Iuejkakoneuan Abraham niman Cetura, isiuau
25
Más sakin*,
Abraham oksejpa ononamiktij iuan okse siuatl yejuan itoka katka Cetura.
2 Niman ikoneuan yejuan okimpix iuan,
katkaj:
Zimram,
Jocsán,
Medán,
Madián,
Isbac niman Súa.
3 Sakin,
Jocsán okimpix itelpochuan yejuan imintoka katkaj Seba niman Dedán.
Niman iuejkakoneuan Dedán katkaj on asureos,
letuseos niman leumeos.
4 Ikoneuan Madián katkaj Efa,
Efer,
Hanoc,
Abida niman Elda.
Nochi in yejuamej katkaj iuejkakoneuan Cetura.
5 Abraham okimakak Isaac nochi on tlen kipiyaya.
6 Pero on oksekimej ikokneuan yejuan okimpix iuan itlakpasiuauan san okintlatlayokolij tlajtlamach*.
Niman ijkuak xe mikiya,
okintitlan ipan on región kampaka ikisayan tonaltsintli.
Ijkon okinxeloj itech Isaac yejuan ikoneu.
Omik Abraham niman okitokakej
7 Abraham onen 175 xipan,
8 niman omik ijkuak ye ueuentsitsin katka.
Niman inuan onosentlalito iachtojtajuan.
9 Isaac niman Ismael,
itelpochuan Abraham,
okitokakej ipan on teostokajli itoka Macpela yejuan nokaua nisiu Mamre kampaka ikisayan tonaltsintli.
On teostokajli nokaua ipan on campo yejuan iyaxka* katka Efrón on heteo,
yejuan ikoneu Zohar.
10 Yejua in tlajli Abraham okinkouilijka on heteos.
Ompa okitokakej Abraham kampa toktokya Sara on isiuau.
11 Sakin,
ijkuak Abraham omik,
Dios sanoyej okitiochiu Isaac.
Niman Isaac onokau nisiu de on atlaltekontli* yejuan itoka “Iatlaltekon Dios yejuan nemi niman yejuan nechita.”
Iuejkakoneuan Ismael
12 Nikan onkaj imintoka ikoneuan Ismael yejuan ikoneu Abraham iuan Agar.
Yejua iesclava katka Sara niman ualeuaya Egipto.
13 In yejua imintoka ken onentiajkej:
Nebaiot,
yejuan iyenkuiyou,
niman sakin*,
onenkej Quedar,
Adbeel,
Mibsam,
14 Misma,
Duma,
Massa,
15 Hadar,
Tema,
Jetur,
Nafis niman Cedema.
16 In yejua imintoka katka on majtlaktli uan ome ikoneuan Ismael.
Niman cada se tlayekanketl katka ipan sen tribu* niman sano ijki intokakatka on inueyitlalpanuan niman campamentos ken yejuamej intokakatka.
17 Ismael kipiyaya 137 xipan ijkuak omik.
Niman onosentlalito inuan iachtojtajuan.
18 Sakin,
iuejkakoneuan Ismael onochajchayajkej* nochiuiyan ipan on tlajli Havila hasta Shur nisiu itenko on tlajli Egipto ipan on ojtli yejuan yau para Asiria.
Ompa onokajkej iuejkakoneuan Ismael maski iminikniuan kualaniyaj.
Tlakatij on kouatsitsintin Jacob niman Esaú
19 Ijkin ipan onochiu Isaac,
ikoneu Abraham.
20 Isaac kipiyaya 40 xipan ijkuak ononamiktij iuan Rebeca yejuan katka ichpoch Betuel niman ikniu Labán.
In omemej,
Labán niman Betuel katkaj arameos.
21 Rebeca xueliya konepiya.
Yejua ika,
Isaac onoueyikatsajtsilij itech toTEKO ipampa yejua,
niman toTEKO okak on tlen okitlajtlanij,
niman Rebeca onokonean.
22 Pero okimpix kouatsitsimej yejuan nouijsokiyaj ijtik,
niman yejua okinojlij:
“Tla ijkin yes nonemilis,
xniuelis nikxijkos.”
Kemaj oyaj okitlajtoltito toTEKO tline ijkon ipan nochiua.
23 Niman toTEKO okinankilij:
“Omemej kokonej nemij mojtik.
Yejuamej nochiuaskej ome naciones.
Niman cada se nochiuas sen nación yejuan kimpiyas miyekej chanejkej.
In ome naciones opeu nouisokij ijkuak xe tlakatij.
Niman on yejuan piten más kojtik yes xken on yejuan yenkuiyotl.
Niman on yejuan yakatstiu esclavo yes itech ikniu yejuan más piten.”
24 Niman kemaj oajsik on tonajli para Rebeca kintlakatilis,
niman melauak okimpix kouatsitsimej.
25 On yejuan achtoj otlakat,
techijchiltik katka niman sanoyej tsojmiyoj katka ipan nochi itlalnakayo.
Niman okitokayotijkej Esaúa.
26 Kemaj otlakat on okse yejuan kuajkiktsijtiaya ikotsko iachtojikniu ika sen ima.
Yejua ika,
okitokayotijkej Jacob.
Isaac kipiyaya 60 xipan ijkuak Rebeca okintlakatilij on ikoneuan.
Esaú okinamakak iherencia de yenkuiyotl
27 Niman on kokonej onoskaltijkej.
Esaú onochiu sen tlakatl yejuan kuelitaya yau campo,
niman onochiu sen kuajli tlatemojketl.
Pero Jacob xikij nouika ken ikniu,
yej kuelitaya nokauas ichan.
28 Isaac más okitlajsojtlak Esaú pampa kuelitaya kikua yejuan kajsiya ijkuak ontlatemouaya,
pero Rebeca más okitlajsojtlak Jacob.
29 Se tonajli ijkuak Jacob okichijchiu sen tlakuajli,
niman Esaú oualeu ipan campo,
uajsiautiaya niman sanoyej apismikiya.
30 Okijlij ikniu:
—Xnechikneli.
Xnechmakatetsi achijtsin on tlakuajli chichiltik yejuan pa on tikpiya pampa sanoyej napismiki.
(Yejua ika,
Esaú no kitokayotiayaj Edom yejuan kijtosneki “chichiltik”.)
31 Niman Jacob okijlij:
—Achtoj xnechmaka moherencia de yenkuiyotl niman ma titlapatlakan pampa tejua tiyenkuiyotl.
32 Kemaj Esaú okijlij:
—Tejua tikita ika ye nimiktikaj ikan apistli.
On herencia de yenkuiyotl yejuan nikpiya,
xnechpaleuis tla nimikis.
33 Kemaj Jacob okijlij:
—Amantsin Xtestigojtlali toTEKO Dios ika moherencia noyaxka* yes.
Niman Esaú okitestigojtlalij toTEKO niman ijkon okipanoltilij Jacob on herencia de yenkuiyotl yejuan iyaxka* katka pampa yenkuiyotl.
34 Kemaj Jacob okimakak Esaú pan niman tlajkuajli de lentejas.
Ijkuak Esaú otlan tlakua niman otlaonik,
onokuiteu niman oyaj,
nion xonoyolajman maski yokompoloj iherencia de yenkuiyotl pampa xokixtlajsojtlak.