David okikuaasaitijuijkej para rey
16
Kemaj toTEKO okijlij Samuel:—¿Hasta kamanon timajmantias ipampa Saúl? Nejua yonikixtij ken rey itech Israel. Xtemilti sen kuakuautli ikan aceite. Nikneki xuiya ichan Isaí yejuan chanti Belén, pampa yoniktlapejpenij sen ikoneu para yejua rey yes.
2 Samuel okitlajtoltij toTEKO:
—¿Kenijki nikchiuas para nias? Tla Saúl kimatis ika oniaj ompa, nechmiktis.
Niman toTEKO okinankilij:
—Xkuika sen becerrita niman xkijto ika tiau tikonmakas uentli moTEKO. 3 Kemaj tiktekuitlanis Isaí ma uiya kampa tiktlatis on uentli niman nejua nimitsijlis tlinon tikchiuas. Kemaj nimitsititis katlejua ikoneu tikuatêkis ikan aceite para tikalaktis rey.
4 Samuel okichiu ken toTEKO okijlij. Niman ijkuak oajsik Belén, on uejueyixtokej tlayekankej ipan on kalpan okiskej okinamikitoj achi ikan nemojtijli, niman okijlijkej:
—¿Tiuajlau ika kuajlotika?
5 Samuel okinnankijlij:
—Kemaj, oniuajlaj onikmakako uentli toTEKO. Xmochipauakan itech toTEKO niman xuajlakan nouan para tikmakaskej uentli.
Kemaj Samuel okichipau Isaí iuan ikoneuan niman okinmijlij iuan ma uiyan ma kimakatij uentli toTEKO. 6 Ijkuak oajsikej, Samuel okitak Eliab niman ijkin okinemilij: "Niman nesi ika in tlakatl yejua yokitlapejpenij toTEKO para yejua rey yes".
7 Pero toTEKO okijlij Samuel: "Maka xkitili ikualtsintlachalis sen tlakatl, nion pampa tla ueyi tlakatl. In telpochtli xejua yejuan nejua yoniktlapejpenij. Nejua xnikita on tlen tlakamej kitaj. On tlakamej san kitaj itlachalis sen tlakatl, yejua ika nixkajkayauaj, pero nejua nikita iyojlo."
8 Kemaj Isaí okonots Abinadab niman okuikak ixpan Samuel, pero Samuel okijtoj:
—In no xejua yejuan yokitlapejpenij toTEKO.
9 Kemaj Isaí okuikak Sama ixpan Samuel niman Samuel okijtoj:
—Ka, in no xejua yejuan yokitlapejpenij toTEKO.
10 Niman Isaí okimpanoltij chikomemej itelpochuan ixpan Samuel, pero Samuel okijlij Isaí ika nion semej xyejuamej yejuan okitlapejpeni toTEKO. 11 Kemaj Samuel okitlajtoltij Isaí:
—¿Xtikimpiya más motelpochuan?
Isaí okinankilij:
—Poliui se yejuan más konetl, on yejuan tlajpiya ikan borregos.
Samuel okijlij Isaí:
—Xtekuitlani ma kanatij, pampa xuelis titlakuaskej tla yejua xuajlau.
12 Isaí nimantsin okitekuitlan. In telpochtli tsonchijchilatikatka, niman ixtololojuan kualtsitsimej katkaj niman kualtsin tlajtlachaya. Kemaj toTEKO okijlij Samuel:
—In yejua yejuan yoniktlapejpeni. Xkuatêki ikan aceite niman xkalakti rey.
13 Kemaj Samuel okonkuik on kuakuautli yejuan kipiya aceite, niman imixpan nochimej ikniuan, okikuatêkij David ika aceite, niman ijkon okitiochiu ken rey. Niman ipan on tonajli iespíritu Dios ouajlaj ikan ueyi poder ipan David. Kemaj Samuel onokuep ichan ipan on kalpan Ramá.
David otekit itech on rey Saúl
14 Iespíritu Dios okitlalkauij Saúl, niman sen xkuajli espíritu ouajlaj ipan Saúl yejuan toTEKO okuajtitlanilij, niman on espíritu kitlajyouiltiaya Saúl. 15 Yejua ika, itlakeualuan Saúl kijliayaj:
—Tikpiya sen xkuajli espíritu yejuan Dios omitsajtitlanilij. 16 Aman tej, xtechkauili ma timitstejtemouilikan yakaj yejuan ueli kitsotsona arpa, para ijkon ijkuak uajlas on espíritu yejuan xkuajli niman mitstlajyouiltis, yejua kitsotsonas on arpa niman kuajli tikmatis.
17 Saúl okinnankilij itlakeualuan:
—Kuajli, xtejtemokan yakaj yejuan ueli kuajli tlatsotsona niman xnechajuikilikan.
18 Niman se itekitkau okijtoj:
—Nejua onikitak se itelpoch Isaí yejuan chanti Belén ueli kualtsin tlatsotsona. Yejua ueli tlauijsoki nion xmojki niman kuajli tlajtlajtoua, kualtsin tlajtlacha, niman toTEKO nemi iuan.
19 Kemaj Saúl okintitlan tlajtojkamej para ma kijlitij Isaí: "Xnechajtitlanili mokoneu David yejuan kintlajpiya borregos", 20 niman Isaí okititlan David, ikoneu. No okititlan sen poloko* yejuan okitlamamaltij ikan pan, niman sen kuetlaxtekomatl tentiaya ikan vino niman sen chivito. 21 Ijkon oajsik David itech Saúl niman onochiu ken sen tekitketl, niman Saúl opeu sanoyej kitlajsojtla. Yejua ika, okalaktij teuan itlapaleuijkau para kiktiya itepos. 22 Kemaj Saúl otlatitlan ma kijlitij Isaí para ma kauili David ma nokaua iuan, pampa kipaktiaya. 23 Ijkon tej, ijkuak on xkuajli espíritu yejuan Dios kuajtitlaniliaya Saúl ipan kalakiya, David kontilanaya iarpa niman kitsotsonaya. Ika on tlatsotsonajli, Saúl kajsiya kuajli itlamachilis, niman kuajli kimatiya, niman on xkuajli espíritu kitlalkauiyaya.