David otlamandaroj ken rey ne Israel niman Judá
(2 S 5.1-5)
11
Nochimej on israelitas onosentlalijkej para otlajtotoj iuan David ne Hebrón. Ijkin okijlijkej: “Tejuamej ken titotaj mouan. 2 Niman maski Saúl rey katka, tejua tikinyekanaya on israelitas ipan nouijsokilistli. Niman no, moTEKO Dios yomitsprometerouilij ika tejua titechyekanas, niman titechmandaros ken torey.”3 Ijkin tej, nochimej on uejueyitlayekankej de on israelitas oyajkej otlajtotoj iuan on rey David ne Hebrón, niman yejua okichiu sen pacto* iminuan yejuamej, ne ixpan toTEKO. Kemaj yejuamej okuatêkijkej David ikan aceite para okalaktijkej rey de Israel, ijkon ken Dios okiprometerojka itechkopa Samuel.
David okitlan on ueyikalpan Jerusalén niman okinoyaxkatij*
(2 S 5.6-10)
4 David niman nochimej on israelitas oyajkej okuijsokitoj Jerusalén, yejuan itoka katka Jebús. On jebuseos chantiyaj ipan on región, 5 niman okijlijkej David: “Tejua xuelis tikalakis nikan.” Pero David okinkuilij on ueyikajli kampa tlacuidarouayaj on soldados, yejuan onkatka ipan on tepetl itoka Sión. Aman itoka Iueyikalpan David. 6 Más achtoj David ijkin okijtojka: “On yejuan achtoj kimiktis sen Jebuseo, niktlalis para yejua soldadojtlayekanki yes.” Niman Joab, ikoneu Sarvia, yejua achtoj okimiktij sen jebuseo. Yejua ika, David okitlalij soldadojtlayekanki. 7 Sakin David onochantij ipan on ueyikajli kampa tlacuidarouayaj on soldados. Yejua ika, okitokayotijkej Iueyikalpan David. 8 Niman David okichijchiu on ueyikalpan. Okipeualtij desde on tlalmanko kampa okitlalten, niman otlamito ne itech on tepantli yejuan kiyeualojtok on ueyikalpan. Niman Joab otlan kuektlalia on ueyikalpan kampa poliuiya. 9 David más kajsitiaya poder, pampa toTEKO yejuan kipiya nochi poder iuan nemiya.
Isoldados David yejuan más xmojkej katkaj
(2 S 23.8-9)
10 In yejuamej on isoldados David yejuan más uelij tlauijsokij. Yejuamej san sekan iminuan nochimej on israelitas okitenejkej rey ijkon ken toTEKO okimprometerouilij on israelitas, niman kemaj okipaleuikej ipan nochi tonaltin ijuak David tlamandarouayaj.
11 Nikan tlajkuilolnestikaj imintoka on isoldados David yejuan más ueliyaj tlauijsokij: Jasobeam, ikoneu Hacmoni. Yejua intlayekankau katka on yeyimej yejuan más xmojkej intech isoldados David. Ipan se tonajli, Jasobeam okinmiktij 300 tlakamej ika ilanza. 12 Sakin de Jasobeam, ueyixtikatka Eleazar, ikoneu Dodo, iuejkakoneu* Ahoh. Eleazar katka se de on yeyimej yejuan xmojkej. 13 Onen iuan David ne Pas-damín, ijkuak on filisteos ompa onosentlalijkej para on nouijsokilistli ne kampa onkatka on tlatoktli de cebada. Niman ijkuak on soldados israelitas ocholotejkej intech on filisteos, 14 Eleazar iuan David onotelketskej tlajkotian ipan on campo niman okinmanauijkej, niman okintlankej on filisteos. Ijki toTEKO okichiu ma tetlanikan.
15 Se tonajli, yeyimej de on 30 yejuan xmojkej, oyajkej itech on ueyi tetl kampa David nemiya ipan on ostotl Adulam chika on soldados filisteos kipiyayaj imincampamento ipan on ixtlauatl Refaím. 16 Ipan in tonaltin David nemiya ipan sen teostokajli, chika sekimej filisteos nemiyaj ipan ueyikalpan Belén. 17 Niman David okijtoj yejua in: “¡Niknekiskia on atl yejuan onkaj ipan on atlaltekontli* yejuan onkaj ikalakiyan on ueyikalpan Belén!”
