23
Kemaj Balaam okijlij on rey Balac:
—Xnechchijchiuili nikan chikome tlaixpan*,
niman xnechinuajuikili chikome becerros niman chikome borregos.
2 On rey Balac okichiu on tlen Balaam okinauatij.
Niman san sekan yejuamej okiuentlalijkej sen becerro niman sen borrego ipan cada tlaixpan*.
3 Kemaj Balaam okijlij Balac:
—Xmokaua nikan itech in uentli yejuan tlatla,
niman nejua nias nikitas tla toTEKO nechajnamikis.
Kemaj nimitsijlis on tlen yejua nechijlis.
Balaam okintiochiu on israelitas
Niman Balaam oyaj ikuapan sen tepetsintli kampa xkojyoj,
4 niman ompa Dios ononextij itech,
niman Balaam okijlij:
—Nejua yoniktlalij chikome tlaixpan*,
niman ipan cada tlaixpan* onimitsuentlalilij sen becerro niman sen borrego.
5 Kemaj toTEKO okijlij Balaam on tlajtojli yejuan kinekiya ma kijli on rey Balac.
Niman kemaj okijlij:
—Xmokuepa ne kampa nemi on rey Balac,
niman xkijli on tlen nejua yonimitsijlij.
6 Balaam onokuep,
niman okinextijtajsik on rey Balac ijkaya nisiu itech on uentli yejuan okitlalij.
Nemiya iminuan nochimej on tlayekankej de on país Moab.
7 Kemaj Balaam okijtoj in tiotlajtojli:
“Oniualeu desde on tepemej ipan on país Aram kampaka ikisayan tonaltsintli.
On rey Balac onechchiualtij ma niuajla nikan ipan in país Moab.
Onechijlij:
‘Xuajla,
xkintlaueliki on israelitas.’
Xkinnekili impan ma uajla nochi tlen xkuajli’
8 Pero,
¿kenijki nikintlauelis yejuan Dios xkintlauelia?
¿Kenijki nejua nikinnekilis tlen xkuajli tla noTEKO xkichiua?
9 Desde nikan ikuapan in uejueyitepemej ueli nikita.
Desde nikan ikuapan in tlamimijli nikinta.
Nesi ika on sen nación yejuan xteuan noneloua.
Niman nesi ika on nación oksekneka.
10 Yejuamej sanoyej miyekej ken itlaj tlalteutli.
¿Akinon uelis kimpouas?
¿Akinon uelis kimatis keskimej nemij?
Niknekiskia nimikiskia ken on yejuan yolmelajkej,
niman nitlamiskia ken yejuamej.”
11 Kemaj on rey Balac okitlauelijlij Balaam:
—¿Tlinon yotinechchiuilij?
¡Nejua onimitsajuikak para xkintlaueliki notlauelikniuan,
niman tejua yej tikintiochijtikaj!
12 Niman Balaam okinankilij:
—Yotitokajkaj ika san nikijtos on tlen noTEKO nechijlis.
13 Pero on rey Balac oksejpa okijlij Balaam:
—Xuajla nouan,
niman ma tiuiyan oksekan kampa uelis tikitas maski san se parte incampamento on israelitas,
niman ompa uelis tikintlauelis.
14 Niman on rey Balac okuikak Balaam ne mijlaj kampa itoka Zofim ne ikuapan on tepetl Pisga.
Niman ompa okichijchiu chikome tlaixpan* niman okiuentlalij sen becerro niman sen borrego ipan cada tlaixpan*.
15 Ompa Balaam okijlij on rey Balac:
—Xmokaua nikan itech in uentli yejuan tlatla chika nejua ninonamikis iuan Dios.
16 ToTEKO okinamikiko Balaam niman okijlij on tlajtojli yejuan kinekiya ma kijli on rey Balac.
Niman kemaj okijlij:
—Xmokuepa ne kampa nemi on rey Balac niman xkijli on tlen nejua yonimitsijlij.
17 Balaam onokuep niman okinextijtasik Balac ijkaya itech on uentli yejuan tlatla,
iminuan on tlayekankej moabitas.
Niman on rey Balac okitlajtoltij:
—¿Tlinon omitsijlij moTEKO?
18 Kemaj Balaam okijtoj in tiotlajtojli:
“¡Rey Balac,
itelpoch Zipor,
kuajli xnechkaki!
19 Dios xsen tlaltikpaktlakatl para istlakatis.
Nion xnotlajtolkuekuepa kenon tlaltikpaktlakamej.
Ijkuak kijtoua itlaj kichiuas,
kichiua.
Ijkuak itlaj kiprometeroua,
melauak kitemaka.
20 Onechnauatij ma nikintiochiua on israelitas.
Tla Dios kintiochiua,
nejua xuelis nikijlis maka ma kintiochiua.
21 NoTEKO xkinextia tlakajkayaualistli,
nion tlajtlakojli intech on israelitas yejuan iuejkakoneuan Jacob.
NoTEKO yejuan iminDios,
nemi iminuan yejuamej,
niman yejuamej kiteneuaj iminrey.
22 Dios,
akin okinkixtij on israelitas ipan on país Egipto,
yejua nochiua iminpoder kenon ueyi yolki itoka búfalo.
23 Xakaj uelis kintlauelis in iuejkakoneuan Jacob.
In israelitas xitlaj* uelis kinchiuilis sen nauajli.
Ijkin nijtoua:
‘¡Xkitakan ken miyek tlajtlamach* tlen kualtsin Dios yokichiu nemouan!’
24 On israelitas najkomanaj para tetlaniskej
ken sen tepeyolki tekuani yejuan xnoteltia
hasta kaman kikua on tlen kineki kikuas,
niman konilia iyesyo on tlen yokimiktij.”
25 Kemaj on rey Balac okijlij Balaam:
—Tla xuelis tikintlauelis,
no maka xkintiochiua.
26 Pero Balaam okinankilij:
¿Tlen xonimitsijlij ika nejua san uelis nikchiuas on tlen noTEKO nechijlis?
27 Kemaj on rey Balac okijlij:
—Xuajla nouan niman nimitsuikas oksekan.
Manin,
Dios mitskauilis desde ompa xkintlaueli on israelitas.
28 Niman Balac okuikak Balaam hasta ikuapan on ueyi tepetl itoka Peor kampa kuajli nesiya nochi on xalpatlajkan.
29 Ompa Balaam okijlij on rey Balac:
—Xnechchijchiuili nikan chikome tlaixpan*,
niman xnechinuajuikili chikome becerros niman chikome borregos.
30 On rey Balac okichiu nochi ken okinauatij Balaam.
Niman ipan cada tlaixpan* okiuentlalij sen becerro niman sen borrego.