Abraham okititlan itekitlayekankau para okitejtemoto isiuau Isaac
24
Abraham ye ueuentsin katka,
niman toTEKO kitiochiuaya ikan nochi tlajtlamach*.
2 Se tonajli Abraham okinots itekitlayekankau yejuan más ueuentsin niman yejuan cuidarouiliaya nochi on tlen iyaxka,
niman okijlij:
—Xtlali moma tlatsintlan de nometskojyo,
3 para ijkon nesis ika tiktestigojtlalia toTEKO Dios yejuan okichijchiu on cielo* niman on tlaltikpaktli,
para xtiktlapejpenis sen siuatl para isiuau Isaac yejuan chanej* nikan Canaán kampa tichantij.
4 Yej tias notlalpan itech nofamilia kampa niualeua,
niman ompa tiktejtemos sen siuatl para nonamitis iuan nokoneu.
5 Niman itekitlayekankau okitlajtoltij:
—Pero ¿tlinon nikchiuas tla on siuatl xkineki uajlas nouan?
¿Tikneki ma nikuika mokoneu ipan on tlajli kampa otikis?
6 Niman Abraham okinankilij:
—¡Ka,
maka tikuikas nokoneu nepa!
7 ToTEKO Dios iluikak chanej* yejuan onechkixtij ichan notataj,
mitspaleuis.
Yejua yejuan nouan onotlajtolmakak ika kinmakas in tlajli nouejkakoneuan,
kititlanis iángel ma mitsyekana para tikuajuikas de ompa sen ichpochtli para nokoneu.
8 Niman tla on ichpokatl xkinekis uajlas mouan,
kemaj tejua tikmokixtilis on tekitl,
pero maka tikuikas nokoneu nepa.
9 Kemaj on tekitlayekanketl okitlalij ima tlatsintlan de imetskojyo Abraham,
iTEKO,
niman okitestigojtlalij Dios ika melauak kichiuas on tlen Abraham kinekiya.
10 Sakin,
okitlapejpenij miyek tlajtlamach* yejuan más kuajli yejuan iTEKO kipiyaya para tetlayokolis.
Kemaj okuikak majtlaktli camellos yejuan iyaxka* Abraham niman oyaj ipan on iueyikalpan Nacor ne Mesopotamia.
11 Ijkuak on tekitlayekanketl oajsik ikaltenko on ueyikalpan,
ye tiotlak katka.
Niman ipan on hora miyekej siuamej niman ichpokamej ualatlakuiyaj.
Kemaj okintlakuantelkets on camellos nisiu itech sen atlaltekontli*,
12 niman opeu noueyikatsajtsilia itech toTEKO.
Okijlij:
“NoTEKO Dios,
tejua akin tiiDios noteko Abraham,
xchiua para aman ma kisa kuajli notekiu nikan,
niman xkititi motetlajsojtlalis* noteko Abraham.
13 Ninokauas nikan nisiu in atlaltekontli* kampa on ichpokamej ualatlakuij.
14 Tejua xchiua para on ichpokatl yejuan nikijlis ma kitemolti itsotsokol para natlis,
ijkin ma nechnankili:
‘Xatli,
niman no nikinmatliltis mocamellos.’
Tla ijkon nochiuas,
nikmatis ika yejua tiktlapejpenia para isiuau Isaac.
Niman ijkon nikmatis ika tiktlajsojtla noteko,
Abraham.”
15 Sanken noueyikatsajtsilijtikatk ijkuak okitak sen ichpokatl kechpanojtiaya itsotsokol.
On ichpokatl katka Rebeca,
ichpoch Betuel.
Betuel ikoneu katka Milca niman Nacor yejuan ikniu Abraham.
16 Rebeca sanoyej kualtetsin katka,
ichpochtli katka yejuan xe kaman yakaj tlakatl iuan notekaya.
Niman Rebeca otemok ijtik on atlaltekontli* niman okitemiltito itsotsokol,
niman ijkuak yopanuetsiko,
17 on tekitlayekanketl onotlaloj,
okajsito,
niman okijlij:
—Xnechikneli,
xnechkauili ma nikoni achijtsin atl ipan motsotsokol.
18 Niman on ichpochtli okinankilij:
—Xatli,
notataj.
Niman okitemoltij itsotsokol niman kemaj okatlitij.
19 Ijkuak on tekitlayekanketl otlan atli,
Rebeca okijlij:
—No nikixtis atl para mocamellos hasta kuajli aixuiskej.
20 Amanaman oatekak kampa atlij yolkej.
Niman miyekpa otemoto ijtik on atlaltekontli* para okuito on atl hasta otlan kinmatlitia nochi on camellos.
21 Niman on tekitlayekanketl san tlachixtikatka niman xitlaj* kijtouaya.
San kinemiliaya tla toTEKO ye kipaleuitikatka para kinextis isiuau Isaac noso ka.
22 Niman ijkuak on camellos otlan atlij,
on tlakatl okixtij sen anillo de oro yejuan okipix chikuasen gramo ika yetik,
niman okitlalilij ipan iyak.
