Intekiu on levitas
3
Ipan on tonaltin ijkuak toTEKO okinots Moisés ipan on tepetl Sinaí,
ikoneuan Aarón niman ikoneuan Moisés yejuamej in katkaj:
2 Ikoneuan Aarón katkaj:
Nadab yejuan yenkuiyotl,
Abiú,
Eleazar,
niman Itamar.
3 In nauimej okinkuatekijkej ikan aceite para okinmakak tekiuajyotl ken tiopixkej.
4 Pero Nadab niman Abiú omikkej ixpan toTEKO pampa ipan on xalpatlajkan Sinaí xokitlakamatkej itlajtoltsin toTEKO pampa yej okitekitiltijkej sen tlitl yejuan Dios xokinnauatij ma kikuikan.
Yejuamej xokipixkej inkoneuan.
Niman Eleazar iuan Itamar okichijkej on tekitl de tiopixkej niman Aarón imintataj kintitiaya ken tekitiskej.
5 ToTEKO okinots Moisés niman okijlij:
6 “Xkimijli on iuejkakoneuan Leví ma uajlakan itech Aarón para kipaleuiskej.
7 Yejuamej kipaleuiskej Aarón niman tekitiskej impampa nochimej on israelitas ipan on tabernáculo* kampa ninemi.
Niman yejuamej kichiuaskej nochi on tekitl yejuan noneki ipan on tabernáculo.
8 Cuidaroskej nochi on tlajtlamach* yejuan onkaj ijtik on tabernáculo* kampa nejua ninemi.
Yejuamej tekitiskej impampa on israelitas,
kichiuaskej nochi on tekitl ipan on tabernáculo.
9 Xkinxelo on levitas de intech on oksekimej israelitas para on levitas san ika nokauaskej kipaleuiskej Aarón,
niman ikoneuan.
10 Niman xkinkauili Aarón niman iuejkakoneuana on tekitl de tiopixkej.
Tla yakaj tlakatl yejuan xtiopixki kinekis kichiuas on tekitl ken sen tiopixki,
ika onkaj nenkimiktiskej.”
On Levitas teyaxkauan* itech toTEKO
11 ToTEKO okinots Moisés niman okijlij:
12 “Intech nochimej on israelitas yonikintlapejpenij on levitas,
pampa inka onikimpatlak on yenkuiyomej israelitas.
Yejuamej noyaxkauan
13 pampa nejua noyaxkauan nochimej on yejuan achtoj tlakatij.
Ijkuak onikchiu para ma mikikan nochimej yejuan yenkuiyomej ne imanian Egipto,
onikinnoyaxkatij nochimej inyenkuiyokoneuan on israelitas,
niman no ijki nochimej on yolkej yejuan achtoj tlakatiskej,
ye noyaxkauan.
Nejua ninemoTEKO.”
Okimpojkej on levitas
14 ToTEKO oksejpa okinots Moisés ipan on xalpatlajkan Sinaí,
niman okijlij:
15 “Xkimpoua nochimej on levitas.
In tlajpouajli tikchiuas por clanes* niman por familias.
Xkimpoua nochimej on tlakakokonej yejuan yokaxitijkej se metstli para tlakpak.”
16 Niman Moisés okichiu on tlajpouajli ken toTEKO okinauatij.
17 Ikoneuan Leví katkaj:
Gersón,
Coat niman Merari.
18 Ixuiuan Leví yejuan kisaj itech Gersón,
omemej katkaj:
Libni niman Simei.
19 Ixuiuan Leví yejuan kisaj itech Coat nauimej katkaj:
Amram,
Izhar,
Hebrón niman Uziel.
20 Ixuiuan Leví yejuan kisaj itech Merari omemej katkaj:
Mahli niman Musi.
In yejuamej clanes katkaj itech inchanejkauan Leví.
Clanes yejuan kisaj itech Gersón
21 On clanes yejuan kisaj itech Gersón katkaj omemej,
Libni niman Simei.
22 Nochimej on tlakamej yejuan okinmijkuilojkej de se metstli para tlakpak katkaj 7 mil 500.
23 Yejua in omemej clanes onochachantijkej ikuitlapan on tabernáculo* kampaka ikalakiyan tonaltsintli.
24 Eliasaf,
itelpoch Lael,
onochiu tlayekanketl intech on clanes yejuan kisaj itech Gersón.
25 Yejuamej imintekiu katka para cuidarouayaj on tabernáculo* kampa ninemi,
on ome tlanepantli tlakuapachojli de kuetlaxtli,
on cortina yejuan kipilouaj ipan ikalakiyan on tabernáculo,
26 on cortinas yejuan ika kitsakuaj ikiauak on tabernáculo,
on cortina yejuan kipilouaj kampa ikalakiyan on kiauak yejuan kiyeualojtok on tabernáculo* niman on tlaixpan*,
niman nochi mekatl yejuan kitekitiltiaj ipan on tabernáculo.
On clanes yejuan kisaj itech Coat itelpoch Leví
27 On clanes yejuan kisaj itech Coat katkaj nauimej:
Amram,
Izhar,
Hebrón niman Uziel.
