Iuejkakoneuan Rubén
5
1-3 Ikoneuan Rubén, yejuan iyenkuiyokoneu Israel, katkaj: Hanoc, Falú, Hezrón niman Carmi. (Rubén katka tekoneu yejuan yenkuiyotl, pero okipoloj iherencia de yenkuiyotl pampa okichiualtij itlakpasiuau itataj, iuan onotekak. Yejua ika, iherencia de yenkuiyotl opanok intech ikoneuan José, yejuan no ikoneu Israel. Pero sakin* iuejkakoneuan Judá onochiu más ueyixtokej xken iuejkakoneuan ikniuan, niman yejua itech okis sen tlayekanketl yejuan okinyekan nochi on tribus* pero on iherencia de yenkuiyotl okimakakej José.)4 On iuejkakoneuan Joel katkaj: Semaías ikoneu Joel, Gog ikoneu Semías, Simei ikoneu Gog, 5 Micaía ikoneu Simei, Reaía ikoneu Micaía, Baal ikoneu Reaía niman Beera. 6 Beera katka intlayekankau on rubenitas, yejuan Tiglat-pileser, on rey de Asiria, okinkixtij ne judea kampa iminueyitlalpan.
7 Ikniuan Beera, ijkin okinmijkuilojkej ken onkaj ipan imintlakamekayouan. Yejuamej notokatiayaj ika iminclanes katkaj: Jeiel, yejuan yakatstiu, Zacarías, 8 niman Bela, ikoneu Asaz, ixuiu Sema, on ikoneu Joel. Ikniuan Bela ochantikej ne Aroer niman iueyitlalpan ontlantoya* hasta Nebo niman Baal-meón. 9 Kampaka ikisayan tonaltsintli onochantij hasta itenko on xalpatlajkan yejuan ontlantoya desde on río Éufrates, pampa iminyolkauan sanoyej omiyekiyakej ipan iueyitlalpan Galaad.
10 Chika Saúl tlamandarouaya, on rubenitas okipixkej nouijsokilistli iminuan on agarenos, niman okintlankej. Kemaj onochantijkej ne kampaka ikisayan tonaltsintli de on iueyitlalpan Galaad.
Iuejkakoneuan Gad
11 On iuejkakoneuan Gad onochantijkej nisiu kampa chantiyaj on rubenitas, ipan iueyitlalpan Basán, hasta ipan on ueyikalpan Salca. 12 Joel más ueyi tlayekanketl katka ipan on ueyitlalpan itoka Basán. Safán katka on ika ome tlayekanketl, kemaj Jaanai niman kemaj Safat. 13 On oksekimej chikomemej tlayekankej yejuan ken kintaj, onotekpantiajkej ken familias, katkaj: Micael, Mesulam, Seba, Jorai, Jacán, Zía niman Heber. 14 Yejua in katkaj iuejkakoneuan Abihail, yejuan katka ikoneu Huri, yejuan katka ikoneu Jaroa, yejuan katka ikoneu Galaad, yejuan katka ikoneu Micael, yejuan katka ikoneu Jesisai, yejuan katka ikoneu Jahdo, niman yejuan katka ikoneu Buz. 15 Ahí, ikoneu Abdiel, ixuiu Guni, yejua tlayekanki katka intech nochimej yejuan ifamilias. 16 Nochimej yejuamej ochantikej ipan on uejueyitlalpamej ne Galaad, ne Basán niman ipan iminkalpanuan pipitikej yejuan onkatkaj nijnisiu, niman ipan on tlakauyan kampa kintlakuajkualtiayaj inyolkauan imanian iueyitlalpan Sarón. 17 Nochimej yejuamej okinmijkuilojkej ipan on tlakamekayomej kampa nestokej iminfamilias ipan on tonaltin ijkuak Jotam, rey katka ne Judá, niman ijkuak Jeroboam, rey katka ne Israel.
On tlen impan onochiu on ome uan tlajko tribu*
18 Imintech iuejkakoneuan Rubén niman Gad, niman on itlajko tribu Manasés, katkaj 44 mil 760 soldados yejuan xmojkej. Yejuamej kiktiyaj iminescudo, imintepos niman iminarco. Niman yejuamej sanoyej ueliyaj tlauijsokiyaj. 19 Ijkuak onouijsokej inuan on agarenos, niman iuan Jetur, Nafis niman Nodab, 20 Dios okimpaleuij niman okintlankej on agarenos niman on yejuan iuan nemiyaj. Ijkon onochiu pampa okineltokakej ika nochi inyojlo niman okitlajtlanilijkej Dios ma kimpaleui. 21 Okinuilikej inyolkauan on imintlauelikniuan agarenos, yejuan katkaj: 50 mil camellos, 250 mil borregos niman 2mil polokomej*. Niman no okinmajsikej 100 mil tlakamej. 22 Miyekej imintlauelikniuan omikkej, pampa on nouijsokilistli katka ipampa Dios. Niman onokajkej para onochantijkej ompaka hasta ipan on tonaltin ijkuak on rey de Asiria okinkixtij.
23 On inuejkakoneuan itlajko tribu* Manasés ochantikej ipan on ueyitlalpan yejuan ompejtok desde Basán hasta Baal-hermón, Senir niman on tepetl Hermón, pampa sanoyej miyekej katkaj. 24 On tlayekankej ipan infamilias katkaj: Efer, Isi, Eliel, Azriel, Jeremías, Hodavías niman Jahdiel. Nochimej yejuamej katkaj soldados yejuan xmojkej, tlakamej yejuan sanoyej okinmixmatkej niman otlayekankej ipan iminfamilias. 25 Pero okitlalkauijkej iminDios inachtojtajuan, niman okinmauistilijkej imindioses on naciones yejuan Dios okinxoxotonij niman okinkixtij intech yejuamej. 26 Yejua ika in, iDios Israel okichiu para Pul, rey de Asiria, (yejuan no itoka Tiglat-pileser), yejuan okinmajsik on rubenitas niman gaditas niman itlajko tribu* Manasés, niman okinuikak ne Halah, Habor, Hara niman ipan on río Gozán, kampa nemij hasta aman.