Onochiu sen milagro de iaceite on siuakaualtsintli
4
Se tonajli sen siuakaualtsintli, yejuan isiuau katka semej on tiotlajtojkej oyaj niman ijkin, okijlito Eliseo:—Noueuentsin yejuan motekitkau yomik, niman tejua tikmati ika yejua kitlakaitaya toTEKO. Aman on tlakatl yejuan noueuentsin kuikiliaya, youajlaj niman kineki kinuikas nochimej omemej nokoneuan ken esclavos 2 Eliseo okitlajtoltij:
—¿Tlinon uelis nikchiuas mopampa? Xnechijli tlinon tikpiya mochan.
Yejua okinankilij:
—Nejua nimotekitkau xitlaj* nikpiya nochan, yej san sen kontsintli ikan aceite de oliva.
3 Kemaj Eliseo okijlij:
—Aman tej, xuiya niman xkintlajtlanili monisiuchanejkauan ma mitstlanejtikan kontsitsimej yejuan xitlaj* kipiya. Xkintlajtlanili kontsitsimej nochi kech uelis mitstlanejtiskej. 4 Kemaj xkalaki mochan iuan mokoneuan, xtlatsakuakan niman xkintetentiu ikan aceite nochi on kontsitsimej. Niman ijkuak se yoten, oksekan xkintlalijtiakan.
5 On siuatl ononauatij iuan Eliseo, niman ijkuak okisentlalij miyek kontsitsimej, okalak ichan iuan ikoneuan, niman okitsaku itsakuijlou. Kemaj opeu kintentiu on kontsitsimej yejuan ikoneuan kiktilijtiayaj. 6 Niman ijkuak nochimej on kontsitsimej yotetenkej, okijlij se ikoneu:
—Xnechinuajkuili oksekimej kontsitsimej más.
Pero ikoneu okinankilij:
—Xokuitlaj más kontsitsimej.
Kemaj on aceite xok otoyau. 7 Sakin on siuatl oyaj niman okitlajtlajtouilij on tiotlajtojketl, niman yejua okijlij:
—Aman xuiya xnamakati on aceite, niman xtlaxtlaua tlen tikteuikilia. Ika on seki yejuan nokauas nemopanoltiskej tejua niman mokoneuan.
Eliseo niman on siuatl yejuan ualeua Sunem
8 Se tonajli ijkuak Eliseo opanok ne Sunem, sen siuatl yejuan ueyixtikaj yejuan ompa chantiya okijlij ikan paktli para ma tlakuati. Niman kemaj nochipa ijkuak Eliseo ompaka panouaya, nokauaya para tlakuaya ichan. 9 Se tonajli on siuatl okijlij iueuentsin:
—Xkita, nejua nikmati ika in tlakatl yejuan nochipa techajnotsa ijkuak uajlau, yejua sen iyektiotlajtojkau Dios. 10 Ma tikchijchiuakan tlapani ipan tokal sen kaltsintli para yejua. Ompa tiueliskej tiktlaliliskej tlapechtli, tiktlaliskej kampa tlakuas, kampa noseuis niman sen tlauijli. Ijki, ijkuak yejua uajlas techajnotsas, ompa uelis nokauas.
11 Se tonajli ijkuak Eliseo oajsik ne Sunem niman otlejkok ipan on kaltsintli para ompa kochis, 12 okijlij Giezi, on itlapaleuijkau:
—Xkonnotsa on siuatl sunamita.
On itlapaleuijkau okonnots. On siuatl ouajlaj, pero xokalak ipan ikalijtik Eliseo. 13 Kemaj Eliseo okinauatij itlapaleuijkau:
—Xtlajtolti on siuatl yejuan sanoyej kuajli techselia, tla uelis tikchiuaskej itlaj ipampa yejua. Tla kineki, tiknotsaskej on rey itechkopa noso on isoldadojtlayekankau.
Ijkuak itlapaleuijkau Eliseo okitlajtoltij, on siuatl okinankilij:
—Nejua kuajli ninemi nikan intech nochanejkauan.
