Nochi yenkuiyotl onochiu iyaxka* toTEKO
13
ToTeko okinots Moisés,
niman okijlij:
2 “Xnechinyaxkati nochimej on tlakakokonej yejuan achtoj tlakatij,
pampa nochimej israelitas yejuan achtoj tlakatij nejua noyaxkauan,
niman no nochimej nemoyolkauan yejuan achtoj tlakatij.
Nochimej nochiuaskej noyaxkauan.”
Tlanauatiltin ika on pan yejuan xkipiya tlaxokolilistli*
3 Kemaj Moisés okinmijlij nochimej on israelitas:
“Xkelnamikikan in tonajli niman xiluichiuakan cada xipan,
pampa ipan in tonajli ikan iueyi poder toTEKO omechkixtij Egipto kampa nentekitiyaj ken esclavos.
Niman ipan in tonajli xkaman nenkuaskej pan yejuan kipiya tlaxokolilistli*.
4 Aman in tonajli ipan in metstli itoka Abiba nenkisaj Egipto.
5 Niman xiluichiuakan ijkuak toTEKO mechuikas ipan on kuajli tlajli yejuan okimprometerouilij nemoachtojtajuan para kiminmakas.
On tlajli kipiya miyek itlakyo niman onkaj kampa nemij on cananeos,
heteos,
amorreos,
heveos niman jebuseos.
6 Chikome tonajli nenkikuaskej pan yejuan xkipiya tlaxokolilistli*.
Niman kampa ika chikome tonajli noneki neniluichiuaskej para toTEKO.
7 Chikome tonajli nenkikuaskej on pan yejuan xkipiya tlaxokolilistli*.
Maka onyas tlaxokolilistli*,
nion maka onyas sen pan ika tlaxokolilistli* ipan nochi nemoueyitlalpan.
8 Ipan on tonajli nenkimijliskej nemokoneuan yejua in tikchiuaj ipampa on tlen toTEKO otechchiuilij ijkuak otechkixtij Egipto.
9 Niman ken nenkitlaliskiaj sen neskayotl ipan ne moma noso nenmixkuatipan yejuan mechtlalnamiktis ika noneki nenkijtoskej iley toTEKO para nochipa,
pampa yejua omechkixtij Egipto ikan iueyi poder.
10 Yejua ika,
noneki nentlailuichiuaskej cada xipan ipan in tonajli ken in tlanauatijli kijtoua.
11 ’ToTEKO mechuikas ipan on tlajli kampa aman nemij on cananeos.
Yejua mechmaktilis on kuajli tlajli ken omechprometerouilij nemejuamej niman nemouejkatajuan.
12 Ipan on tonajli noneki nenkimakaskej toTEKO nochi on tlakakokonej yejuan yenkuiyomej niman nochimej okichyolkej yejuan achtoj tlakatij pampa yejua iyaxkauan.
13 Tla nenkinekiskej nenkouiliskej toTEKO iachtojtlakakoneu sen siuapoloko*,
noneki nenkitlaxtlauiliskej toTEKO ika sen borreguito ken sen uentli para nenkipatlaskej on polokotsin*.
Pero tla xnenkitemakaskej sen borreguito ken sen uentli para nenkipatlaskej ika on polokotsin*,
tla ijkon,
noneki nenkechsontekiskej on polokotsin*.
No ijki,
noneki nenkikouiliskej toTEKO nochi nemotlakakoneuan yejuan yenkuiyomej ika sen uentli yejuan nenkitemaskej.
14 Niman sakin*,
ijkuak nemokoneuan mechtlajtoltiskej:
‘¿Tlinon kijtosneki in tlen nenkichiuaj?’,
nemejuamej ijkin nenkiminankiliskej:
‘ToTEKO otechkixtij ikan iueyi poder ipan on tlajli Egipto kampa techpiyayaj ken esclavos.’
15 Niman ijkuak on rey onoyoltechikau niman xtechkauiliaya ma tikisakan,
toTEKO okinmiktij on tlakayenkuiyomejb ipan cada familia de on egipcios.
Niman no okinmiktij nochimej inokichyolkauan yejuan achtoj otlakatkej.
Yejua ika,
tikmakaj toTEKO ken sen uentli nochimej okichyolkej yejuan tlakatij achtoj.
No ijki,
tiktemakaj sen uentli para tikinmanauiyaj toyenkuiyokoneuan tlakamej.
16 In ken nenkitlaliskiaj sen neskayotl ipan nemoma noso nemixkuatipan yejuan mechtlalnamiktis ika toTEKO otechkixtij ne Egipto ikan ueyi poder.”
On tlimilinajli niman on moxtli mimiltik
17 Ijkuak on rey okinkauilij ma kisakan on israelitas,
Dios xokinuikak ipan on ojtli yejuan panoua ipan imintlal on filisteos,
maski on ojtli más nisiu katka.
Yejua okinemilij:
“Tla saman kinuijsokij on israelitas,
manin xkinekiskej teixnamikiskej,
yej kinekiskej nokuepaskej para Egipto.”
18 Yejua ika,
Dios okinuikak on israelitas ipan okse ojtli para ma panokan ipan on xalpatlajkan yejuan yau imelajkan on Mar Rojo.
On israelitas okiskej xexelijtiuij niman tekpantiuij mijmiyekej ken soldados,
yejuan yayaj listos para ontlauijsokiskej.
19 Moisés kiktiya iomiyouan José,
pampa José okinnauatijka ikoneuan Israel ma kitestigojtlalikan Dios para kiktiskej iomiyouan.
Ijkin okinmijlijka:
“Kuajli xmatikan ika Dios sakin* melauak uajlas mechajpaleuis.
Niman ijkuak ijkon nochiuas,
ika onkaj nenkiktiskej noomiyouan de in tlajli Egipto.”
20 Niman on israelitas okiskej de Sucot,
niman oyajkej hasta Etam kampa peua on xalpatlajkan.
Ompa okintelketskej inkajkal.
21 Ipan tonajli toTEKO kinyekanaya ika sen moxtli mimiltik yejuan kintitiaya kanika yaskej.
Ipan yeuajli kinyekanaya ika sen tlimilinajli yejuan kintlauiluiyaya.
Ijkon yejuamej ueliyaj nejnemiyaj ipan tonajli niman ipan yeuajli.
22 Ijkon tej,
mojmostla on moxtli mimiltik kinyekantiaya ipan tonajli,
niman on tlimilinajli ipan yeuajli niman xokaman okinkau.