On soldados yejuan iuan onosentlalijkej David
12
David nijiyantinemiya de on rey Saúl ikoneu Cis ne Siclag. Ompa oyajkej onosentlalitoj iuan miyekej on nouijsokej yejuan okipaleuikej ipan on tlauijsokilistin. 2 Yejuamej katkaj benjaminitas niman ken kintaya Saúl. Nochimej yejuamej okipixkej arcotlaminajli. Yejuamej ueliyayaj tlamotlayaj ikan arcotlaminajli noso ikan tematlatl, ikan iminopochma noso iminyekma. 3 Imintlayekankau katka Ahiezer, ikoneu Sema yejuan ualeua ipan on kalpan Gabaa. Ikniu Joás katka on ika ome tlayekanketl. On oksekimej tlauijsokej katkaj: Jeziel niman Pelet yejuan ikoneuan Azmavet; Beraca niman Jehú, yejuan ualeua ipan on kalpan Anatot; 4 Ismaías on gabaonita, yejuan katka semej de on 30 tlanouijsokej niman tlayekanki de yejuamej; Jeremías, Jahaziel, Johanán, Jozabad de Gedera; 5 Eluzai, Jerimot, Bealías, Semarías; Sefatías on harufita; 6 Elcana, Isaías, Azarel, Joezer niman Jasobeam, yejuan coreitas; 7 Joela niman Zebadías, ikoneuan Jeroam de Gedor.8 No onosentlalijkej iuan David on tlauijsokej yejuan kisaj itech itribu* Gad, ijkuak David nemiya ne ipan on ueyi kajli kampa nemij on soldados yejuan tlacuidarouayaj ne xalpatlajkan. Yejuamej katkaj on tlakamej yejuan xmojkej. Yejuamej nochipa nemiyaj listos para tlanouijsokiskej ipan on nouijsokilistli. Kimatiyaj ken kitekitiltiayaj on escudo niman on lanza. Yejuamej tlauelejkej katkaj ken itlaj leones niman tlajtlaksayaj ken itlaj masamej. 9 Intoka katkaj: on yejuan achtoj Ezer, ika ome Abdías, ika yeyi Eliab, 10 ika naui Mismana, ika makuijli Jeremías, 11 ika chikuasen Atai, ika chikome Eliel, 12 ika chikueyi Johanán, ika chiknaui Elzabad, 13 ika majtlaktli Jeremías, niman ika majtlaktli uan se Macbanai. 14 In gaditas katkaj soldadojtlayekankej. Yejuan xmás ueyixtikaj kiyekanaya 100 tlakamej niman on yejuan más ueyixtikaj kiyekanaya 1000 tlakamej. 15 In yejuamej on soldados yejuan okipanokej on río Jordán ipan atliuetskatlaj*, ijkuakon on río sanoyej pankisaya. Yejuamej okinkixtikej on chanejkej de on ixtlauatl kampaka ikisayan tonaltsintli niman kampaka ikalakiyan tonaltsintli.
16 Sekimej tlakamej de itribu* Benjamín niman de Judá no onosentlalijkej iuan David ne ipan on ueyikajli kampa tlacuidarouayaj on soldados. 17 David okiminnamikito niman okinmijlij: "Tla nemejuamej nenuajlauij ikan yolseuilistli niman nenechpaleuiskej nemechselis. Pero tla nenuajlauij para nennechtemakaskej intech notlauelikniuan, yej iminDios toachtojtajuan ma mechcastigaro pampa nejua xakaj itlaj nikchiuilia.
18 Niman iespíritu Dios ouajlaj ipan Amasai, tlayekanketl de on 30 niman yejua ijkin okijtoj:
"¡David ikoneu Isaí, Tiuajlau ikan yolseuilistli!
¡On yolseuilistli ma onya mouan!
¡Yolseuilistli para tejua niman para on yejuan mitspaleuiyaj,
pampa moDios yejua mitspaleuiya!"
David okiminselij niman okintlalij tlayekankej de on soldados.
