प्रभु येशूको अधिकारको विषयमा उठेको प्रश्न
मत्ती २१:२३-२७; मर्कूस ११:२७-३३
20
अनि यस्तो भयो: ती दिनहरूमा एक दिन उहाँले मन्दिरमा मानिसहरूलाई शिक्षा दिँदै र सुसमाचार प्रचार गर्दै गर्नुहुँदा मुख्य पूजाहारीहरू र शास्त्रीहरू बूढ़ा प्रधानहरूको साथमा उहाँकहाँ आए, 2 र तिनीहरूले उहाँसँग यसो भन्दै कुरा गरे: “हामीलाई भन! कुन अधिकारले तिमी यी कुराहरू गर्दछौ? अथवा तिमीलाई यो अधिकार दिने को हो?” 3 अनि उहाँले जवाफ दिँदै तिनीहरूलाई भन्नुभयो: “म पनि तिमीहरूलाई एउटा कुरा सोध्नेछु, र मलाई जवाफ देओ; 4 यूहन्नाको बप्तिस्मा – यो स्वर्गबाटको थियो कि मानिसहरूबाटको?” 5 अनि तिनीहरूले आपसमा यसो भन्दै तर्क गरे: “स्वर्गबाटको भनौं भने, ‘तब किन तिमीहरूले उनलाई विश्वास गरेनौ?’ भनी यसले भनिहाल्नेछ; 6 तर मानिसहरूबाटको भनौं भने सबै मानिसहरूले हामीलाई ढुङ्गाले हान्नेछन्; किनभने यूहन्ना भविष्यवक्ता थिए भनी तिनीहरूलाई निश्चय भएको छ।” 7 अनि तिनीहरूले जवाफ दिए: “खै, कहाँबाटको हो, हामीलाई थाहा छैन।” 8 अनि येशूले तिनीहरूलाई भन्नुभयो: “म पनि यी कुराहरू कुन अधिकारले गर्दछु, तिमीहरूलाई भन्दिनँ।”दाखबारी लगाउने मालिकको दृष्टान्त
मत्ती २१:३३-४६; मर्कूस १२:१-९
9 तब उहाँले यो दृष्टान्त मानिसहरूलाई भन्न थाल्नुभयो: “कुनै एकजना मानिसले एउटा दाखबारी लगाए, र किसानहरूलाई त्यो ठेक्कामा दिएर धेरै समयका निम्ति तिनी टाढ़ो देशमा गए। 10 अनि फलको समयमा किसानहरूले दाखबारीको फलबाट तिनलाई केही देऊन् भनी तिनले एउटा दासलाई तिनीहरूकहाँ पठाए; तर किसानहरूले त्यसलाई पिटे, र रित्तै पठाइदिए। 11 अनि फेरि पनि तिनले अर्को दासलाई पठाए; अनि त्यसलाई पनि तिनीहरूले पिटे, र बेइज्जत गरेर रित्तै पठाइदिए। 12 अनि फेरि तिनले तेस्रोलाई पठाए; अनि त्यसलाई पनि तिनीहरूले घायल पारेर बाहिर फालिदिए। 13 तब त्यस दाखबारीका मालिकले भने: ‘म के गरूँ? म मेरो प्यारो छोरालाई पठाउनेछु; यिनलाई देखेपछि सायद तिनीहरूले यिनलाई आदर गर्नेछन्।’ 14 तर उनलाई देखेपछि ती किसानहरूले यसो भन्दै आपसमा तर्क गरे: ‘हकवाला यही हो; आओ, यसलाई मारौं, र हकको सम्पत्ति हाम्रो होस्।’ 