No ijki,
okimakak ome makoskatl de oro yejuan okipix más de cien gramos ika yetik,
23 niman okijlij:
—Xnechijli akinon motataj,
niman tla onkaj ipan ichan kampa nochanejkauan niman nejua uelis titokauaskej in yeuajli.
24 Niman yejua okinankilij:
—Nejua niichpokau Betuel,
on yejuan ikoneu Milca niman Nacor.
25 Ipan tochan onkaj kampa timokauas,
niman no onkaj miyek sakatl niman tlakuajli para mocamellos.
26 Kemaj on tekitlayekanketl onotlakuantelkets niman okimauistilij toTEKO,
27 niman okijtoj:
“Nimitsyekteneua noTEKO Dios,
tejua yejuan tiiDios noteko Abraham.
Motetlasojtlalis otikpiyalij noteko niman tejua sanoyej kuajli moyojlo.
Yejua ika,
otinechajyekan ipan ojtli hasta nikan kampa iminchan ifamilias.”
28 Kemaj Rebeca onotlaloj hasta ichan inanaj niman okijlito nochi on tlen ipan onochiu.
29 Rebeca kipiyaya sen ikniu yejuan itoka Labán.
Niman Labán onotlaloj hasta itech on atlaltekontli* para okitejtemoto on tlakatl,
30 pampa okitak on anillo,
niman on makoskatl yejuan ikniu kipiyaya ipan ima niman kaktikatka on tlen opanok.
Niman Labán okinisiuij itekitlayekankau Abraham yejuan saken nemiya iuan icamellos nisiu on atlaltekontli*.
31 Niman okijlij:
—Xuajla nochan,
tejua yejuan toTEKO mitstiochiua.
¿Tline nikan timokaua?
Yonikuektlalij nochan para tejua,
niman no onkaj kampa nokauaskej mocamellos.
32 Kemaj itekitlayekankau Abraham oyaj iuan.
Niman ompa Labán okintlatemoltilij on camellos niman okintlamakak.
Sakin,
okuajkik atl,
niman okimakak on tekitlayekanketl niman on tlakamej yejuan iuan uajlayaj para ma nokxipajpakakan.
33 Niman ijkuak okitlamakak para tlakuas,
itekitlayekankau Abraham okijtoj:
—Nejua xnitlakuas hasta nikijtos tlinon noneki nikijtos.
Niman Labán okijtoj:
—Tla ijkon,
xtechijli.
34 Kemaj on tekitlayekanketl okijtoj:
—Nejua niitekitlayekankau Abraham.
35 ToTEKO sanoyej yokitiochiu noteko Abraham niman yoricojtiak.
Yokimakak sanoyej miyek borregos,
uakaxtin,
camellos niman polokomej*.
Yokimakak miyek itekichiuilijkauan yejuan tlakamej niman siuamej,
niman no yokimakak sanoyej miyek oro niman plata.
36 No ijki,
Sara,
isiuau Abraham,
okipiyalij se ikoneu ijkuak sanoyej ye lamajtsin katka.
Niman noteko yokauilij ikoneu nochi on tlen kipiya.
37 Pero yejua onechchiualtij ma niktestigojtlali toTEKO Dios para maka niktejtemouilis se siuatl para ikoneu yejuan kisa ipan on tlajli Canaán kampa tichantij.
38 Onechijli ma niuajla nikan kampa chantij ifamilia itataj niman ma niktejtemo nemotech sen siuatl para ikoneu nonamiktis iuan.
39 Niman nejua oniktlajtoltij noteko tlinon noneki nikchiuas tla on siuatl xkineki uajlas nouan.
40 Niman yejua onechnankilij:
“Nejua ninemi ipan iojui toTEKO,
niman nikmati ika yejua kuajtitlanis iángel niman mitsyekanas para nochi kisas kuajli ipan moojui.
Niman melauak tiknextis sen siuatl para nokoneu nepa itech ifamilia notataj.
41 Pero tla saman on nofamilia xkinekiskej mitsmakaskej on ichpokatl,
ompa tlamis on tlajtojlij yejuan ika otiktestigojtlalij toTEKO Dios para tikchiuas.”
42 ’Ijkon tej,
onejkok aman itech on atlaltekontli* kampa oninoueyikatsajtsilij itech toTEKO Dios,
yejuan iTEKO noteko Abraham.
Ijkin onikijlij:
‘Nimitstlajtlanilia xchiua para nochi ma kisa kuajli ipan in noojui.
43 Aman chika ninemi nisiu itech in atlaltekontli*,
ma nochiua yejua in:
Ijkuak uajlas sen ichpochtli ualatlakuis,
niman nikijlis:
Xnechikneli,
xnechkauili ma nikoni achijtsin atl ipan motsotsokol.
44 Niman yejua ijkin nechnankilis:
Xatli,
niman no nikixtis atl para mocamellos.
Ijkon nikmatis ika yejua on ichpochtli yejuan tiktlapejpenia para ikoneu noteko.’
Ijkon onikijlij toTEKO.