19 Sekimej tlakamej de itribu* Manasés onosentlalijkej iuan David ijkuak yejua oyaj intech on filisteos para kuijsokiskej Saúl. (Pero David iuan isoldados xouel kimpaleuikej, pampa on filisteos yejuan tlayekankej onosentlalijkej niman okijtojkej: "David uelis techkajkayauas niman san ipampa timikiskej. Niman yejua yas iuan Saúl." Yejua ika okititlankej para ma uiya ne Siclag.) 20 On tlakamej de itribu* Manasés yejuan onosentlalijkej iuan David ijkuak oyaj Siclag katkaj: Adnas, Jozabad, Jediael, Micael, Jozabad, Eliú niman Ziletai. Nochimej yejuamej in soldadojtlayekankej katkaj itech se mil tlakamej. 21 Yejuamej in okipaleuijkej David para okinyekankej isoldados para okinuijsokkej on tlakamej yejuan ompaka kichiuayaj tlen xkuajli pampa nochimej sanoyej ueliyaj kuajli tlauijsokiyaj, niman xmojkej katkaj. Yejuamej onochikej soldadojtlayekankej para Israel. 22 Cada tonajli ajsiyaj más tlakamej para kipaleuiyayaj David. Ijkon onochikej sanoyej miyekej soldados, ken isoldados Dios.
On yejuan onosentlalijkej iuan David ne Hebrón
23 Nemiyaj miyekej tlakamej listos para tlauijsokij ika imintepos oajsik hasta Hebrón para onosentlalitoj iuan David. Ouajlakej para okiselikoj David ken iminrey en lugar de Saúl, ijkon ken Dios okiprometerouilij. 24 Itech itribu* Judá kakaj, 6 mil 800 tlakamej ikan intepos de lanza niman escudo yejuan listos para tlauijsokilistli. 25 Ichkichin katkaj on tlakamej: Itech itribu* Simeón, katkaj 7 mil 100 tlakamej yejuan uelij tlauijsokij niman xmojkej. 26 Itech itribu* Leví, katkaj 4 mil 600 tlakamej, 27 niman nochimej inuan 3 mil 700 aaronitas, iuan Joida on tlayekanketl, 28 niman no teuan Sadoc, on telpokatl tlauijsoketl yejuan yolchikauak inuan on 22 soldadojtlayekankej ipan ifamilia. 29 Itech itribu* Benjamín yejuan ken kita Saúl, katkaj 3 mil tlakamej. Nochimej yejuamej onenkej itech ifamilia Saúl. 30 Itech itribu* Efraín, kakaj 20 mil 800 tlakamej yejuan xmojkej. Cada se kimixmatiyaj ikan tlakaitalistli itech iclan. 31 Itech on tlajko tribu* de Manasés yejuan chantiyaj ne ikalakiyan tonajli de on río Jordan, katkaj 18 mil soldados yejuan okintenejkej para okitenauatoj David ken rey. 32 Itech itribu* Isacar, katkaj 200 tlayekankej iuan nochimej on yejuan ken notayaj. Katkaj tlakamej yejuan kixmatiyaj on tonaltin, niman kimatstikaj tlinon Israel kitocaroua kichiuas. 33 Itech itribu* Zabulón, katkaj 50 mil soldados listos para kuiskej imintepos. Yejuamej ueliyaj kuiyaj san katlejua intepos, niman kinekiyaj kipaleuiskej David ikan nochi iminyojlo. 34 Itech itribu* Neftalí, katkaj 1 mil tlayekanketl iuan 37 mil soldados ikan intepos de escudo niman de lanzas. 35 Itech itribu* Dan, katkaj 28 mil 600 tlauijsokej yejuan listos para tlauijsokiskej. 36 Itech itribu* Aser, katkaj 40 mil soldados yejuan listos ipan nouijsokilistli. 37 Itech on tribus de Rubén, Gad, niman tlajko tribu* de Manasés yejuan onkaj kampaka on lado ikisayan tonaltsintli de on río Jordán, katkaj 120 mil tlakamej ikan nochi kech sesekneka intepos.
38 Nochimej in soldados onesentlalijkej ne Hebrón. San se inyojlo kipiyayaj para okalaktijkej David ken rey para nochimej on israelitas. Niman no ijki, nochimej on oksekimej israelitas no okinekkej David ken iminrey. 39 Nochimej yejuamej onokajkej iuan David yeyi tonajli. Yejuamej otlaonikej* niman otlakuajkej yejuan on inchanejkauan kinmakayaj on tlajtlamach*. 40 No, yejuan chantiyaj ompaka nisiu, niman hasta de Isacar, Zabulón niman Neftalí, kinuajuikayaj polokomej*, camellos, mulas niman uakaxtin uajtlamamajtiayaj ikan harina, memelatsitsimej de higos, uvajtetsojli, vino niman aceite. No, okinuikilijkej uakaxtin niman borregos para okinmiktijkej niman okinkuajkej pampa nochimej on Israelitas sanoyej pakiyaj.