xkintlani.
11 David otlejkok ne Baal-perazim, niman ompa okintlan. Yejua ika okijtoj: “Ken on ueyi ayajtok chikauak tlaxopeua, Dios no ijki yonechtlapouilij ojtli intech notlauelikniuan.” Niman ompa okitokayotij Baal-perazim. 12 Niman ijkuak on filisteos ocholojtejkej, okinkajtekej imindioses, niman David otlanauatij ma kintlatikan.
13 Pero on filisteos oksejpa okalakkej ipan on ixtlauatl Refaim, niman opeu kinuijsokej on chanejkej. 14 ijkon tej, David oksejpa okitlajtoltij Dios, niman Dios okinankilij:
—Maka xkinuijsoki inyakapan. Yej xkinyejyeualo niman xkinuijsoki kampaka tlakuitlapan ne kampa onokej on kojtin* de bálsamo. 15 Ijkuak tikakis ken yakajmej chojcholojtiuij inkuapan on kojtin, peua xkinuijsoki, pampa on kijtosneki ika nejua niau moyakapan para nikinuijsokis chikauak niman mikiskej on soldados filisteos.