15 तब तिनीहरूले उनलाई दाखबारीको बाहिर फालिदिए र मारे। यसकारण त्यस दाखबारीका मालिकले तिनीहरूलाई के गर्लान् त? 16 तिनी आउनेछन्, र ती किसानहरूलाई नाश गर्नेछन् र त्यो दाखबारी अरूलाई दिनेछन्।” अनि यो कुरा सुनेर तिनीहरूले भने: “यस्तो नहोस्!” 17 अनि उहाँले तिनीहरूलाई हेर्दै भन्नुभयो: “तब यो लेखिएको चाहिँ के हो? ‘जुन ढुङ्गा डकर्मीहरूले रद्द गरे, त्यही ढुङ्गा कुनाको शिर भयो।’क 18 जो कोही यस ढुङ्गामाथि खस्ला, त्यो टुक्रा-टुक्रा हुनेछ; तर जसमाथि यो ढुङ्गा खस्ला, यसले त्यसलाई धूलोपीठो पारिदिनेछ।” 19 अनि मुख्य पूजाहारीहरू र शास्त्रीहरूले त्यही घड़ी उहाँमाथि हात हाल्न खोजे, तर तिनीहरू मानिसहरूसँग डराए; किनभने यो दृष्टान्तचाहिँ उहाँले तिनीहरूको विरोधमा भन्नुभएको हो भनी तिनीहरूले थाहा गरे।
हेरोदीहरूलाई करसम्बन्धी प्रभुको जवाफ
मत्ती २२:१५-२२; मर्कूस १२:१३-१७
20 अनि तिनीहरू उहाँको चियोमा बसे, र उहाँका कुराहरू पक्रेर उहाँलाई राज्यपालका शासन र अधिकारकहाँ सुम्पिदिन तिनीहरूले धर्मी मानिसहरूको भेष धारण गर्ने जासुसहरूलाई उहाँकहाँ पठाए। 21 अनि यिनीहरूले उहाँलाई यसो भन्दै सोधे: “हे गुरु, हामी जान्दछौं, तपाईं ठीक बोल्नुहुन्छ र सठीक शिक्षा दिनुहुन्छ, अनि कसैको मुख हेरेर काम गर्नुहुन्न, तर परमेश्वरको मार्ग साँचो गरी सिकाउनुहुन्छ; 22 के सिजरलाई कर तिर्नु हामीलाई उचित छ कि छैन?” 23 तर उहाँले तिनीहरूको धूर्तता थाहा पाउनुभयो र तिनीहरूलाई भन्नुभयो: “तिमीहरू मलाई किन जाँच्दछौ? 24 मलाई एउटा दीनार देखाओ! यसमा कसका मूर्ति र छाप छन्?” तिनीहरूले जवाफ दिएर भने: “सिजरको।” 25 अनि उहाँले तिनीहरूलाई भन्नुभयो: “यसकारण सिजरका कुराहरू सिजरलाई र परमेश्वरका कुराहरू परमेश्वरलाई देओ!” 26 अनि तिनीहरूले मानिसहरूको सामु उहाँका कुराहरू पक्रन सकेनन्; अनि उहाँको जवाफ सुनेर तिनीहरू छक्कै परे र चुप रहे।
सदुकीहरूलाई बौरिउठाइसम्बन्धी प्रभुको जवाफ
मत्ती २२:२३-३३; मर्कूस १२:१८-२७
27 त्यसपछि बौरिउठाइलाई इन्कार गर्ने सदुकीहरूमध्ये कोही-कोही उहाँकहाँ आए, र उहाँलाई यसो भन्दै सोधे: 28 “हे गुरु, मोशाले हाम्रा निम्ति लेखेका छन्, ‘कुनै मानिसको दाजु मर्यो, जसकी एउटी स्वास्नी छे, र त्यो सन्तान नभईकन मर्यो भने त्यसको भाइले त्यसकी स्वास्नीलाई लैजाओस् र आफ्ना दाजुका निम्ति सन्तान पैदा गरोस्।’ख 29 अब त्यहाँ सात भाइहरू थिए; जेठाले स्वास्नी ल्याएपछि सन्तान नभईकनै मर्यो। 