7
Kemaj toTEKO okijlij Moisés:
—Xkita,
nimitstlalis ixpan on rey ken nejua ompa ninemiskia.
Niman mokniu Aarón mitstlajtolpaleuis.
2 Tejua tikijlis Aarón nochi on tlen timitsnauatis,
niman kemaj yejua tlajtos iuan on rey para ma kinkauili ma kisakan de Egipto on israelitas.
3 Pero nejua nikchiuas para on rey ma noyoltechikaua.
Niman nikchiuas miyek neskayomej niman tlajtlamach* yejuan xkaman kitayaj ne Egipto.
4 Pero on rey xmechkakis.
Niman nejua nikititis noueyi poder Egipto niman nicastigaros.
Niman nikchiuas miyek uejueyi temojti tlajtlamach* hasta kaman nikinkixtia iuejkakoneuan Israel de on tlajli Egipto,
xexelijtiaskej ken soldados tlatekpantin.
5 Niman ijkuak Egipto yonikititij nopoder niman yonikinkixtij on israelitas de ompa,
on egipcios kimatiskej ika nejua niDios.
6 Moisés niman Aarón okichijkej nochi ken toTEKO okinnauatij.
7 Moisés kipiyaya 80 xipan,
niman Aarón 83 xipan ijkuak otlajtojkej iuan on rey.
Itopil Aarón onochiu sen kouatl
8 ToTEKO okinmijlij Moisés niman Aarón:
9 —Tla on rey mechijlis xchiuakan sen milagro para kititis ika Dios omechtitlan,
tikijlis Aarón ma kontilana itopil* niman ma kitlajkali ipan tlajli ixpan on rey niman nokuepas sen kouatl.
10 Yejua ika,
Moisés niman Aarón oyajkej okitatoj on rey,
niman okichijkej ijki ken toTEKO okinnauatij.
Aarón okitlajkal itopil* ipan tlajli ixpan on rey niman itlapaleuijkauan,
niman on topijli onokuep sen kouatl.
11 Kemaj on rey okinnots on tlamatkej* niman on tetlatejtemouilijkej,
niman yejuamej ikan innauajlo no okichijkej on tlen Aarón okichiu.
12 Cada se okitlajkal itopil* ipan tlajli,
niman nochi on topiltin onokuepkej kouamej.
Pero itopil* Aarón okinkuaj intopil on tlamatkej* niman on tetlatejtemouilijkej.
13 Pero maski on rey ijkon okitak,
onoyoltechikau niman xokinek okinkak ijkon ken toTEKO yokijtojka kichiuas.
On castigo ikan yestli
14 Sakin,
toTEKO okijlij Moisés:
—On rey noyoltechikaua niman xkinkauilia ma kisakan on israelitas.
15 Mostla kualkan xuiya xkitati ijkuak temos itech on río.
Ompa xcha itenko on río para tiknamikis on rey,
niman xkikti ipan moma on topijli yejuan onokuepka kouatl.
16 Ompa tikijlis:
“ToTEKO,
iminDios on hebreos*,
onechajtitlan para ma nimitsijliki:
Xkinkauili ma uiyan nokoneuan para ma nechmauistilitij ipan on xalpatlajkan.
Pero hasta aman xtikneki tinechkakis.
17 Yejua ika,
toTEKO kijtoua:
Aman tikmatis ika nejua melauak niiminTEKO nochi tlakatl.
Ijkuak nikmailis on atl ipan in río ika in topijli yejuan nikpiya nomak,
on atl nokuepas yestli.
18 On michimej mikiskej,
niman on río molonias hasta on egipcios kitlajyelitaskeja para koniskej on atl.”
19 No ijki,
toTEKO okijlij Moisés:
—Xkijli Aarón ma kontilana itopil* niman ma kontlali ipan on ríos,
niman on atlautin,
ipan on amanaltin,
niman kampa kitekaj atl imanian Egipto.
Ijkuakon,
nochi on atl nokuepas yestli hasta kampa atemaj niman hasta on yejuan onkaj ipan akuejxomatl niman ipan tekontli.
20 Moisés niman Aarón okichijkej nochi ijki ken toTEKO okinnauatij.
Aarón oketsteu itopil* niman okimailij on río Nilo ixpan on rey iuan itekitkauan.
Niman nochi on atl onokuep yestli.
21 Nochi kech michimej omikej,
niman on río Nilo sanoyej omoloniak hasta xakaj ueliya atli.
Onkatka yestli ipan nochi Egipto.
22 Pero on tetlatejtemouilijkej de Egipto sa no ijki okichijkej ika innauajlo.
Yejua ika,
on rey onoyoltechikau niman xokinek okinkak Moisés niman Aarón,
ken toTEKO okijtoj para nochiuas.
23 On rey onokuep niman oyaj ipan ipalacio,
ken xitlaj* tlinon yeskia.
24 Niman nochi on egipcios okinchijchijkej atlaltekontin itenko on río para okixtijkej atl yejuan chipauak pampa on atl ipan río xueliya konij.
On castigo ikan atemomej
25 Opanok chikome tonajli ika toTEKO okichiu ma nokuepa yestli on atl ipan on río Nilo.