Omik rey Saúl
(1 S 31.1-13)
10
On filisteos oyajkej okuijsokitoj Israel ipan on tepetl Gilboa. Ijkuakon, on israelitas ocholojtejkej inmixpan yejuamej, niman miyekej omikkej. 2 Kemaj on filisteos okitojtokakej Saúl niman ikoneuan. Ijkuak okinmajsitoj, okimiktijkej Jonatán, Abinadab niman Malquisúa, ikoneuan Saúl. 3 Kemaj on filisteos sa Saúl ipan opachijkej para okajsikej. Semej on yejuan arcotlaminaj, okimotlak niman sanoyej okikokoj. 4 Niman kemaj Saúl okijlij itlapaleuijkau yejuan kikti itepos: “Xnechmikti ikan moespada, para maka yej nechajmiktiskej on filisteos niman kemaj noka uetskaskej.” Pero on itlapaleuijkau Saúl onomojtij niman xokinek okimiktij. Yejua ika, Saúl okonkuik iespada, niman sano yejua ipan onotlajkal, niman ijkon onomiktij. 5 Ijkuak on tlapaleuijketl yejuan kikti itepos Saúl okitak ika Saúl yomik, yejua no onotlajkal ipan iespada niman omik. 6 Ijkon omik Saúl iuan on yeyimej ikoneuan. Yejua ika, xok okimpix iuejkakoneuan para tlamandaroskej. 7 Ijkuak on israelitas yejuan chantiyaj ipan on ixtlauatl okimatkej ika on soldados israelitas yocholojtejkej niman Saúl iuan ikoneuan yomikkej, yejuamej no okistekej ipan iminueyikalpan niman okajtejkej. Kemaj on filisteos kej yejuamej ompa ochantikej.
8 Uajmostla ijkuak on filisteos oyajkej para okintlakijkixtilitoj on mikatsitsimej, okinextitoj Saúl niman ikoneuan yomikkej ipan on tepetl Gilboa. 9 Niman Saúl okitlakijkixtilijkej, okuilijkej iarmas niman okechtsontekkej. Kemaj otlatitlankej para okiteijlitoj tlinon yonochiu. Okinmijlitoj nochimej on filisteos niman no okinmachistijkej iminídolos. 10 Sakin, nochi iteposuan Saúl okintlalijkej ipan on templo kampa nemij imindioses on filisteos, niman itsontekon okipilojkej ipan itiopan on dios Dagón.
11 Ijkuak nochimej on chanejkej de Jabes ne Galaad okimatkej tlinon yokichijkaj on filisteos, 12 on tlakamej yejuan xmojkej de Jabes okitekuilijkej imikatlalnayo Saúl niman inmikatlalnakayo ikoneuan, niman okinuikakej ne Jabes. Ompa okintôkakej tlatsintlan se auakojtli niman onosaukej chikome tonajli.