On castigo ikan chapolimej
10
ToTEKO okijlij Moisés:
—Xuiya,
xkitati on rey pampa nejua onikchiu para yejua iuan itlapaleuijkauan ma noyoltechikauakan.
Ijkon uelis nikchiuas in uejueyi tetlatlachalistin para ma kitakan nopoder.
2 Ijki se tonajli tejua uelis tikintlajtlajtouilis mokoneuan niman moxuiuan on uejueyi tlajtlamach* yejuan onikchiu imixpan on egipcios.
Ijkon nenkimatiskej ika nejua ninemoTEKO.
3 Yejua ika,
Moisés niman Aarón oyajkej okitatoj on rey,
niman okijlijkej:
—Ijkin kijtoua toTEKO,
iminDios on hebreos*:
“¿Hasta kamanon timoknelis nixpan?
Xkinkauili ma uiyan nokoneuan para ma nechmauistilitij.
4 Tla xtikinkauilia nokoneuan ma uiyan,
mostla nikchiuas ma uajlakan chapolimej ipan mopaís.
5 Yejuamej kitemiltiskej in país hasta xok nesis on tlajli.
Kitlamiskej on tlen achijtsin onokau yejuan xnochi opoliu ikan tejsiutli.
Niman on chapolimej kikuaskej nochi kojtli* yejuan nokaua.
6 Temiskej ipan mopalacio niman ipan iminchajchan motlapaleuijkauan niman iminchan nochimej on egipcios.
Nikchiuas ken xkaman nenkitayaj,
nion nemotajuan,
nion nemoauelos xkaman kitayaj ipan nochi iminnemilis hasta aman.”
—¿Hasta kamanon sanken* techpajsolos in tlakatl?
Xkinkauili tejua ueyixtikaj rey ma uiyan on israelitas san yejuan tlakamej ma kimauistilitij iminTEKO Dios.
¿Tlen xtikita ika topaís Egipto ye ixpolijtikaj?
8 Niman on rey oksejpa okintekuitlan Moisés niman Aarón,
niman okinmijlij:
—Xuiyan xmauistilitij nemoTEKO Dios.
Pero achtoj xnechijlikan,
akinomej yaskej.
9 Moisés okinankilij:
—Noneki tinochimej tiaskej.
Yaskej tokoneuan hasta on ueuentsitsimej.
Yaskej totelpochuan,
tochpochuan,
nochi toborregos,
niman nochi touakaxuan,
pampa tikchiuaskej sen ueyi iluitl para toTEKO.
10 Pero on rey okinmijlij:
—Niman nesi ika xkuajli on tlen nenkinemiliaj nenkichiuaskej.
¿Nenkinemiliaj ika nejua nemechkauilis nenyaskej iminuan nochi nemosiuauan niman nemokoneuan?
Ixpan nemoTEKO nemechijlia ika xnemechkauilis nenyaskej.
11 ¡Ka!
¡Xijki yes!
Xuiyan san yejuan nentlakamej para xmauistilitij nemoTEKO,
pampa ijkon nenkinekij nenkichiuaskej.
Niman on rey okinnauatij itlapaleuijkauan ma kuajkixtikan Moisés niman Aarón itech on rey.
12 Pero toTEKO okijlij Moisés:
—Xketsteua moma ipan Egipto para ma uajlakan chapolimej niman ma kitemitikan on tlajli.
Ma kuakan niman ma kitlamikan nochi tlatoktli niman nochi yejuan onokau ijkuak oxin tejsiutli nochiuiyan ipan imintlal.
13 Moisés okontlalij itopil* ipan Egipto,
niman toTEKO okichiu ma uajla sen ajakatl kampaka ikisayan tonaltsintli,
niman oajakak ipan on tlajli se tonajli niman se yeuajli.
Niman uajmostla on ajakatl okinuajuikak sanoyej miyek chapolimej.
14 Niman on chapolimej okalakkej nochiuiyan ipan imintlal.
Xkaman ijki oonyak miyek chapolimej ipan Egipto,
nion xok kaman onyas.
15 Okitemitijkej on país hasta xok nesiya tlajli.
Niman okikuajkej nochi tepexojtli niman nochi tlakyotl yejuan onokau ipan kojtin* yejuan onokajka ijkuak oxin tejsiutli.
Xitlaj yejuan xoxojki onokau imanian Egipto,
nion ipan kojtin,
nion ipan mijlij.
16 On rey amanamantsin okitekuitlan Moisés iuan Aarón,
niman okinmijlij:
—Yonitlajtlakoj itech nemoTEKO Dios niman nemotech nemejuamej,
17 pero nemechtlajtlanilia sa sejpa xnechtlapojpoluilikan notlajtlakol.
Niman xmoueyitsajtsilikan itech nemoTEKO Dios nopampa para ma nechtlalkaui in castigo yejuan temiktia.
18 Ijkuak Moisés okis ichan on rey,
onoueyikatsajtsilij itech toTEKO ipampa yejua.
19 Niman toTEKO okipatlak iojui on ajakatl,
niman onokuep sen chikauak ajakatl yejuan oyaj kampaka ikisayan tonaltsintli,
niman okinuikak on chapolimej,
niman okominxinij ipan Mar Rojo.
Xonokau ipan Egipto nion sen chapolin.
20 Pero toTEKO okichiu para on rey ma noyoltechikau,
niman maka ma kinkauili ma uiyan on israelitas.
On castigo ikan tlayouajlotl
21 Niman kemaj toTEKO okijlij Moisés:
—Xkontelketsa moma ipan cielo,
niman ipan nochi Egipto ma onya sen tlayouajlotl yejuan sanoyej tlilijki niman tilauak hasta xok uelis tlachaskej.
22 Kemaj Moisés okontelkets ima ipan cielo,
niman oonyak sen temojtij tlayouajlotl sanoyej ueyi ipan on tlajli Egipto yeyi tonajli.
23 Yeyi tonajli xakaj ueliya kitaya inisiuchanejkau,
niman xakaj okis ipan ichan.
Pero kampa on israelitas chantiyaj,
onkatka tlastajlotl.
24 Kemaj on rey okitekuitlan Moisés,
niman okijlij:
—Xuiyan xmauistilitij nemoTEKO,
niman uelis nenkinuikaskej nemosiuauan niman nemokoneuan,
pero ma nokauakan nikan nemoborregos iminuan nemouakaxuan.
25 Pero Moisés okinankilij:
—¡Ka!
¡Xtiueliskej!
Noneki titechkauilis ma tikinuikakan on yolkej para on uentli yejuan tiktlatiskej para tikmakaskej toTEKO Dios.
26 Yejua ika,
totlajpixkauan no touan yaskej.
Nion sen yolki xuelis tikajteuaskej pampa noneki tikintlapejpeniskej sekimej yejuan tiktemakaskej ijkuak tikmauistiliskej toTEKO Dios.
Niman xtikmatiskej katlejua yolkej tikintekitiltiskej hasta ijkuak ompa tajsiskej.
27 Pero toTEKO okichiu para on rey ma noyoltechikau niman maka ma kinkauilij ma uiyan.
28 No ijki,
on rey okijlij Moisés:
—Xnechtlalkaui niman maka sa tinechalitas oksejpa pampa ipan on tonajli ijkuak oksejpa tiuajmonextis nixpan nimitsmiktis.
29 Niman Moisés okinankilij:
—Kuajli on tlen otikijtoj.
Aman xok kaman nimitsalitas oksejpa.