14 Eliseo okitlajtoltij Giezi:
—Tla ijkon ¿tlinon uelis tikchiuaskej ipampa yejua?
Giezi okinankilij:
—Xnikmati. Xkipiya ikoneuan, niman iueuentsin* sanoyej yeueuentsin.
15 Eliseo okijtoj:
—Xkonnotsa.
On itlapaleuijkau oyaj okinotsato, pero yejua onokau ijkatikatka itech on tsakuijlotl. 16 Kemaj Eliseo okijlij:
—De nikan ipan se xipan ken aman in, tikpiyas sen mokonetsin yejuan tiknapalos.
Yejua okinankilij:
—Ka noteko yejuan tiitekitkau Dios. Maka xnechkajkayaua nejua nimotekitkau.
17 Pero ijkon ken Eliseo okijlij, yejua okan ikonetsin niman ipan on okse xipan, okitlakatilij se itlakakonetsin. 18 Niman on konetl onoskaltij. Pero se tonajli ijkuak okis okitato itataj kampa nemiya iuan itlakeualuan yejuan pixkayaj, 19 opeu kitsajtsilia itataj. Niman ijkin kijtouaya:
—¡Ay, notsontekon! ¡Nechkokoua notsontekon!
Kemaj itataj okijlij sen itlakeual:
—Xkuika itech inanaj.
20 On tlakeuajli okinapaloj niman okuikak kampa nemiya inanaj yejuan okitlalij ipan iteteponuan hasta tlakualispan. Kemaj on konetl omik. 21 Kemaj on siuatl okitlejkoltij ikoneu ipan on kaltsintli de on tiotlajtojketl, okitekak ipan itlapech niman okis. Niman ijkuak okajteu, okitsaku on tsakuijlotl. 22 Kemaj okonnots iueuentsin* niman okijlij:
—Xnechajtitlanili sen tlakeuajli iuan sen poloko, para nejua nias nikontas on tiotlajtojketl. Kemaj nimantsin ninokuepas.
23 Iueuentsin okitlajtoltij:
—¿Tline tikontas aman? Aman xyenkuik metstli nion xejua on tonajli sábado.
Yejua okinankilij:
—Maka xmotenmati.
24 Niman otlanauatij ma kisiyajtilikan on poloko, niman okijlij itlakeual:
—Tiauij, xyakatstiu. Niman maka kanaj timoteltis, hasta nejua nimitsijlis ijkuak timoteltis.
25 Ijki yejua oyaj niman oajsik ipan on tepetl Carmelo, kampa nemiya on tiotlajtojketl. Ijkuak Eliseo okitak uajlau uejka, okijlij Giezi, itlapaleuijkau:
—Xkita on siuatl sunamita. 26 Xmotlalo xnamikiti niman xtlajtolti kenijki nemi, niman kenijki nemi iueuentsin* niman ikoneu.
On itlapaleuijkau oyaj, niman on siuatl okijlij ika nochimej kuajli nemij. 27 Kemaj oajsik ipan on tepetl kampa nemiya Eliseo, niman okinnapaloj ikxiuan Eliseo. Giezi okinisiuij para kejkuanis, pero Eliseo okinauatij:
—Xkaua, pampa sanoyej najmana, niman hasta aman toTEKO xnechijlia tlinon ipan nochiua.
28 Kemaj on siuatl okijlij:
—Noteko, ¿tlen onimitstlajtlanilij ma nikpiya nokoneu? Onimitstlajtlanilij ika maka xnechkajkayaua.
29 Kemaj Eliseo okijlij Giezi:
—Amanaman, xkui nobastón niman isijkapan xuiya kampa yomik on tlakakonetl. Tla yakaj tiknamiki, maka xtlajpalo, niman tla yakaj mitstlajpaloua, maka xnankili. Xuiya amanaman niman kemaj xtlali nobastón ixko on konetl.
30 Inanaj on konetl okijlij Eliseo:
—Ijkon ken melauak nemi toTEKO niman tejua tinemi, nejua xnias noselti. Yej nimitsuikas.
