On Pascua
12
Ipan on tlajli Egipto,
toTEKO otlajtoj iuan Moisés niman Aarón,
niman ijkin okinmijlij:
2 “Para nemejuamej in metstli yejua yes on achtoj metstli de in xipan.
3 Ijkin xkimijlikan nochimej on israelitas:
‘Ipan on ika majtlaktli tonajli de in metstli,
cada tlakatl kimiktis sen borreguito noso sen chivito para ichanejkauan.
4 Niman tla ipan sen chanyotl* xmiyekej niman xueliskej kikuaskej nochi sen borreguito,
ma kitlajkoxelokan sen borreguito iuan iminnisiuchanejkauan niman kikuaskej san sekan.
Noneki kimpouaskej keskimej nemij,
niman ma noxelouilikan cada se kechkich uelis kikuas.
5 Noneki kitlapejpeniskej sen okichyolki yejuan se xijkayotl niman xkanaj tlakokojli* ipan itlakayo.
Uelis kimiktiskej sen borreguito noso sen chivito.
6 “Noneki kixeloskej on yolki yejuan kitlapejpeniskej hasta ajsis on 14 tonajli de on metstli.
Niman ipan on tonajli ijkuak tlapoyajkantsin,
cada chanyotl* intech on israelitas kimiktiskej inyolkau.
7 Kemaj kikuiskej iyesyo niman kitlatlaliliskej on kuapanojli niman inajnakastlan on tsakuijlotl ipan on kajli kampa kikuaskej inakayo on yolki.
8 Ipan on tlayoua kikuaskej on nakatl tliuaki.
Niman kikuaskej ikan kijli yejuan chichik,
niman pan yejuan xkipiya tlaxokolilistli*.
9 Maka kuaskej xoxojki on nakatl,
nion tlakuakualatstli.
Yej kitliuatsaskej san sekan ika itsontekon,
imetskojyouan niman nochi yejuan kipiya ijtik.
10 Niman xitlaj* uelis nenkauaskej para nenkuaskej uajmostla.
Tla seki onokau on tlayoua ika xonenkitlamijkej,
noneki nenkitlatiskej.
11 “Ijkin nentlakuaskej.
Achtoj xmotlajkosalokan ipan nemotlaken.
Xmokaktikan,
niman xpixtiakan nemotopil ipan nemoma.
Niman kemaj xisijkatlakuakan pampa in yejua noPascua,
nejua yejuan nemoTEKO.
12 Ipan on tlayoua nipanos imanian Egipto,
niman nikinmiktis nochimej yejuan tlakayenkuiyomej ipan cada chanyotl* intech on egipcios,
niman iminyolkauan okichtin yejuan achtoj otlakatkej.
Niman nikincastigaros nochimej on iminídolos on egipcios.
Nejua nemoTEKO.
13 ’On yestli yejua yes ken sen neskayotl ipan kaltin para nestias kampa nennemij.
Ijkon tej,
ijkuak nikitas on yestli,
nemechpanauis niman xitlaj* impan nochiuas nemokoneuan ijkuak nikinmiktis inkoneuan on egipcios.
14 Ipan on tonajli ika onkaj nentlaluichiuaskej itech toTEKO.
Niman cada xipan nenkichiuaskej para maka nenkelkauaskej on tlen onikchiu nemopampa.
Noneki para nochipa nentlaluichiuaskej cada xipan.
15 Chikome tonajli nenkikuaskej pan yejuan xkipiya tlaxokolilistli*.
Yejua ika,
ipan on achtoj tonajli xkixtikan on tlaxokolilistli* ipan nemochan.
Tla yakaj kikuas pan yejuan kipiya tlaxokolilistli* ipan on chikome tonajli,
noneki nenkixtiskej intech on israelitas.
16 Ipan on achtoj tonajli niman ipan on ika chikomej tonajli xmosentlalikan san sekan ika miyek paktli para nennechmauistiliskej.
Maka yakaj tekitis ipan on tonaltin.
San uelis nenkichijchiuaskej tlakuajli para nentlakuaskej.