28 Nochimej on tlakamej yejuan kipiyaj se metstli para tlakpak katkaj 8 mil 600.
In yejuamej tlacuidarouaya ipan on tabernáculo.
29 Yejuamej onochachantijkej kampaka Sur nisiu on tabernáculo.
30 Elizafán,
itelpoch Uziel,
onochiu tlayekanketl itech iclanes Coat.
31 In clanes yejuamej kipiyayaj tlanauatijli para cuidaroskej on yekcaja,
on mesa para pan,
on lámpara,
on tlaixpan* kampa kitlaliayaj para kopajli,
on tlaixpan* para uentli yejuan nochi tlatla,
nochi on tlajtlamach* yejuan notekitiltia ijtik on tabernáculo,
on yekcortina niman nochi on tlajtlamach* yejuan ompa notekitiltia.
32 Eleazar,
itelpoch on tiopixki Aarón,
yejua onochiu tlayekanketl más ueyixtikatka de nochimej on levitas.
Yejua kintekimakaya on levitas yejuan tlapaleuiyayaj ijtik on tabernáculo.
On clanes yejuan kisaj itech Merari itelpoch Leví
33 On clanes yejuan kisaj itech Merari omemej katkaj:
Mahli niman Musi.
34 Nochimej on tlakamej yejuan kipiyayaj,
se metstli para tlakpak katkaj 6 mil 200.
35 Zuriel itelpoch Abihail,
onochiu tlayekanketl itech iuejkakoneuan Merari,
niman onochachantijkej kampaka Norte ika de on tabernáculo.
36 Niman yejuamej kipiyayaj imintekiu para cuidaroskej on kojtsatsastin,
on tlapalokojtin,
on kuamantin,
on tsintlatoktin,
niman nochi on tlajtlamach* yejuan ompa notekitiltia.
37 No kincuidarouayaj on kuamantin yejuan kintlaliayaj iyeualkan on kiauak iuan intsintlatokyo,
iminestacas niman on iminmekayouan.
38 Moisés,
Aarón niman itelpochuan Aarón onochachantijkej nisiu ixpan on tabernáculo* kampaka ikisayan tonaltsintli.
Yejuamej imintekiu katka para kitlajpiyayaj nochi on tabernáculo* impampa on israelitas.
Pero tla yakaj tlakatl yejuan xtiopixki kinekiya kichiuas on tekitl ken sen tiopixki,
ika onkaj kimiktiayaj.
39 Ijkuak Moisés niman Aarón okimpojkej on levitas niman okinmijkuilojkej por clanes ken toTEKO okinnauatij,
nochimej yejuan tlakamej yejuan kipiyayaj se metstli para tlakpak katkaj 22 mil san yejuan tlakamej.
Kenijki kinkouiliskej toTEKO on yenkuiyokokonej
40 ToTEKO okijlij Moisés:
“Xkimpoua nochimej inyenkuiyokoneuan on israelitas yejuan tlakamej de se metstli para tlakpak,
niman xkijkuilo imintoka.
41 Xnechinmaxkati on levitas para ika tikimpatlas inyenkuiyokoneuan on israelitas.
No ijki,
para tikimpatlas inyenkuiyokoneuan inyolkauan on israelitas,
xnechinmaka inyolkauan on levitas.
Nejua ninemoTEKO.”
42 Ijkon tej,
Moisés okimpou inyenkuiyokoneuan on israelitas ken toTEKO okinauatij.
43 Nochimej on yejuan tlakamej de se metstli para tlakpak okimpojkej 22 mil 273.
44 ToTEKO okinots Moisés niman okijlij:
45 “Xnechinmaka nochimej on levitas para ika xkimpatla inyenkuiyokoneuan on israelitas,
niman inyolkauan on levitas ika xkimpatla inyenkuiyokoneuan inyolkauan on israelitas,
niman ijkon on levitas noyaxkauan yeskej.
Nejua ninemoTEKO.
46 Pero inyenkuiyokoneuan on israelitas más miyekej xken on levitas.
Ijkon tej,
para nomanauiskej on 273 yenkuiyomej yejuan onokajkej,
47 xtlajtlanili cada tajtli israelita ma kitlaxtlaua ipampa iyenkuiyokoneu makuijli tepostomin de plata yejuan kipiya majtlaktli uan se gramos ika yetik,
ijkon ken kitlajtlanij ipan on tabernáculo.
48 Niman on tomin xmaka Aarón niman itelpochuan para ika tikinmanauis on oksekimej 273 yenkuiyomej.”
49 Moisés okisentlalij on tomin yejuan ika okintlaxtlajkej para oquinmanauijkej on oksekimej yenkuiyomej israelitas yejuan onokajkaj.
50 Niman okisentlalij se mil 365 tomin de plata,
ijkon ken kitlajtlanij ipan on tabernáculo.
51 Kemaj Moisés okimakak Aarón niman itelpochuan nochi on tomin ken toTEKO okinauatij.