45 ’Nejua xe nitlamiya ninoueyikatsajtsilia ijkuak onikitak Rebeca kechpanojtiu itsotsokol.
Niman Rebeca otemok ijtik on atlaltekontli* para okixtitoj atl,
niman onikijlij:
‘Xnechikneli,
xnechkauili ma nikoni achijtsin atl ipan motsotsokol.’
46 Niman Rebeca amanaman okitemoltij itsotsokol para ma natli,
niman onechijli:
‘Xatli,
niman no nikixtis atl para mocamellos.’
Niman nejua onatlik,
niman kemaj no okinmatliltij nocamellos.
47 Niman kemaj oniktlajtoltij:
‘¿Akinon tiichpoch tejua?’
Niman yejua onechijli ika yejua ichpoch Betuel yejuan ikoneu Nacor niman Milca.
Kemaj oniktlaliltij sen anillo ipan iyak niman ome makoskatl ipan ima.
48 Niman oninotlakuantelkets.
Kemaj onikmauistilij toTEKO,
niman onikpakateneu toTEKO,
yejuan iDios noteko Abraham,
pampa onechyekan ipan kuajli ojtli para oniknextij sen ichpochtli para ikoneu yejuan kisa itech ifamilia noteko.
49 Aman tej,
xnechijlikan tla nenkichiuaskej itlaj kuajli para noteko,
xnechijlikan tla nenkauiliaj Rebeca ma uiya nouan noso ka,
para nikmatis tlinon nikchiuas.”
50 Kemaj Labán niman Betuel okinankilijkej:
—Nochi in ualejtikaj itech toTEKO.
Yejua ika,
tejuamej xuelis tikijtoskej tla kemaj noso ka.
51 Xkita,
nikan nemi Rebeca.
Xkuika,
para isiuau ikoneu moteko ken toTEKO kineki.
52 Kemaj ijkuak itekitlayekankau Abraham okak on tlajtojli,
onotlakuantelkets niman onopachoj hasta ipan tlajli para okimauistilij toTEKO.
53 Kemaj okixtij miyek tlajtlamach* de oro,
plata,
niman miyek tlakentli*,
niman okimakak Rebeca.
No ijki,
ikniu niman inanaj okintlamajmakak.
54 Kemaj,
yejua niman on tlakamej yejuan iuan yayaj otlakuajkej niman otlaonikej*,
niman ompa onokajkej ipan on yeuajli.
Uajmostla on tekitlayekanketl okijtoj:
—Aman xnechkauili ma ninokuepa ichan noteko.
55 Pero ikniu niman inanaj Rebeca okijlijkej:
—Tiknekij touan ma nokaua kanaj majtlaktli tonajli más,
niman kemaj yas nemouan.
56 Pero on tekitlayekanketl okinmijlij:
—Maka xnechteltikan más,
pampa Dios okichiu para nochi kuajli ma kisa ipan noojui.
Yejua ika,
xtechkauilikan nimantsin ma titokuepan ichan noteko.
57 Kemaj yejuamej okinankilijkej:
—Tiknotsaskej on ichpochtli,
niman tikitaskej tlinon kijtos.
58 Kemaj,
okinotskej Rebeca,
niman okitlajtoltijkej:
—¿Tikneki tias iuan in tlakatl amantsin?
Niman Rebeca okinnankilij:
—Kemaj,
nias.
59 Kemaj,
okikauilijkej Rebeca ma uiya iuan itekitlayekankau Abraham niman yejuamej on yejuan uajlayaj iuan.
Niman on siuatl yejuan okiskaltij Rebeca no oyaj iuan.
60 Niman Rebeca ijkin okitiochijkej:
“Totlajsojkaikniu,
¡timitsnekiliaj para xkimpiya miyekej mokoneuan,
niman sanoyej ma miyekiyakan mouejkakoneuan!
¡Mouejkakoneuan nochipa ma kintlanikan intlauelikniuan!”
61 Kemaj,
Rebeca iuan isiuatekichiuilijkauan otlejkokej ipan camellos niman okinkuikak itekitlayekankau Abraham.
Niman ijkon on tekitlayekanketl okuikak Rebeca.
62 Chika ijkuak on,
ipan on tlajli Canaán,
Isaac yejuan onochantitoya Néguev,
youajnokuepatoya de on atlaltekontli* yejuan itoka “Iatlaltekon Dios yejuan nemi niman nechita”.
63 Niman se tonajli tiotlak,
Isaac okis ichan para onejnemito ne ipan campo campa ononemilito niman onoueyikatsajtsilito.
Kemaj ontlachix,
niman okitak keskimej camellos yejuan ye uajlayaj nisiu.
64 Niman Rebeca no ijki ompaka ontlachix.
Niman ijkuak okitak Isaac,
ouajtemok ipan icamello,
65 niman okijlij on tekitlayekanketl:
—¿Akin tlakatl on neka uajlau niman techajmelaua para techajnamikis?
Niman on tekitlayekanketl okinankilij:
—Yejua noteko Isaac.
Kemaj Rebeca onixtlapachoj ikan ivelo.