18 Kemaj on yeyimej yejuan xmojkej okalakkej ipan on campamento filisteo niman okixtijkej atl ipan on atlaltekontli* yejuan onkaj ipan ikalakiyan Belén, niman okiktilijkej David. Pero David xokinek okonik, yej okitotoyau ken sen uentli para toTEKO. 19 Okijtoj: “¡Dios maka ma nechkauili ma nikoni! ¡Pampa tla nikonis in atl, ken nikoniskia iminyesyo in tlakamej, pampa ueliskia kinmiktiskia ijkuak okuitoj!” Niman xokinek okonik.
In yejua san se ejemplo yejuan on yeyimej xmojkej okichikej.
20 Abisai, ikniu Joab, katka intlayekankau on 30 tlakamej yejuan xmojkej. Se tonajli okinmiktij 300 tlakamej ika ilanza. Ijki sanoyej okixmatkej intech on 30 yejuan xmojkej. 21 Niman okiselij más tetlakaitalistli xken nochimej yejuamej, niman yejua onochiu intlayekankau. Pero yejua xmás okixmatkej ken on achtoj yeyimej.
22 Benaía, ikoneu Joida yejuan ualeua ipan on ueyikalpan Cabseel, katka sen tlakatl yejuan xmojki yejuan okichiu miyek tlajtlamach*. Yejua okinmiktij on omemej más ueyixtikatkaj soldados yejuan ualeuayaj Moab. Se tonajli ijkuak xiniya nieve, otemok ipan sen tlaltekontli. Niman maski sanoyej tlaxipetskan katka ipan on sekutli, okajsik se león niman okimiktij. 23 Niman no okimiktij sen egipcio yejuan sanoyej ueyi tlakatl. On tlakatl katka kanaj ome metro uan tlajko niman kiktiya ilanza yejuan nesiya ken on kojtli* tomauak yejuan kitekitiltiaj ijkuak kichijchiuaj tela. Benaía okimailij ika sen kojtli, niman okuilij on lanza ipan ima niman okimiktij sano ika ilanza. 24 In tlen okichiu Benaía, ikoneu Joiada, okichiu sanoyej ma kixmatikan intech on yeyimej tlakamej yejuan xmojkej. 25 Yejua okiselij más tlakaitalistli xken yejuamej on 30, pero xijki ken on yeyimej achtoj. Niman David okitlalij tlayekanki itech on soldados yejuan kimanauiyaj.
26 On yejuan xmojkej, katkaj:
Asael, ikniu Joab;
Elhanán, ikoneu Dodo, yejuan ualeua Belén;
27 Samot, yejuan ualeua Arod;
Heles, on paltita;
28 Ira, ikoneu Iques yejuan ualeua Tecoa;
Abiezer, yejuan ualeua Anatot;
29 Sibecai, yejuan ualeua Husa;
Ilai, on ahohita;
30 Maharai, yejuan ualeua Netofa;
31 Itai, ikoneu Ribai yejuan ualeua Gabaa,
yejuan nemi ipan iueyitlalpan Benjamín;
Benaía yejuan ualeua Piratón;
32 Hidai, yejuan ualeua ipan on ayajtok Gaas;
Abiel, on abatita;
33 Azmavet yejuan ualeua Bahurim;
Eliaba, on saabonita;
34 on ikoneuan Jasén, on gizonita;
Jonatán, ikoneu Sage on ararita;
35 Ahíam, ikoneu Sacar, no ararita;
Elifal, ikoneu Ur;
36 Hefer, on mequeratita;
Ahías, on pelonita;
37 Hezrai, yejuan ualeua Carmel;
Naarai, ikoneu Esbai;
38 Joel, ikniu Natán;
Mibhar, ikoneu Hagrai;
39 Selec, on amonita;
Naharai yejuan ualeua Berot, itlapaleuijkau
yejuan kiktiliaya itepos Joab, ikoneu Sarvia;
40 Ira, yejuan ualeua Jatir;
Gareb yejuan no ualeua Jatir;
41 Urías, on hitita;
Zabad, ikoneu Ahlai;
42 Adina, ikoneu Siza, on rubenita,
intlayekankau on rubenitas,
niman 30 tlakamej iuan yejua;
43 Hanán, ikoneu Maaca;
Josafat, on mitnita;
44 Uzías on yejuan ualeua Astarot;
Sama niman Jehiel, ikoneuan Hotam, yejuan ualeua Aroer;
45 Jediael, ikoneu Simri, niman Joha ikniu, on tizita;
46 Eliel yejuan ualeua Mahanaim;
Jerebai niman Josavía, ikoneuan Elnaam;
Itma, on moabita;
47 Eliel, Obed niman Jaasiel, yejuan ualeuaj Soba.