On israelitas okimauistilijkej Baal-peor
25
Ijkuak on israelitas chantiyaj Sitim,
sekimej tlakamej opejkej auilnemij iminuan on moabitas siuamej.
2 On moabitas siuamej kinnotsayaj ma uiyan inuan kampa kintlauentlaliliayaj imindioses.
Niman on tlakamej israelitas opejkej tlakuaj iminuan niman opeu kinueyiteneuaj imindioses on moabitas.
3 Ijkon okinokauilijkej ma kinuikakan ixpan on dios Baal-peor.
Kemaj toTEKO sanoyej okualanijkej on israelitas.
4 Niman toTEKO okijlij Moisés:
—Xkinsentlali nochimej intlayekankauan on israelitas niman xkinmaajkopilo nixpan nejua ijkuak tlajokaj para nochimej ma kintakan.
Ijkon seuis notlauel iminuan on israelitas.
5 Kemaj Moisés okinnautij on jueces israelitas,
niman okinmijlij:
—Cada se de nemejuamej xkinmiktikan on tlajkamej de nemotribu* yejuan okimauistilijkej on ídolo Baal-peor.
6 Chika Moisés niman nochimej on israelitas chokayaj ixpan toTEKO ne ikalakiyan on tabernáculo* kampa nemi Dios,
okitakej ika sen tlakatl yejuan xtetlakaitani okalaktito ichan sen siuatl madianita.
7 Ijkuak Finees,
itelpoch Eleazar,
ixuiu on tiopixki Aarón,
ijkon okitak,
okintlalkauij on israelitas yejuan chokayaj.
Okikuik sen espada,
8 niman okitokak on tlakatl israelita hasta ipan ikajkal kampa okuikak on siuatl.
Niman ompa okijtitsopinij on tlakatl iuan on siuatl.
Ijkon otlan on temojtij mikilistli intech on israelitas.
9 Pero on mikilistli yokinmiktika 24 mil israelitas.
10 Kemaj toTEKO okijlij Moisés:
11 —Finees,
itelpoch Eleazar,
ixuiu on tiopixki Aarón,
okichiu para ma seui notlauel intech on israelitas,
pampa yejua okitlajsojkaitak notetlakaitalis,
no ken nejua nikintlajsojkaita on israelitas.
Yejua ika tej,
san ipampa yejua,
xonikinmiktij nochimej on israelitas ken nikchiuasnekiya.
12 Yejua ika,
xkijli Finees ika aman nejua nikchiuas sen pacto* iuan yejua,
para nochipa nikpiyas yoltlalilistli iuan.
13 Niman no nikintlalis nochimej itelpochuan ken tiopixkej para nochipa,
pampa ikan itlauel okixtlajsojkaitak notetlakaitalis.
Niman ijkon okichiu para onikintlapojpoluij on israelitas.
14 On tlakatl israelita yejuan okitlajkotsopinijkej iuan on siuatl madianita,
itoka katka Zimri,
itelpoch katka Salú.
Salú tlayekanketl katka de sen familia ipan itribu* Simeón.
15 Niman on siuatl madianita itoka katka Cozbi yejuan ichpoch katka Zur,
sen tlayekanketl ipan sen tribu* ipan on país Madián.
16 ToTEKO okijlij Moisés:
17 —Xkinuijsokikan on madianitas niman tlami xkinmiktikan,
18 pampa yejuamej omechitakej ken intlauelikniuan ijkuak ika miyek tlajtlamach* omechkajkayajkej para xmauistilikan on imindios Baal-peor.
Niman no mechkajkayauasnekiyaj ijkuak ouajlaj Cozbi,
ichpoch on tlayekanketl de Madián,
yejuan okimiktijkej ika sen espada ijkuak nejua onikinuajtitlanilij on temojti mikilistli pampa okimauistilijkej on dios Baal-peor.