Iuejkakoneuan Judá
4
On iuejkakoneuan Judá katkaj: Fares, Hezrón, Carmi, Hur niman Sobal. 2 Reaía, ikoneu Sobal, okipix ikoneu itoka Jahat, niman Jahad okimpix ikoneuan intoka Ahumai niman Lahad. In yejuamej katkaj ifamilias on zoratitas.3 Ikoneuan Etam katkaj: Jezreel, Isma, niman Idbas. Yejuamej in kipiyayaj se iminikniu yejuan siuatl itoka katka Haze-lelponi. 4 Ikoneuan Penuel katkaj: Gedor niman Ezer. Ikoneu Ezer katka Husa. In yejuamej ikoneuan katkaj Hur, yejuan iyenkuiyokoneu Efrata. Yejua okipeualtij on ueyikalpan Belén.
5 Asur, itataj Tecoa, okipix ome isiuau: Hela niman Naara. 6 Naara iminnan katka: Ahuzam, Hefer, Temeni niman Ahastari. In yejuamej katkaj ikoneuan Naara. 7 On ikoneuan Hela katkaj: Zeret, Jezoar niman Etnán.
8 Ikoneuan Cos katkaj Anub, Zobeba niman achtoj tajtli de nochi ifamilias Aharbel, yejuan ikoneu Harum.
9 Jabes más okixmatkej xken ikniuan, niman inanaj okitokayotij Jabes, pampa okijtoj: “Melauak oniktlakatilij ikan nekokojli.” 10 Jabes onoueyikatsajtsilij itech iDios Israel. Ijkin okijtoj: "Nimitsiknotlajtlanilia xnechmaka motlatiochiualis niman más xkanalti noueyitlaluan. Xnechpaleui niman xnechmakixti itechkopa nochi on tlen xkuajli para ijki nejua maka ma nitlajyoui.” Niman Dios okimakak on tlen okitlajtlanilij.
11 Quelub, ikniu Súa, okipix ikoneu itoka Mehir. Mehir okipix ikoneu itoka Estón. 12 On ikoneuan Estón katkaj: Bet-rafa, Paseah niman Tehína, yejuan okipaualtij on ueyitlalpan Nahas. Yejuamej in katkaj chanejkej ne Reca.
13 On ikoneuan Cenaz katkaj: Otiniel niman Seraías. On ikoneuan Otoniel katkaj: Hatat, 14 niman Meonotai, itataj Ofra. Ikoneu Seraías katka Joab, iminachtojtajuan on chanejkej ipan on ixtlauatl Carisim, yejuan nochimej tlamachijchiuayaj.
15 On ikoneuan Caleb, ikoneu Jefone, katkaj: Iru, Ela niman Naam. Ikoneu Ela katka Cenaz.
16 On ikoneuan Jahleel katkaj: Zif, Zifa, Tirías niman Asareel.
17-18 On ikoneuan Esdras katkaj: Jeter, Mered, Efer niman Jalón. Mered ononamiktij iuan Bitia, ichpoch on rey de Egipto, niman iminkoneuan katkaj: María, Samai niman Isba, tajtli de Estemoa. Mered no okipix okse isiuau de itribu* Judá. Yejua nantli katka de Jered, yejuan tajtli katka de Gedor, niman Heber. Ikoneuan Heber katkaj: Soco, niman Jecutiel. Ikoneu Jecutiel katka Zanoa.
19 Isiuau Hodías, yejuan ikniu katka Nahan, okipix ome ikoneu yejuan ijkin intoka katkaj: Dalia on garmita, niman Estemoa on macateo.
