24
Ijkuak Balaam okajsikamat ika toTEKO kuelitaya ika yejua kintiochiua on israelitas,
xok oyaj okichiuato tetlatejtemoualistli ken achtoj yokichijka.
Yej,
san ontlachix melajki ipan on xalpatlajkan kampa nemiyaj on israelitas.
2 Niman ijkuak Balaam ontlachix niman okomintak on israelitas ika chantij xexelijtokej por tribus*,
iespíritu Dios ouajlaj ipan Balaam.
3 Kemaj Balaam okijtoj in tiotlajtojli:
“Nejua Balaam,
itelpoch Beor,
nimitsijlia yejua in tiotlajtojli.
Nejua nisentlakatl yejuan ueli nikita kuajli on tlen impan nochiuas on israelitas.
4 Nejua nikaki itlajtoltsin Dios.
In Dios kipiya nochi poder,
niman nechititia tlatlachalistli ken temikpan.
Niman ijkuak ninotlakuantelketsa ixpan,
yejua nechintlapouilia nixtololojuan.
5 ¡Jacob,
sanoyej kualtsitsimej nemokaluan!
¡Israel,
sanoyej kualtsin mocampamento!
6 Nikinta ken palmeras sesemantokej nochiuiyan ipan on ueyi ixtlauatl.
Nesi ken sen ueyi xochitlan itech sen río.
Nesi ken aloeskojtin yejuan toTEKO okintôkak.
Nesi ken miyek cedros yejuan tlatoktin atempan.
7 On israelitas kipiyaskej miyek atl,
para koniskej niman para katekiskej intlatok.
Iminrey más ueyixtias xken on rey Agag.
Niman ireino sanoyej ueyi yes.
8 Dios okinkixtij ipan on país Egipto.
Niman Israel kojtik ken on yolki itoka búfalo.
On israelitas kintlaniskej nochimej intlauelikniuan,
kinomiyotepojpostekiskej,
niman kinmiktiskej ika tlaminaltin.
9 Ijkuak notekaj para noseuiyaj,
nesij ken itlaj león
yejuan xakaj kineki kitlachaltis.
¡ToTEKO kintiochiuas yejuan mechtiochiuaskej,
niman kintlauelis nochimej yejuan mechtlaueliskej!”
10 Ijkuak on rey Balac okak on tlajtojli yejuan Balaam okijtoj,
sanoyej okualan itechkopa.
Kemaj onomatetlatsinijtiaj,
niman okijlij:
—Nejua onimitstekuitlan para xkintlaueliki notlauelikniuan,
niman tejua yej hasta yexpa yotikintiochiu.
11 ¡Más kuajli tla nimantsin tias mochan!
Nejua niknekiya nimitsmakas tlajtlamach* yejuan patioj,
pero moTEKO xonechkauilij ma nimitsmaka.
12 Kemaj Balaam okinankilij on rey Balac:
—Nejua onikinmijlij on motlakeualuan yejuan otikintitlan
13 ika maski tinechmakaskia nochi oro niman plata yejuan ika tentikaj mopalacio,
nejua ika onkaj niktlakamatiskia noTEKO.
Xniuelis nikchiuas san tlen nejua niknekis tla kuajli noso xkuajli.
Niman ika nikijtos san on tlen noTEKO nechnauatis ma nikijto.
14 Kuajli tla ijkon,
aman ninokuepas nochan,
pero achtoj nimitsijlis on tlen on israelitas kichiuiliskej mopaís más sakin*.
On sa ika nochi tiotlajtoltin de Balaam
15 Kemaj Balaam okijtoj in tiotlajtojli:
“Nejua Balaam,
itelpoch Beor,
nimitsijlia yejua in tiotlajtojli.
Nejua nisen tlakatl yejuan kuajli nikita on tlen impan nochiuas on israelitas.
16 Nejua nikaki itlajtoltsin Dios,
niman nikpiya tlamatkilistli yejuan kisa itech on yejuan Más Ueyixtika.
Nikita sen tlatlachalistli ken temikpan yejuan kisa itech on yejuan kipiya nochi poder.
Niman ijkuak ninotlakuantelketsa ixpan,
yejua nechintlapouilia nixtololojuan.
17 Nikita yakaj yejuan uajlas,
pero xamantsin,
yej sankin.
Yejua yes ken sen sitlalin yejuan kisas itech Jacob.
Yejua yes sen ueyi rey yejuan kisas intech on israelitas niman kinyekanas.
Kinkuatepaxos on itlayekankauan Moab,
niman kinmiktis nochimej iuejkakoneuan Set.
18 Yejua kinoyaxkatis* on país Edom
niman no kinoyaxkatis* Seir yejuan itlauelikniu.
On israelitas kichiuaskej sanoyej miyek tetlanilistin.
19 Sen rey kisas itech Jacob,
niman kinmiktis nochimej yejuan nokauaj ipan on ikalpanuan Edom.”
20 Kemaj ipan itlatlachalis ken temikpan Balaam,
okitak on nación de Amalec,
niman okijtoj in tiotlajtojli:
“Amalec sen nación yejuan ueyixtikaj,
pero nochi xoxotonis.”
21 No,
ipan itlatlachalis ken temikpan,
okintak on quenitas,
niman okijtoj in tiotlajtojli:
“Nemejuamej nennemij kampa xakaj mechpajsoloua
ken on totomej nemij ipan imintepajsol tlakpak ipan se teostotl.
22 Pero nemotepajsol mechxoxotoniliskej on soldados de Asiria,
niman mechuikaskej nensalijtiaskej.”
23 Kemaj Balaam okijtoj in tiotlajtojli:
“¡Ay!
¿Akinon sanken* nemis ijkuak Dios kichiuas in tlajtlamach*?
24 Uajlauij uejueyimej barcos yejuan ualeuaskej iatempan Chipre.
Yejuamej kitlaniskej Asiria niman Heber.
Pero sakin*,
Chipre no xoxotonis.”
25 Kemaj Balaam okis niman oyaj ichan.
Niman on rey Balac no oyaj ichan.