17 Xchiuakan in iluitl de pan yejuan xkipiya tlaxokolilistli* cada xipan,
pampa ipan on tonajli onemechkixtij nemochimej* nemejuamej de Egipto.
Yejua ika,
para nochipa ipan in tonajli xtlaluichiuakan.
Niman in iluitl kichiuaskej on tatajtin niman inkoneuan yejuan uajnentiaskej.
18 Ipan on 14 tonajli ijkuak tlapoyajkan,
xpeuakan xkuakan pan yejuan xkipiya tlaxokolilistli*,
hasta tlapoyajkan ipan 21 tonajli de on metstli.
19 “Maka ma onya tlaxokolilistli* ipan nemochan ipan nochi on chikome tonajli.
Tla yakaj kikuas pan ikan tlaxokolilistli*,
xkixtikan intech on israelitas.
Ijkon nenkichiuiliskej yejuan xchanej noso yejuan israelita.
20 Xitlaj nenkuaskej yejuan kipiya tlaxokolilistli*,
maski san kanon nennemij.”
21 Moisés okinnots nochimej on uejueyixtokej tlakamej yejuan tlayekanayaj intech israelitas,
niman okinmijlij:
“Xuiyan niman xtlapejpenikan cada se nemejuamej sen borreguito noso sen chivo para nemochanejkauan,
niman xkinmiktikan para neniluichiuaskej para on Pascua.
22 Xkuikan se tlasalojli on xojtli itoka hisopo,
niman xpolaktikan ipan on yestli yejuan onkaj ipan uajkajli.
Niman xtlatlalilikan on kuapanojli niman inajnakastlan on tsakuijlotl.
Niman nion se nemejuamej maka onkisas ikiauak hasta ijkuak tlanesis.
23 Ijkuak toTEKO panos para kinmiktis on egipcios,
niman kitas on yestli ipan ikuapanol niman inajnakastlan on tlatsakuijlotl,
san kipanauis on kajli.
Ijkon toTEKO xkauilis on ángel temiktiani ma kalaki ipan nemochan para kinmiktis nemotlakakoneu yenkuiyotl.
24 “Yejua in pacto* para nemejuamej niman nemouejkakoneuan.
Xtlakamatikan in tlanauatiltin para nochipa.
25 Ijkuak nemajsiskej ipan on kuajli tlajli yejuan toTEKO mechmakas ken omechprometerouilij,
noneki ijkon nenkichiuaskej nochipa on iluitl Pascua.
26 Niman ijkuak nemokoneuan mechtlajtoltiskej tlinon kijtosneki in iluitl yejuan nenkichiuaj,
27 xkimijlikan:
‘In yolkej de Pascua yejuan tikinmiktiaj nochiua sen uentli para toTEKO.
Techelnamiktia kenijkionochiu ijkuak toTEKO okinmiktij on egipcios,
pero san okipanauij tochajchan yejuan tiisraelitas ijkuak tinemiyaj Egipto niman xokimiktij nion se de tofamilia.’”
Kemaj nochimej on israelitas onotsonakapilojkej para okimaustilijkej toTEKO.
28 Niman kemaj on israelitas oyajkej niman okichijkej on tlen toTEKO okinnauatij Moisés niman Aarón.
Omik on yenkuiyotl ipan cada familia
29 Ipan tlajkoyeuajli*,
toTEKO okimiktij cada tlakatl niman konetl yejuan yenkuiyotl katka ipan cada familia de on egipcios.
Ijkon ipan onochiu desde ikoneu on rey hasta intech on yejuan nemiyaj ipan cárcel.
Niman no okinmiktij iyenkuiyou nochi on yolkej.
30 On tlayoua onokuitejkej on rey niman nochi itlapaleuijkauan,
niman nochimej on egipcios.
Niman nochiuiyan ipan on tlajli Egipto chokayaj,
niman xonkatka nion sen kajli intech on egipcios kampa xnemiya sen mikatsintli.