30 अनि माहिलोले उसलाई आफ्नी स्वास्नी बनायो, र सन्तान नभईकनै ऊ मर्यो। 31 अनि साहिँलोले उसलाई लग्यो; र यही प्रकारले सातैजनाले गरे; अनि तिनीहरू सन्तान नछोड़ीकनै मरे। 32 सबैभन्दा पछि त्यो स्त्री पनि मरी। 33 यसकारण बौरिउठाइमा ऊ तिनीहरूमध्ये कसकी स्वास्नी हुन्छे? किनकि सातैजनाले उसलाई स्वास्नी बनाएका थिए।” 34 अनि येशूले जवाफ दिँदै तिनीहरूलाई भन्नुभयो: “यस संसारका सन्तानचाहिँ विवाह गर्दछन् र विवाह गराइँदछन्। 35 तर जोचाहिँ त्यो युग र मरेकाहरूबाटको बौरिउठाइ प्राप्त गर्ने योग्यका हुन्छन्, तिनीहरू न विवाह गर्छन् न विवाह गराइन्छन्; 36 न ता तिनीहरू उसो मर्न सक्छन्; किनकि तिनीहरू त स्वर्गदूतहरू बराबर हुन्, र बौरिउठाइका सन्तान भएका हुनाले परमेश्वरका सन्तान हुन्। 37 तर मरेकाहरू बौरेर उठ्नेछन् भन्ने कुरा मोशाले पनि त्यस पोथ्राबाट देखाए, जहाँ तिनले परमप्रभुलाई* ‘अब्राहामका परमेश्वर, इसहाकका परमेश्वर र याकूबका परमेश्वर’ग भनी भनेका छन्। 38 किनकि उहाँ मरेकाहरूका परमेश्वर हुनुहुन्न, तर जिउँदाहरूका परमेश्वर हुनुहुन्छ; किनकि सबै उहाँका निम्ति जिउँछन्।” 39 तब शास्त्रीहरूमध्ये कतिले जवाफ दिँदै भने: “हे गुरु, तपाईंले सही कुरा भन्नुभयो।” 40 अनि त्यसपछि तिनीहरूले उहाँलाई कुनै प्रश्न गर्ने साहस गरेनन्।
फरिसीहरूलाई ख्रीष्टसम्बन्धी प्रभुको प्रश्न
मत्ती २२:४१-४६; मर्कूस १२:३५-३७
41 अनि उहाँले तिनीहरूलाई भन्नुभयो: “ख्रीष्ट दाऊदका पुत्र हुन् भनी तिनीहरू कसरी भन्छन्, 42 जब दाऊद आफैले भजनहरूको पुस्तकमा भन्दछन्?
‘परमप्रभुले* मेरा प्रभुलाई भन्नुभयो: 43 “जबसम्म म तिम्रा शत्रुहरूलाई तिम्रा पाउदान बनाउँदिनँ, तबसम्म तिमी मेरो दाहिने हातपट्टि बस!” ’घ
44 यसकारण दाऊदले उहाँलाई ‘प्रभु’ भन्छन् भने उहाँ कसरी उनका पुत्र हुनुहुन्छ त?” 45 तब सबै मानिसहरूले सुनिरहेको बेलामा उहाँले आफ्ना चेलाहरूलाई भन्नुभयो: 46 “शास्त्रीहरूदेखि होशियार रहो, जसले लामा वस्त्रहरू पहिरेर हिँड़्न चाह गर्छन्, र बजारहरूहुँदो अभिवादन पाउन रुचाउँछन्, अनि सभाघरहरूमा मुख्य आसनहरू र भोजहरूमा उच्च स्थानहरू मन पराउँछन्। 47 यिनीहरूले विधवाहरूका घरहरू निल्छन् र बहानाका निम्ति लामा-लामा प्रार्थना गर्छन्; यिनीहरूले झन् ठूलो दण्ड पाउनेछन्।”