Balac otlatitlan ma kinotsatij Balaam
22
On israelitas oyajkej niman onochachantijkej ipan on ixtlauatl de Moab,
kampaka ikijsayan tonaltsintli de on río Jordán,
imelajkan Jericó.
2 On rey Balac,
ikoneu Zipor,
okitak nochi on tlen on israelitas okinchiuilijkej on amorreos niman onomojtij.
3 On moabitas no sanoyej onomojtijkej ijkuak okimatkej ika on israelitas sanoyej miyekej katkaj.
4 On moabitas okinnotskej on uejueyixtokej tlayekankej de Madián niman okinmijlijkej:
“In tojlanmej israelitas kitlamiskej on tlen onkaj ipan totlal,
ken sen uakax kitlamiya sakatl ipan mijlaj.”
Ipan on tonaltin Balac rey katka ipan on país Moab,
5 niman okitekuitlan Balaam,
ikoneu Beor.
Balaam chantiya ipan on ueyikalpan Petor,
nisiu itech on río Éufrates,
ipan on País de Amav.
Balac okinnauatij itlajtojkauan ijkin ma kijlikan Balaam:
“Youajlaj sen ueyi nación yejuan oualeu ipan on país Egipto.
Yejuamej kuajtlapachojtiuij nochi on ueyitlalpan,
niman aman yonochachantikoj nikan ixpan nopaís.
6 Xuajla amanaman,
niman xkintlaueliki in tlakamej por nejua,
pampa yejuamej más kojtikej xken tejuamej.
Ijkon nikitas tla uelis nikintlanis niman nikinkixtis ipan nopaís.
Nejua kuajli nikmati ika ijkuak tejua tiktiochiua yakaj,
sanoyej kiselia tlatiochiualistli,
niman ijkuak tiktlauelia yakaj,
kiselia tlauelijli.”
7 On uejueyitlayekankej de Moab niman de Madián,
oyajkej okiktikej tomin para kitlaxtlauaskej on tlauelijli.
Niman ijkuak oasikej itech Balaam,
okijlijkej nochi on tlen Balac okinmijlij ma kijlikan.
8 Niman Balaam okinmijlij:
—Xmokauakan nikan in tlayoua,
niman mostla nemechijlis on tlen noTEKO nechijlis ma nikchiua.
Yejua ika,
on uejuejixtokej tlayekankej moabitas onokajkej on tlayoua iuan Balaam.
9 Dios okinotitij Balaam,
niman ijkin okitlajtoltij:
—¿Akinomej on tlakamej yejuan nemij mouan?
10 Balaam okinankilij:
—Balac,
ikoneu Zipor yejuan rey ipan on país Moab,
okinuajtitlan para ma nechijlikij
11 ika sanoyej miyek tlakatl oualeu Egipto,
niman yokitemiltijkej iueyitlalpan.
Balac kineki ma niuiya amanaman ma nikintlaueliti on tlakamej para kitas tla ijki uelis kintlanis niman kinkixtis ipan iueyitlalpan.
12 Kemaj Dios okijlij Balaam:
—Maka xuiya iminuan,
nion maka xkintlaueliti on tlakamej,
pampa nejua yonikintiochiu.
13 Uajmostla kualkan Balaam onokuiteu niman okinmijlij on uejueyitlayekankej yejuan Balac okintitlan:
—Xmokuepakan ipan nemotlal,
toTEKO xnechkauilia ma niuiya nemouan.
14 On uejueyitlayekankej de Moab onokuepkej kampa nemi Balac,
niman okijlijkej:
—Balaam xokinek ouajlaj touan.
15 Kemaj Balac oksejpa okintitlan oksekimej tlayekankej más miyekej,
niman yejuan más kipiyaj tetlakaitalistli xken on yejuan achtoj oyajkaj.
16 Yejuamej oyajkej okitatoj Balaam niman okijlijkej:
—Balac,
ikoneu Zipor ijkin mitsijlia:
“Nimitsyemankatlajtlanilia,
maka xmoneneki tiuajlas.
17 Nejua nimitsmakas ueyi tetlakaitalistli niman nimitsmakas nochi tlen tinechtlajtlanilis.
Nimitsyemankatlajtlanilia,
xuajla niman xkintlaueliki in tlakamej.”
18 Pero Balaam okinnankilij:
—Maski Balac nechmakaskia nochi on oro niman plata yejuan ika tentikaj ipalacio,
nejua xuelis nikchiuas itlaj yejuan ueyi,
nion yejuan pitentsin,
yejuan noTEKO Dios xnechkauilia ma nikchiua.
19 Pero nemejuamej no xmokauakan nikan in tlayoua ken on oksekimej okichijkej,
niman nikitas tlinon nechijlis noTEKO.
20 Ipan on tlayoua Dios okinotitij Balaam niman okijlij:
—Tla on tlakamej oualajkej para mitsuikaskej,
xuiya iminuan.
