ToTEKO kitlalkauiya Saúl
15
Se tonajli Samuel okijlij Saúl:—Ye uejkaui, ToTEKO onechajtitlan para onimitskalaktij ken rey para on país de Israel. Yejua ika, aman xkaki on tlen toTEKO kineki mitsijlis. 2 Ijkin kijtoua toTEKO yejuan kipiya nochi poder: “Nikincastigaros on amalecitas ipampa on tlen okinchiuilijkej on israelitas ijkuak xokinkauilijkej ma panokan ipan imintlal ijkuak oualejkej ipan on tlajli Egipto. 3 Yejua ika, xuiya niman xkinmiktiti nochimej on amalecitas. Xkinxoxotoniliti nochi on tlen kipiyaj. Maka xkinmikneli, yej xkinmikti nochimej on tlakamej, siuamej, kokonej, niman yejuan kemach otlakatkej. No xkinmiktikan on uakaxtin, borregos, camellos niman polokomej*”.
4 Kemaj Saúl okinsentlalij nochimej on soldados israelitas ne Telaim. Ompa okipojkej 200 mil soldados yejuan ueleuayaj Israel niman yejuan iminikxipan yayaj, niman 10 mil yejuan ueleuayaj Judá. 5 Sakin Saúl iuan isoldados onojuitlalij para oyajkej ipan on iueyikalpan Amalec, niman oniyankej itejtenko on atlajko itech on ayajtok. 6 Niman Saúl okinmijlij on quenitas tlakamej:
—¡Xmoxelokan intech on amalecitas niman xkisakan nikan ipan iminkalpan para maka nenmikiskej iminuan, pampa nemejuamej xonenkintlauelitakej on israelitas ijkuak oualejkej Egipto!
Ijkon tej, on quenitas okintlalkauijkej on amalecitas. 7 Kemaj Saúl opeu kinuijsoki on amalecitas desde Havila hasta ikalakiyan Shur yejuan onkatka ikisayan tonaltsintli itech on tlajli Egipto. Niman okintlan. 8 On rey Agag, iminrey on amalecitas, okajsikej, pero xokimiktikej. Pero nochimej on amalecitas okinmiktijkej. 9 Pero Saúl niman isoldados xokimiktijkej Agag, niman no xokinmiktijkej on yejuan más kualtsitsimej borregos, uakaxtin, on becerros yejuan uejueyimej nion on borregitos. Niman no, xokixoxotonijkej on tlajtlamach* yejuan patioj, pero on yejuan xpatioj noso xok kuajli, nochi okixoxotonijkej.
10 Kemaj toTEKO okinots Samuel, niman okijlij:
11 —Nechajmana ika oniktlalij Saúl ken rey, pampa yejua yonechtlalkauij niman xnechtlakamati ika on tlen niknauatia.
Samuel sanoyej onokuapajsoloj niman nochi se yeuajli onoueyikatsajtsilij itech toTEKO. 12 Uajmostla Samuel saniman oyaj okitejtemoto Saúl. Pero yakaj okijlij ika Saúl oyaj Carmel, niman ompa okinochijchiuilij sen ixneskayo yejua, ikan tetl. Kemaj oyaj hasta Gilgal. 13 Kemaj ijkuak Samuel oyaj kampa nemiya Saúl, Saúl ijkin okijlij:
—ToTEKO, ma mitstiochiua. Nejua yonikchiu tlen toTEKO otlanauatij.
14 Niman Samuel okinankilij:
—¿Tla ijkon, tline nikaki tsajtsij on borregos niman uakaxtin?
15 Kemaj Saúl okinankilij:
—On yolkej yejuan nosoldados okinuajuikakej okinkuilijkej on amalecitas. Yejuamej okinkajkej on más kuajkualtin borregos niman yejuan más tojtomajkej uakaxtin para kimakaskej uentli moTEKO Dios. Pero nochimej on oksekimej yolkej okinmimiktijkej.
16 Samuel okinankijlij:
—¡Maka xnauati, amantsin nimitsijlis tlen onechijlij toTEKO ipan in tlayoua!
