Onochiu milagro de sen hacha
6
Se tonajli, on tiotlajtojkej okijlijkej Eliseo:—Xkita, kampa tichantij mouan semi tlapitsko para tejuamej. 2 Xtechkauili ma tiuiyan ne río Jordán niman tikintekiskej kojtin, para ompa tikchijchiuaskej kampa tichantiskej.
Eliseo okinankijlij:
—Xuiyan.
3 Se de yejuamej okijtoj:
—Por favor, xuiya touan tejuamej motlapaleukauan.
Eliseo okinankilij:
—Kuajli, nemouan nias.
4 Niman Eliseo oyaj iminuan hasta on río Jordán, niman ompa opeu kintsontekij kojtin. 5 Pero onochiu ijkin, ijkuak se de yejuamej kitsontektikatka sen kojtli, on hacha ouajtekopin ipan ikojyo niman ouetsito ipan atl. Kemaj otsajtsik:
—¡Ay temachtijketl! ¡On hacha san* oniktlaneu!
6 Eliseo, on tiotlajtojketl okitlajtoltij:
—¿Kanon ouetsito?
On tlakatl okontitij kanon. Kemaj Eliseo okitek sen kojtli, okontlajkal ompa niman okichiu para on hacha ma panuetsi.
7 Eliseo okinauatij:
—Xkontilana.
On tlakatl okanaltij ima niman okontilan.
Eliseo niman on sirios
8 On rey de Siria nemiya ipan nouijsokilistli iuan Israel, niman ijkuak yokintlajtoltij on iueyitekitkauan okijtoj kanon kinemiliaya kitlalis icampamento.
9 Kemaj Eliseo otlanauatij ma kijlitij on rey de Israel para maka ma pano ompaka, pampa on sirios ompaka yayaj. 10 Ijkon tej, on rey de Israel okintitlan isoldados kampaka on tiotlajtojketl okijlijka ijkuak okimachistij. Niman ijki miyekpa Eliseo okipaleui.
11 On rey de Siria xkimatiya tlinon kinemilis niman sanoyej kualaniya. Yejua ika, okinnots itlapeliuikauan niman okinmijlij:
—¡Xnechijlikan akinon de tejuamej kiichtaka paleuiya on rey de Israel!
12 Se de yejuamej okinankilij:
—Xakaj, noueyirey. Pero Eliseo, on tiotlajtojketl yejuan nemi ne Israel, kimachistia on rey de Israel nochi tlen tejua noueyirey tikijtoua. Yejua kijlia hasta on tlen tikijtoua ipan mokalijtik kampa tikochi.
13 Kemaj on rey de Siria otlanauatij:
—Xtejtemotij kanon nemi Eliseo, para ijki nikintitlanis keskimej tlakamej para ma kajsikan.
Ijkuak okijlijkej ika nemi ne Dotán, 14 okintitlan miyekej soldados ipan caballos, niman carretas de guerra, niman miyekej soldados yejuan nejnentiayaj. Yejuamej oajsikej ijkuak tlayoua ne Dotán niman okiyejyeualojkej on ueyikalpan. 15 Uajmostla kualkan onokuiteu on itlapaleuijkau Eliseo, niman ijkuak okisato kiauak, okitak ika on soldados kiyejyeualojtikatkaj on ueyikalpan iuan caballos niman carretas de guerra. Kemaj oyaj okitlajtoltij Eliseo:
— Ah notemachtijkau, ¿aman tlinon tikchiuaskej?
16 Eliseo okinankilij:
—Maka xmomojti, pampa más miyekej on yejuan touan nemij xken on yejuan nemij iminuan yejuamej. 17 Kemaj Eliseo onoueyikatsatsilij itech toTEKO. Okijtoj: “Nimitsiknotlajtlanilia, noTEKO, xkintlapouili ixtololojuan, para ma tlacha.” Kemaj toTEKO okintlapouilij ixtololojuan on tlapaleuijketl, niman yejua okintak ika iyeualkan Eliseo ipan on tlaixtli tentikatka de caballos niman carretas de guerra yejuan nesiyaj ken tlikuitokej para kimanauiyayaj.
18 Ijkuak on sirios ye uajlayaj para konuijsokiskej Eliseo, ijkin onoueyikatsatsilij itech toTEKO: “Nimitstlajtlanilia para makasa ma tlachakan in tlakamej.” Niman toTEKO okinciegojtilij, ijkon ken okitlajtlanilij Eliseo.
