8
Niman toTEKO ijkin okijlij Moisés:
—Xuiya,
xkitati on rey,
niman xkijli:
Ijkin kijtoua toTEKO:
“Xkinkauili ma uiyan nokoneuan para ma nechmauistilitij.
2 Tla xtikinkauilis ma uiyan,
nejua nicastigaros nochi mopaís ika atemomej.
3 On río Nilo temis ikan sanoyej miyek atemomej.
Niman on atemomej kalakiskej ipan mopalacio,
niman yaskej ipan motlapech kampa tikochi.
Niman kalakiskej ipan inchajchan motlapaleuijkauan niman mochanejkauan*.
Niman kalakiskej kampa kimaxakualouaj harina niman kampa panikxitiaj.
4 Niman on atemomej tlejkoskej mopan,
niman impan motlapaleuijkauan niman impan nochimej on mochanejkauan*.”
5 Niman toTEKO okijlij Moisés:
—Xkijli Aarón ma kontlali itopil* ipan on ríos,
atlautin,
niman amanaltin para ompa ma kisakan atemomej niman ma kitemitikan nochi Egipto.
6 Aarón okontlalij itopil* ipan nochi on kech atl onkaj Egipto,
niman ompa okiskej atemomej yejuan okitemitikej nochi on país.
7 Pero on tetlatejtemouilijkej no ijki okichijkej ika innauajlo.
Okichijkej ma ualajkan atemomej ipan iueyitlalpan Egipto.
8 Kemaj on rey okintekuitlan Moisés niman Aarón,
niman okinmijlij:
—Xtlajtlanilikan nemoTEKO para ma techejkuanili in atemomej nejua niman nochanejkauan.
Niman kemaj nikinkauilis on hebreos* ma uiyan ma kimakatij uentli nemoTEKO.
9 Niman Moisés okinankilij on rey:
—Xnechijli kamanon tikneki ma ninoueyikatsajtsali mopampa tejua,
niman impampa on yejuan mitspaleuiyaj,
niman impampa mochanejkauan*.
Ijkuak ijkon nikchiuas,
on atemomej mikiskej nemochan,
niman nokauaskej san ipan on río.
10 On rey okijtoj:
—Mostla.
Niman Moisés okinankilij:
—Ijkon nochiuas,
para ijkon tikmatis ika xakaj nemi ken toTEKO Dios.
11 On atemomej xok nemiskej ipan mopalacio.
Xok mitspajsoloskej tejua,
nion yejuan mitspaleuiyaj,
niman nion mochanejkauan*.
Yej san nokauaskej ipan on río Nilo.
12 Moisés niman Aarón okiskej ipan ichan on rey.
Niman sakin*,
Moisés okitlajtlanilij toTEKO ma kinmejkuani on atemomej yejuan okintitlan ipan on rey.
13 Niman toTEKO okichiu on tlen Moisés okitlajtlanij,
niman omikkej on atemomej yejuan nemiyaj ipan techajchan,
kiauak,
niman ipan mijlaj.
14 Niman on tlakamej kinsentlaliayaj on atemomej yejuan yomikkej.
Okintepayolojkej nochiuiyan niman sanoyej omoloniakej.
15 Pero ijkuak on rey okitak ika on atemomej yomikej,
onoyoltechikau niman xok okinek okinkak Moisés niman Aarón ijkon ken toTEKO okijtojka para kichiuas.
On castigo ika atintin
16 ToTEKO okijlij Moisés:
—Xkijli Aarón ma kontlali itopil* niman ma kimaili on tlalteutli para ma nochiuakan atintin yejuan tekuaskej nochiuiyan Egipto.
17 Ijki okichiu.
Aarón okimailij on tlalteutli ika itopil,
niman onochijkej atintin,
niman okintepoxkej nochimej on egipcios niman inyolkauan,
pampa nochi tlalteutli onochiu atintin.
18 Niman on yejuan tetlatejtemouiliaj okichijkej kanika para kinchijchiuaskej atintin ika innauajlo,
pero xouelkej.
Niman sanoyej oatiouakej on tlakamej niman yolkej.
19 On tetlatejtemouilijkej okilijkej on rey:
—¡In kenin tlajtlamach* san Dios ueli kichiua!
Pero on rey onoyoltechikau niman xokinek okinkak,
ken on toTEKO okijtoka para kichiuas.
On castigo ikan sayolimej intoka tábanos
20 Niman toTEKO okijlij Moisés:
—Mostla xmokuiteua saniman niman xuiya xnamikiti on rey ijkuak temos itech on río,
niman xkijli:
“Ijkin kijtoua toTEKO:
Xkinkauili nokoneuan ma uiyan para ma nechmauistilitij.
21 Tla xtikinkauilis ma uiyan,
nejua nikinuajtitlanis miyekej tabanosa mopan,
ipan motlapaleuijkauan niman ipan nochi mochanejkauan*.
Temis ika sayolimej iminchajchan on Egipcios,
niman hasta on tlajli kitepoyaskej.
22 Pero ijkuak ijkin nochiuas,
nikejeuas Gosén kampa nemij nokoneuan.
Ompa xnemis nion se sayolintsin.
Ijkon tejua tikmatis ika nejua nemoTEKO ninemi ipan in país.
23 Nikchiuas para ma nesi katlejua nokoneuan niman katlejua mochanejkauan*.
In neskayotl nochiuas mostla.”
24 Ijki okichiu toTEKO.
Oualaj ken sen moxtli nochi de sayolimej.
Otemitoj ipan ipalacio on rey niman ipan iminchajchan itekitkauan.
Nochi on tlajli Egipto oten ikan on sayolimej uejuejimej,
niman otlaijtlakojkej nochiuiyan ipan on país.
25 Kemaj on rey okintekuitlan Moisés niman Aarón,
niman okinmijlij:
—Xuiyan xmakatij uentli nemoDios,
pero maka xkisakan nikan ipan in tlajli.
26 Niman Moisés okinankilij:
—In xuelis tikchiuaskej nikan pampa on egipcios xkuelitaj on tlauentlalijli yejuan tejuamej tikmakaj toTEKO Dios.
Ijkon tej,
tla tikinuentlaliskej in yolkej imixpan,
yejuamej techtemojmotlaskej.
27 Yejua ika tej,
noneki tiaskej yeyi tonajli ipan on xalpatlajkan,
niman ompa tikmakaskej uentli toTEKO Dios pampa ijki yejua technauatia.
28 On rey okijtoj:
—Nejua nemechkauilis xuiyan ipan on xalpatlajkan para xmakatij uentli nemoTEKO Dios,
pero maka xuiyan sanoyej uejka.
Niman xtlajtlanilikan nemoTEKO Dios nopampa.
29 Niman Moisés okinankilij:
—Ijkuak nejua nikisas nikan,
niktlajtlanilis toTEKO para mostla ma kinkixti on tábanos.
Niman no kintlalkauiskej yejuan mitspaleuiyaj niman nochimej on egipcios.
Pero maka oksejpa titechkajkayauas,
nion maka sa xkintsakuili on israelitas para ma uiyan ma kimakatij uentli iminTEKO.
30 Niman ijkuak Moisés okis ipan ipalacio on rey,
okitlajtlanilij toTEKO,
ma kinkixti on tábanos.
31 Niman toTEKO okichiu on tlen Moisés okitlajtlanilij.
Yejua okinkixtij on sayolimej ichan on rey,
niman inchan on itlapaleuijkauan,
niman inchan ichanejkauan.
Niman nion se tábano onokau.
32 Pero on rey oksejpa onoyoltechikau,
niman xokinkauilij ma uiyan on israelitas.