Saúl okinankilij:
—Xnechijli.
17 Niman Samuel okijlij:
—¿Tlen xtejua tikijtouaya ika xtiueyixtikaj? Pero toTEKO omitstlalij sanoyej ueyixtikaj rey para nochimej on tribus israelitas. 18 Yejua ika tej, tla toTEKO omitsnauitij tikinmiktis nochimej on tlajtlakolejkej amalecitas niman tikinuijsokis hasta kaman tlami tikinmiktia, 19 ¿Tline xotiktlakamat itlanauatil, niman yej otikuik on tlajtlamach* yejuan iminyaxka on motlauelikniuan? On tlen otikchiu sanoyej xkuajli ixpan toTEKO.
20 Kemaj Saúl okinankilij:
—Nejua onikchiu on tlen toTEKO onechnauatij. Oniaj kampa yejua onechtitlan, niman onikajsik niman onikuikak Agag iminrey on amalecitas. Niman otlan nikinmiktia on oksekimej amalecitas. 21 Pero on soldados israelitas okimankej on borregos niman uakaxtin yejuan más kuajkualtin para kimakaskej uentli moTEKO Dios ne Gilgal.
Samuel okixkomakak itlajtlakol Saúl
22 Kemaj Samuel okijtoj:
ToTEKO más kipaktia tla kitlakamatij,
xken tla kinmiktiliaj yolkej
niman kimakaj uentli yejuan tlatla.
Más kuajli tla kitlakamatij niman tla kakij itlanauatil,
xken tla kimakaj uentli yejuan tlatla
niman kimakaj inchajka on borregos.
23 Sen tlakatl tla xkitlakamati toTEKO,
no ijki tlajtlakoua ken se yejuan tetlatejtemouilia.
Niman sen tlakatl yejuan noueyimati
no ijki tlajtlakoua ken yejuan kimauistilia ídolos.
Niman pampa tejua xotiknek otiktlakamat itlanauatiluan toTEKO,
yejua mitstlalkauiya niman xok tirey yes.
24 Kemaj Saúl okijlij Samuel:
—Kemaj, onitlajtlakoj pampa xoniktlakamat itlanauatiluan niman tejua no xonimitstlakamat tlen otinechnauatij. Ijkon onikchiu pampa onikinmakas on tlakamej niman onikchiu on tlen yejuamej onechtlajtlanijkej. 25 Aman nimitstlajtlanilia, xnechtlapojpoluili notlajtlakol niman xmokuepa nouan para nikmauistilis toTEKO.
26 Pero Samuel okinankilij:
—Nejua xninokuepas mouan pampa tejua xotiktlakamat itlanauatiluan toTEKO niman aman yejua mitskixtia ken rey itech Israel.
27 Ijkuak Samuel onokuep para kitlalkauiskia Saúl, Saúl okajsik itenko icapa, niman on icapa otetsayan. 28 Kemaj Samuel okijlij Saúl:
—Ijkin ken otetsayan nocapa, toTEKO no ijki yokitsayan moreino itech Israel aman in tonajli. Yomitskuilij para kimaktilis sen mochanejkau yejuan más kuajli tlakatl xken tejua. 29 Dios yejuan iueyilis Israel, xtlakajkayaua nion xnotlajtolpatla pampa yejua xnemi ken sen tlakatl yejuan noyolpatla.
30 Kemaj Saúl oksejpa okijtoj:
—Nejua yonitlajtlakoj, pero nimitstlajtlanilia sanken* xnechtlakaita ken rey inmixpan in yejuan uejueyixtokej tlayekankej niman imixpan nochimej on israelitas. Ma titokuepakan, tiauij para nikonmauistilis moTEKO Dios.
—Xnechajuikilikan Agag on iminrey on amalecitas.
—Ikan moespada otikinmiktij miyekej tlakamej, niman iminnanaj otikinkau inseltimej ken xkaman kinpiyaskiaj iminkoneuan. Aman tej, monanaj no ijki nokauas.