19 Kemaj Eliseo okinmijlij:
—In xejua on ojtli, nion in xejua on ueyikalpan yejuan nenkitejtemouaj. Xnechajtokakan, niman nejua nemechuikas hasta itech on tlakatl yejuan nenkitejtemouaj.
Niman okinyekan ne Samaria.
20 Ijkuak oajsikej ipan on ueyikalpan Samaria, Eliseo okichiu in oración: “Aman, noTEKO, xkintlapouili iminixtololojuan, para ma tlachakan.” Kemaj yejuamej okitakej ika nemiyaj Samaria. 21 Niman ijkuak on rey de Israel okintak, okitlajtoltij Eliseo:
—¿Notataj, ma nikinmikti? ¿Ma nikinmikti?
22 Pero Eliseo okinankilij:
—Ka, maka xkinmikti. ¿Tlen ijkon timouika? ¿Yej tikinmiktia ikan moespada noso moarcojtlaminal on motlauelikniuan yejuan tikinmajsi? Xkinmaka tlakuajli niman tlaonijli niman kemaj xkinkuepa itech iminrey.
23 Kemaj irey Israel okinchiuilij sen ueyi iluitl. Ijkuak yotlakuajkej niman yotlaonikej*, on rey ononauatij iminuan, niman yejuamej onokuepkej itech on rey de Siria. Desde ijkuakon, on sirios xok okinuijsokitoj on israelitas ipan iminueyitlalpan.
Eliseo niman on yejuan okinmajsikej on soldados de Samaria
24 Sakin ijkuak ijkin yonochiu, Ben-adad, rey de Siria, okinsentlalij nochimej isoldados, niman oyajkej okiyejyeualotoj Samaria para kuijsokiskej. 25 Kemaj sanoyej oonyak mayantli ne Samaria, pampa ouejkau okiyeualtsakukej. Sanoyej otlapatiouak, hasta itsontekon sen poloko* kinamakayaj 80 plata tomin, niman tlajko litro ixixalis sen kokotetsin kinamakayaj makuijli plata tomin.
26 Se tonajli, on rey de Israel panouaya nejnentiaya ipan itepan on ueyikalpan, niman sen siuatl okitsajtsilij:
—¡Noueyirey, xnechpaleui!
27 On rey okinankilij:
—Tla toTEKO xmitspaleuiya, ¿Kenijki uelis nimitspaleui nejua? ¿Tlen uelis nimitsmakas trigo, noso vino? 28 ¿Tlinon mopan nochiua?
Yejua okinankili:
—In siuatl onechijlij ma niktemaka nokoneu para ma tikuakan aman, niman mostla tikuaskej yejua ikoneu. 29 Kemaj otikikxitijkej nokoneu, niman otikuajkej. Uajmostla nejua onikijlij ma kitemaka ikoneu para ma tikuakan, pero yejua yokiyan.
30 Ijkuak okak on rey on tlen on siuatl kijtouaya, okitsayantiaj itekiuajtlaken pampa sanoyej onajman. Niman pampa nemiya ipan on tepantli, on tlakamej yejuan nisiu nemiyaj okitakej ika tlatsintlan de itlaken pani kitlalijtiaya ajmankatlakentli*. 31 Niman on rey okijtoj: “¡Dios ma sanoyej nechcastigaro tla aman in tonajli xniktekilia itsontekon Eliseo yejuan ikoneu Safat!”
32 Eliseo nemiya ichan, yeuatikatka iminuan on uejueyi tlayekankej. Chika ijkuakon, on rey yokititlanka se de itlajtojkau iyakapan. Pero ijkuak on yejuan okititlan on rey xe ajsiya, Eliseo okinmijlij on uejueyi tlayekankej:
—Xkitakan kenijki in rey temiktijketl yokuajtitlan yakaj ma nechtsontekilikij notsontekon. Pero kuajli xkakikan, niman ijkuak yejkos on yejuan okuajtitlan, xtsakuakan on tsakuijlotl niman kuajli xtilinikan ipan, pampa ikuitlapan yejua kakisti uajchojcholojtiu iteko.
33 Sanken tlajtojtikatka iminuan, ijkuak on rey oajsik itech Eliseo niman okijtoj:
—Pampa in tlajtlamach* temojtij techajtitlanilia toTEKO, ¿tline más nikchas toTEKO ika yejua techpaleuis?