Sara omik niman okitokakej
23
Sara onen 127 xipan.
2 Omik ipan on ueyikalpan Quiriat-arba yejuan no itoka Hebrón.
Hebrón nokaua ipan on tlajli Canaán.
Abraham sanoyej onajman niman okichokilij Sara.
3 Kemaj onejkuanij kampa onkatka itlalnakayo Sara niman okintato on heteos niman okinmijlij:
4 —Maski nejua xnichanej nikan nemochan,
xnechnamakiltikan se pitetsin nemotlal kampa niktokas nosiuau.
5 Niman on heteos okinankilijkej:
6 —¡Tajta,
xtechkaki!
Tejuamej timitsitaj ika tiueyixtikaj tlakatl yejuan Dios okitlapejpenij.
Xtoka mosiuatsin ipan on tekajli yejuan más kuajli tikpiyaj nikan.
Xitlaj timitstlajsojtiliskej tlen tiknekis.
7 Kemaj Abraham onotelkets niman onopachoj imixpan on heteos para okintitij tetlakaitalistli,
8 niman okinmijlij:
—Tla melauak nenkitaj ika kuajli para nikan niktokas nosiuau,
nopampa xnotsakan Efrón,
ikoneu Zohar,
9 para ma nechnamakilti on teostokajli yejuan itoka Macpela yejuan onkaj itenko itlal.
Nejua niktlaxtlauilis ken kitocaroua on tlajli,
niman ijkon yes noyaxka* sen teostokajli nikan para ipan nikintokas nofamilias.
10 Niman pampa Efrón,
on heteo no ompa teuan nemiya,
sano yejua okinankilij Abraham,
pampa kinekiya ma kakikan on ichanejkauan niman nochimej on yejuan ompa panotiayaj ikalakiyan on ueyikalpan.
11 Niman ijkin okijtoj:
—¡Ka notlajsojkaikniu!
Nejua san nimitsmaka on tlajli niman on teostokajli yejuan onkaj ompa.
Nikan imixpan nochanejkauan nimitsmaka para ompa xtoka mosiuau.
12 Pero Abraham oksejpa onopachoj ikan tetlakaitalistli imixpan on tlakamej yejuan ompa nemiyaj.
13 Niman okinankijlij Efrón imixpan nochimej:
—¡Nimitstlajtlanilia xnechkaki!
Nikneki xseli in tomin de on tlajli.
Kemaj niktokas ompa nosiuau.
14 Kemaj Efrón okinankilij:
15 —Xnechkaki notlajsojkatataj.
On tlajli patioj naui kilo uan tlajko plata tomin,
pero on tomin xueyi kijtosneki amantsin para tejuamej.
Yej xeli on tlajli niman xtoka mosiuau.
16 Niman Abraham onokalaktij kitlaxtlauas on kech Efrón okijlij on tlajli imixpan on heteos.
Yejua ika,
okitemachiu on tomin niman okimakak,
niman nochimej kimatiyaj ika kuajli onochiu.
17 Niman ijkin itech onokau Abraham on tlajli iuan nochi on kojtin* yejuan onokej ompa.
On tlajli niman kojtin* onkaj itech on teostokajli Macpela yejuan nokaua kampaka ikisayan tonaltsintli de on tlajli Mamre.
18 Nochi in onochiu imixpan on heteos niman nochimej on yejuan noseuijtikatkaj itech ikalakiya on ueyikalpan.