David okinemilij kiktis on yekcaja ne Jerusalén
13
David okintlajtoltij nochimej isoldadojtlayekankauan, on yejuan kiyekanaj mil soldados niman on yejuan kiyekanaj 100 soldados. 2 Sakin okinmijlij nochimej on israelitas yejuan nemiyaj ne Jerusalén: “Tla nemejuamej nenkitaj kuajli niman toTEKO Dios techkauilia, ma tikinsentlalikan nochimej on israelitas yejuan nemij ipan on tlajtlaluis ipan iregiones Israel, niman on tiopixkej niman levitas yejuan nemij ipan inuejueyikalpanuan niman ipan on tlaltin kampa kintlakuajkualtiaj iminyolkauan. 3 Ijkon tikchiuaskej para tikuajkiskej nikan iyekcaja toDios, pampa desde on tonaltin ijkuak Saúl rey katka xok tikmatiyaj de yejua.” 4 Nochimej on israelitas okuelkakkej ma nochiua yejua on, pampa okitakej kuajli on tlen okinmijlij.David kejekoua kiktis iyekcaja toTEKO
(2 S 6.1-11)
5 Yejua ika, David okinsentlalij nochimej on israelitas, desde Sihor kampa itlamiyan Egipto hasta ikalakiyan Hamat ne norte ika, para kuajkiskej de Quiriat-jearim on iyekcaja Dios. 6 Kemaj, iminuan nochimej on israelitas otlejkok Quiriat-jearim (kampa no kitokayotiaj Baala), yejuan nokaua ipan iueyitlalpan Judá, para ompa kiktiskej iyekcaja Dios, kampa kinotsaj itokatsin toTEKO, yejuan kipiya itrono impan on ome ángeles yejuan imintoka querubines*. 7 On israelitas okixtijkej on yekcaja ichan Abinadab, niman okitlalijkej ipan sen carreta yenkuik. Uza niman Ahío kiyekantiayaj on carreta. 8 Niman David iminuan nochimej on israelitas yayaj ixpan Dios nokuikatijtiayaj, niman nijtotijtiayaj ika nochi inchikaualis, ika ikakistilis on tlatsotsonaltin: arpas, salterios, panderos, platillos niman tlapitsaltin. 9 Ijkuak oajsikej ne kampa Quidón kiteinia itrigo, Uza okanaltij ima para kiktsis on yekcaja, pampa on uakaxtin onokxitechakuanijkej. 10 Pero toTEKO sanoyej okualan itechkopa Uza ika okimatokak on yekcaja. Ijkuakon, okichiu ma miki, niman omik ne ixpan.
11 David sanoyej okualan pampa toTEKO okimiktij Uza. Yejua ika ompa ne okitokayotij Pérez-uza, niman hasta aman ijki kitokayotiaj. 12 Pero no ipan on tonajli David sanoyej onomojtij ixpan Dios, niman okijtoj: ¿"Ken ijki niuelis nikiktis iyekcaja Dios?” 13 Yejua ika, xokiktik on yekcaja ipan on Iueyikalpan David. Yej otlanauatij ma kiktikan ichan Obed-edom, sen tlakatl yejuan ualeua ipan on iueyikalpan Gat. 14 On iyekcaja Dios onokau yeyi metstli ichan Obed-edom, niman toTEKO okitiochiu ifamilia Obed-edom niman nochi tlen iyaxka.