Pero san tikchiuas on tlen nejua nimitsijlis.
Iángel toTEKO niman ipoloko* Balaam
21 Uajmostla kualkan Balaam onokuiteu,
okisillajtij ipoloko* niman oyaj iminuan on tlayekankej moabitas.
22 Pero Dios okualan itechkopa Balaam pampa oyaj iminuan on tlakamej.
Balaam yetiaya ipan ipoloko* niman iuan yayaj omemej itlapaleuijkauan.
Niman iángel toTEKO,
onotelkets ipan iojui para okitsakuilij.
23 Ijkuak on poloko* okitak ika iángel toTEKO nemiya ipan tlajko ojtli ika sen espada ipan ima,
okitlalkauij on ojtli niman oksekan okonmelau.
Yejua ika,
Balaam okimajmailij para onokuep ipan iojui.
24 Kemaj iángel toTEKO onotelkets ipan sen ojtli kampa tlapitsko,
inajnakastlan on ojtli uvasyoj katka,
niman tlatsakutoya ikan tecorral.
25 Ijkuak on poloko* okitak iángel toTEKO,
onomojtij niman onokaltechoj ipan sen tepantli niman okimetskojyotepitskuaj Balaam.
Kemaj Balaam oksejpa okimailij.
26 Pero iángel toTEKO okinyakapanauij niman onoteltito kampa más tlapitsko,
kampa xakaj ueli tlamalakachoua.
27 Ijkuak on poloko* okitak iángel toTEKO,
onotekak ipan tlajli.
Kemaj Balaam sanoyej okualan,
niman oksejpa okimajmailij ika sen tlakotl.
28 Ijkuakon toTEKO okichiu para on poloko* ma tlajto,
niman okijlij Balaam:
—¿Tlinon onimitschiuilij ika aman ye ika yexpa tinechmailia?
29 Niman Balaam okinankilij:
—Tejua tinechajpijpinauijtiu.
Tla ipan noma nikpiyaskia sen cuchillo,
amantsin timitsmiktiskia.
30 Pero on poloko* okijlij:
—Nejua nipoloko* yejuan tejua nochipa ipan tiyetinemi.
Niman kuajli tikmatstikaj ika xkaman ijkon nimitschiuilia.
Niman Balaam okilij:
—Melauak.
31 Kemaj toTEKO okichiu para Balaam ueli ma kita on iángel yejuan ijkaya itlajkotian ojtli ika sen espada ipan ima.
Balaam onotlakuantelkets,
niman onopachoj hasta ipan tlajli.
32 Pero iángel toTEKO okijlij:
—¿Tline otikmailij yexpa mopoloko?
Nejua oniuajlaj para onimitstsakuiliko pampa xnikuelita kampa tiau.
33 In poloko* onechitak yexpa,
niman ijkuak nechitaya nejkuaniaya.
Tla yejua xkitlalkauiskia on ojtli,
nejua nimitsmiktiskia,
niman yejua nikauiliskia ma nemi.
34 Niman Balaam okinankilij iángel toTEKO:
—Yonitlajtlakoj,
pampa nejua xnikmatiya ika tejua ompa tinemiya tiktsakutikatka noojui.
Tla tikita xkuajli ika niau,
ninokuepas.
35 Pero iángel toTEKO okinankilij:
—Uelis tias iminuan on tlakamej,
pero san tikijtos on tlen nejua nimitsijlis.
Niman Balaam oyaj iminuan on tlayekankej yejuan Balac okinuajtitlanka.
Balac kiselia Balaam
36 Ijkuak on rey Balac okimat ika Balaam ye uajlaya,
oyaj okiselito ipan sen ueyikalpan de on país Moab yejuan onkaj nisiu de on río Arnón,
kampa tlami on país.
37 Niman on rey Balac okijlij Balaam:
—Nejua onimitstekuitlan para xuajla nimantsin.
¿Tline xtiknekiya tiuajlas?
¿Tline tiknemilia xniuelis itlaj nimitsmakas para nimitsueyitlajsojkamachilis?
38 Niman Balaam okinankilij:
—Aman nikan ninemi.
Yonimitsitako.
Pero xuelis nikijtos san tlinon.
Nejua san uelis nikijtos on tlajtojli yejuan Dios nechijlis.
39 Kemaj Balaam oyaj iuan on rey Balac hasta Quiriat-huzot.
40 Niman ompa on rey Balac otlanauatij ma kinmiktikan uakaxtin niman borregos para on nakatl okinmakakej Balaam niman on tlayekankej yejuan iuan ouajlajkej.
41 Uajmostla kualkan,
on Rey Balac okuikak Balaam hasta ikuapan on tepetl Ramot-baal niman desde ompa ouel onkontak se parte de incampamento on israelitas.