Kemaj Eliseo oyaj iuan. 31 Chika ijkuakon, Giezi yoyakatstiajka niman yokitlalijka on bastón ipan ixayak on konetl, pero yejua nion achijtsin xnesiya tla yoltikaj; ijki tej Giezi oyaj okinamikito Eliseo niman okijlij:
—On konetl xtlacha.
32 Ijkuak Eliseo okalak ipan on kajli, on konetl yomikka, onoya ipan on tlapechtli. 33 Kemaj okalak, niman ijkuak yokitsaku on tsakuijlotl opeu kichiua oración para toTEKO. San yejua niman on konetl nemiyaj ipan on kalijtik. 34 Kemaj otlejkok ipan on tlapechtli niman ijkin ipan onixakaman on telpokakonetl, ikamak okitlalij ipan ikamak, imauan ipan imauan, ixtololojuan ipan ixtololojuan. Ijkuak ijkon okichiu, itlalnakayo on tlakakonetl opeu xotla. 35 Eliseo onokuiteu niman opeu nejnentinemi nochiuiyan ipan on kalijtik. Kemaj oksejpa otlejkok ipan on tlapechtli niman oksejpa onotekak ipan on konetl. Kemaj on konetl oyekxoj chikomepa, niman okintlapoj ixtololojuan. 36 Eliseo okonnots Giezi niman okijlij:
—Xkonnotsa on siuatl sunamita.
Giezi ijki okichiu, niman ijkuak on siuatl oajsik kampa nemiya Eliseo, yejua okijlij:
—Nikan tikpiya mokoneu.
37 On siuatl okinisiuij niman onotlajkal ikxitlan Eliseo, niman onopachoj hasta ipan tlajli. Kemaj okonan ikoneu niman okis ipan on kalijtik.
Onochiu milagro de on tlakuajli
38 Más sakin*, Eliseo onokuep ne Gilgal. Ipan on tonaltin sanoyej oonyak mayantli ipan on región. Niman se tonajli ijkuak on tiotlajtojkej nemiyaj yejyeuatikatkaj iyeualkan Eliseo, Eliseo okijlij itlapaleuijkau:
—Xkontlali sen ueyi kontli ipan tlitl, niman xchijchiua sen tlakuajli para in tiotlajtojkej.
39 Se de yejuamej oyaj ipan campo okuito keski kijli. Okinextij sen kuamekatl* niman okitejtekilij itlakyo yejuan nesiya ken ayojtli yejuan onkaj ipan campo. Okitemiltij icapa ika on tlakyotl. Ijkuak onokuep, okitejtek niman okonxinij ijtik on tlakuajli yejuan onkaj ipan on kontli maski nion xkimatiya tlinon katka. 40 Sakin okintlamakakej on tiotlajtojkej, niman ijkuak opeu kikuaj on tlakuajli, yejuamej otsajtsikej:
—¡Tiotlajtojketl, in tlakuajli kipiya veneno!
—Xnechajkuilikan achijtsin harina.
Niman ijkuak yokonxinij on harina ijtik on kontli, otlanauatij:
—¡Aman xkinmakakan in tlakuajli nochimej in nikan nemij! Niman nochi tlakatl otlakuaj, niman ijtik on kontli nochi on tlakuajli xok kipiyaya veneno.
Eliseo okintlakualtij on tiotlajtojkej
42 Sakin oajsik sen tlakatl de Baal-salisa. Yejua okiktilij Eliseo 20 panes de cebada yejuan kemach okikxitij, niman trigo yenkuik yejuan achtoj otlak. Kemaj Eliseo okinauatij itlapaleuijkau:
—Xkinmaka on tiotlajtojkej para ma tlakuakan.
43 Pero on itlapaleuijkau okinankilij:
—¿Tiknemilia ika in kinmaxilis on 100 tlakamej?
Niman Eliseo okinankilij:
—Xkinmaka on tlakamej para ma tlakuakan, pampa toTEKO yokijtoj ika tlakuaskej niman on tlakuajli kajxilis, hasta seki nokauas.
44 Ijkon tej, on tlapaleuijketl okintlamakak, niman nochimej otlakuajkej, niman oonyak *seki tlakajuijli, ken toTEKO okijtoj.