31 Ipan on tlayoua on rey okitekuitlan Moisés niman Aarón,
niman okinmijlij:
—Amantsin xkisakan.
Xuiyan inmiuan nochi on israelitas.
Xkinkauakan nochanejkauan.
Xuiyan xmauistilitij nemoTEKO ken yonenkijtojkej.
32 Xkinuikakan nemoborregos niman nemouakaxuan ken nenkijtouayaj,
niman xuiyan.
Niman xmoueyikatsajtsilikan itech nemoTEKO nopampa.
33 Niman on egipcios okintlajsiuitijkej on israelitas para ma kisakan de on tlajli pampa kinemiliayaj uelis nochimej mikiskiaj on egipcios.
34 On israelitas okejkej imintix,
yejuan para kichijchiuaskej pan yejuan xkipiya tlaxokolilistli*.
Niman okitejkuixkej ikan tela niman okechpanojkej.
35 No ijki,
okichijkej on tlen Moisés kinnauatiaya niman okintlajtlanijkej on egipcios miyek tlajtlamach*,
oro,
plata niman tlakentin.
36 ToTEKO okichiu para on egipcios ma kinkuajliitakan on israelitas.
Niman okinmakakej nochi on tlen okintlajtlanilijkej.
Niman on israelitas okiktikej tlajtlamach* de on egipcios.
On israelitas okiskej ne Egipto
37 On israelitas okiskej Ramsés niman oajsikej hasta Sucot.
Yejuamej katkaj kanaj 600 mil tlakamej,
pero xokimpojkej siuamej nion inkoneuan.
38 Iminuan oyajkej miyekej seseknekamej tlakamej yejuan xisraelitas niman miyek borregos niman uakaxtin.
39 Niman okichijchijkej pan ika on tixtli yejuan kiktiyaj.
On tixtli xkipiya tlaxokolilistli* pampa on egipcios okintotokakej de Egipto niman xonajxilijkej para kichijchiuaskej imintlakual.
40 On israelitas nemiyaj Egipto 430 xipan.
41 Niman ipan on tonajli ijkuak okajxitijkej on 430 xipan,
nochimej on ikoneuan toTEKO okiskej ipan on tlajli.
42 On tlayoua toTEKO okincuidaroj para kuajli okinkixtij ne Egipto.
Niman sano ipan on tlayoua okijtojkej ika nochipa cada xipan kelnamikiskej ijkuak toTEKO okinmanauij intech on Egipcios.
On leyes para kenijki kichiuaskej on iluitl Pascua
43 ToTEKO okinmijlij Moisés niman Aarón:
“In yejua leyes para on iluitl Pascua.
Yejuan xchanej xuelis kikuas on yolki yejuan nenkimiktiskej.
44 Pero sen esclavo yejuan onenkojkej,
kemaj,
uelis kikuas tla achtoj nenkitlaliliaj on neskayotl itoka circuncisión.
45 Yakaj yejuan xchanej yejuan san nejekuanijtinemi,
noso san tlakeualtekititinemi para kitlaxtlauiliaj xuelis kikuas on yolki.
46 On yolki nenkuaskej kalijtik sa no yejua on kajli kampa oiksik.
Maka nekixtiskej nion achijtsin on nakatl.
Maka nenkipostekiliskej nion sen iomiyo on yolki yejuan kiuentlaliaj.
47 Nochimej on israelitas tlaluichiuaskej.
48 Pero tla yakaj yejuan xchanti nemouan kinekis kichiuas on Pascua de toTEKO,
noneki nenkitlaliliskej on neskayotl itoka circuncisión,
iuan nochimej inkoneuan yejuan tlakamej.
Ijkon kemaj uelis kichiuas on iluitl,
niman kikuas on nakatl ken kichiuaj nochimej on sekimej yejuan otlakatkej ipan nemotlal.
Pero xakaj uelis kikuas on yolki yejuan xkipiya on neskayotl itoka circuncisión* ipan itlalnakayo.
49 Sa no yejua in ley yes para yejuan tlakatij ipan on país de Israel niman para on yejuan xchanejkej.”