7
Eliseo okinankilij:
—Xkaki itlajtoltsin toTEKO. ToTEKO kijtoua: "Mostla mayanin, ikalakiyan Samaria uelis nenkouaskej chikome litro harina san ika se plata tomin, niman no san ika se plata tomin uelis nenkouaskej 15 litros cebada.’
2 On ika tlakajtli itlapaleuijkau on rey okinankilij on tiotlajtojketl:
—Maski tla toTEKO kintlaposkia on ventanas ipan iluikak, on tlen tikijtoua, xueliskia nochiuas.
Eliseo okinankilij:
—Kemaj nochiuas. Tejua tikitas ika mixtololojuan, pero tejua xtikuas.
3 On tonajli nauimej yejuan kipiyayaj on kokolistli lepra* nemiyaj ikalakiyan on ueyikalpan, niman okinojlijkej sano yejuamej:
—¿Tlinon tikchijtokej nikan tejeuatokej? ¿Tikchixtokej mikilistli? 4 Tla tikalakiskej ipan on ueyikalpan, timikiskej, pampa ompa sanoyej onkaj mayantli, niman tla nikan tejeuatiaskej, no timikiskej. Ma tipanokan, tej, ipan on campamento sirio. Tla techkauilia tinemiskej, tinemiskej, niman tla techmiktiaj, ye ijki onkatka timikiskiaj.
5 Ijkon tej, onokuitejkej ijkuak tlapoyajkan niman oyajkej ipan on campamento sirio, pero ijkuak ye nemiyaj nisiu, okitakej ika xakaj nemi. 6 Xakaj nemiya, pampa toTEKO okichiu para on soldados sirios ma kakikan ken uajlauij miyek soldados inuan carretas de guerra niman caballos. Kemaj on sirios okinemilijkej ika on rey de Israel okintlakeu niman yokintlaxtlauilij isoldados on rey hitita niman on rey de Egipto para kinuijsokiskej. 7 Yejua ika ocholojkej ijkuak tlapoyajkan. Yejuamej okajtejkej iminkajkaluan, imincaballos niman iminpolokouan. Ijkon tej, okajtejkej on campamentoj ken onkatka, para ocholotejkej niman xomikkej. 8 Ijkuak on yejuan kipiyayaj lepra* oajsikej ikalakiyan on campamento, okalakkej ipan sen kajli de telaj, niman kemaj okuajkej niman okonikej on tlen ompa onkatka. Kemaj okinoyaxkatijkej on plata, oro niman tlakentli*. Kemaj oyajkej okiyanatoj. Sakin onokuepkej niman okalakkej ipan okse kajli de telaj, niman ompa no okikuikej tlajtlamach* niman oyajkej okiyanatoj. 9 Pero kemaj okinojlijkej sano yejuamej:
—Xkuajli tlen tikchijtokej. Tikpiyaj kuajli tlatojli niman xtitemachistiaj. Tla tikchaj hasta kualkan, tejuamej techcastigaroskej. Más kuajli tla tiaskej amantsin ipan on palacio niman tikontemachistiskej.
10 Kemaj oyajkej niman okominnotskej on soldados yejuan kitlajpiyaj ikalakiyan on ueyikalpan, niman okinmijlijkej:
—Yotiajkaj ipan on campamentoj sirio, niman xnemiya nion akin, nion xkakistiya tla yakaj tlajtlajtoua. San ompa nemiyaj on caballos niman on polokomej* salijtokej, niman on kaltin de telaj ijkon ken okintelketskej.
11 On yejuan tlajpiyayaj ikalakiyan on ueyikalpan okominnotskej amanaman on yejuan tlajpiyayaj ipan on palacio. 12 Kemaj maski tlayoua katka, on rey onokuiteu niman okinmijlij itlapeliuikauan:
—Nemechijlis on tlen kinemiliaj techchiuiliskej on sirios. Pampa kimatstokej ika titlajyouijtokej ikan apistli, yokiskej ipan incampamento niman yoniyankej ipan campo. Kinemilijtokej ika ijkuak tejuamej tikisaskej ipan in ueyikalpan, yejuamej techajsiskej tiyoltokej niman kalakiskej ipan in ueyikalpan.
13 Pero se de itlapaleuijkau okijlij:
—Ma kintitlanikan keskimej tlakamej yejuan ontlachaskej. Uelis kuikaskej on makuijli caballo yejuan nokauaj, para ma kitatij tlinon nochiua. Tla nemiskej noso mikiskej xitlaj más kuajli noso sanoyej xkuajli impan nochiuas ken impan nochiuas nochimej on oksekimej israelitas yejuan titokauaj nikan.
14 Yejua ika tej, okuikakej ome carretas de guerra iuan caballos, niman on rey okintitlan ipan on campamentoj sirio para ma tlajtlachatij. 15 Yejuamej oyajkej okitokakej kampa nestiaya onojuitijkej on sirios hasta ne Jordán. Niman okitakej ika ipan ojtli nochiuiyan tentikatka ika tlakentin niman tlajtlamach* yejuan on sirios okixixinijtiajkej ika sa isiutiayaj para ocholojtejkej. Kemaj onokuepkej on yejuan okintitlan on rey niman okitlajtlajtouilijkej on tlen okitakej. 16 Kemaj on israelitas nimantsin okiskej niman okuikej nochi tlen onkatka ipan on campamento sirio. Niman ijkon ken okijtojka toTEKO, on harina okinamakakej chikome litro ika se plata tomin, niman on cebada, 15 litros ika se plata tomin.
17 On rey okinauatij itlapaleuijkau yejuan ikatlakajtli tlajpiya ipan ikalakiyan on ueyikalpan, pero on tlakamej, okitlajtlajkalkej niman okichojcholojkej itech on tsakuijlotl niman omik, ijkon ken okijtojka on tiotlajtojketl ijkuak on rey oyaj okitato.
18 Onochiu, tej, on tlen on itiotlajtojkau Dios yokijlijka on rey ijkuak okijlij ika ikalakiyan Samaria kinamakaskiaj chikome litro harina, noso 15 litros de cebada san ika se plata tomin. 19 On ueyi tekiuaj okinankilijka on tiotlajtojketl ika, maski tla toTEKO kintlaposkia on ventanas ipan iluikak on tlen kijtoua xueliskia nochiuaskia. Niman Eliseo okinankilijka ika kitaskia ika ixtololojuan, pero yejua xkikuaskia. 20 Niman melauak, ijki onochiu, pampa on tlakamej okitlajtlajkalkej niman okichojcholojkej ipan ikalakiyan on ueyikalpan niman omik.