20 On ikoneuan Simón katkaj: Amnón, Rina, Ben-hanán niman Tilón. On ikoneuan Isi katkaj: Zohet niman Benzohet.
21 On iuejkakoneuan Sela, ikoneu Judá, katkaj: Er, itataj Leca, Laada, itataj Maresa, on clanes yejuan kichijchiuaj tojtontli ikan lino ne Bet-asbea, 22 Joacim; on chanejkej ne Cozeba; niman Joás niman Saraf. Yejuamej ononamiktikej inuan on siuamej moabitas niman oksejpa onokuepkej ne Belén, ijkon ken okijkuilokej ipan amamoxtli* yeuejkaui kayomej . 23 Yejuamej in katkaj tepalkachijkej yejuan chantiyaj ne Netaim niman Gedera, niman kitekichiuiliayaj on rey.
Iuejkakoneuan Simeón
24 On ikoneuan Simeón katkaj: Nemuel, Jamín, Jarib, Zera niman Saúl. 25 Ikoneu Saúl katka Salum, ikoneu Salum katka Mibsam, niman ikoneu Mibsam katka Misma.
26 Ikoneu Misma katka Hamuel, Ikoneu Hamuel katka Zacur, niman ikoneu Zacur katka Simei. 27 Simei okipix majtlaktli uan chikuasen ikoneuan tlakamej niman chikuasen ikoneuan siuamej. Pero ikniuan xokipixkej sanoyej miyekej iminkoneuan. Yejua ika, iminfamilias xsanoyej omiyekiyakej ken on iuejkakoneuan Judá. 28 Yejuamej chantiyaj ne: Berseba, Molada, Hazar-sual, 29 Bilha, Ezem, Tolad, 30 Betuel, Horma, Siclag, 31 Bet-marcabot, Hazar-susim, Bet-birai niman Saaraim. Yejuamej in iminueyikalpanuan katka hasta ijkuak David otlamandaroj. 32 Iminuejkakoneuan no ochantikej ipan in okse makuijli kalpanmej: Etam, Aín, Rimón, Toquén niman Asán, 33 iuan nochi ikalpanuan pipitikej yejuan onkaj nijnisiu ipan on uejueyikalpanmej hasta Baalat. In yejua amatlajkuiloltin kampa tlajkuilolnestokej iminuejkatajuan niman kampa ochantikej.
34 Oksekimej iuejkakoneuan Simeón katkaj: Mesoab, Jamlec, Josías, ikoneu Amasías, 35 Joel, Jehú yejuan ikoneu Josibías, yejuan iauelo Seraías, niman iokpaauela Asiel, 36 Elioenai, Jaacoba, Jesohaía, Asaías, Adiel, Jesimiel, Benaía, 37 Ziza, yejuan ikoneu Sifi, yejuan iauelo Alón, yejuan iokpaauela Jedaías, yejuan iyexpaauela Simri, niman inapaauela Semaías. 38 Yejua in yejuan yotikintenejkej, katkaj tlayekankej intech clanes. Iminfamilias omiyekixtiajkej hasta sanoyej omiyekiyakej. 39 Oajsikej kitejtemojtiayaj sakatl para iminyojkauan hasta ikalakiyan Gerar, kampaka ikisayan tonaltsintli ipan on ixtlauatl. 40 Ompa okinextijkej miyek sakatl sa yejyektli xoxojki, niman sen ueyi tlajli kampa xitlaj* kimpajsolos. Ompa achtoj ochantikaj iuejkakoneuan Cam. 41 Pero ipan on tonaltin ijkuak Ezequías rey katka ne Judá, iuejkakoneuan Simeón okinixnamikej niman okinxoxotonijkej inkaluan on tlakamej yejuan ompa chantiyaj. Okinkixtikej nochimej yejuan ompa okinnextijkej niman yejuamej ompa onokajkej para chantiskej, pampa onkatka sakatl para iminyolkauan. 42 Niman no, 500 tlakamej iuejkakoneuan Simeón, oyajkej ipan on tepetl Seir. Pelatías, Nearías, Refaías niman Uziel, ikoneuan Isi kinyekanayaj. 43 Ompa okinmiktijkej on amalecitas yejuan nokauayaj. Desde ijkuakon ompa chantij hasta aman.