श्रेष्‍ठगीत 7

उनले शूलामाइटको सुन्दरता झन् बढ़ी तारिफ गर्छन्

हे शासककी छोरी, जुत्ता लगाइएका तिम्रा पाउहरू कति सुन्दर!! तिम्रा तिघ्राहरूका गोलाइहरू गहना, अँ, निपुण कारिगरको हस्तकलाजस्तै छन्।

2 तिम्रो नाभी गोलो कचौराजस्तो छ, जसमा मिश्रित दाखमद्यको कमी छैन; तिम्रो पेट गहुँको रासजस्तो छ, जो चारैतिरबाट लिली फूलहरूले घेरिएको छ।

3 तिम्रा दुई स्तनहरू मृगीका दुई जुम्ल्याहा पाठाहरूजस्तै छन्।

4 तिम्रो गला हात्ती दाँतको धरहराजस्तो छ; तिम्रा आँखाहरू बत-रब्बीमको मूलढोकानिरको हेश्बोनका माछा-पोखरीहरूजस्ता छन्; तिम्रो नाक लेबानोनको धरहराजस्तो छ, जुनचाहिँ दमस्कसपट्टि फर्केको छ।

5 तिम्रो शरीरमाथि तिम्रो शिर कर्मेलजस्तो छ; तिम्रो शिरको केश बैजनी धागोजस्तो छ; राजा यस केशका लर्कनहरूभित्र कैदी भएका छन्।

6 हे प्रिया, सुखहरूका निम्ति तिमी कति सुन्दरी, अँ, कति मनोहर!!

7 यो तिम्रो शरीरको जिउडाल खजूरको रूखजस्तो छ, र तिम्रा स्तनहरूचाहिँ छोहोराका झुप्पाहरूजस्ता छन्।

8 मैले भनें: ‘म खजूरको रूखमा चढ़्नेछु; म त्यसका हाँगाहरू पक्रनेछु; अनि विन्‍ती छ, तिम्रा स्तनहरू दाखका झुप्पाहरूजस्तै होऊन्, र तिम्रो नाकको सुगन्धचाहिँ स्याउहरूजस्तो होस्!’

9 अनि मेरा प्रियका निम्ति तिम्रो तालु उत्तम दाखमद्यजस्तो छ, जो मीठो गरी बहन्छ, जसले सुत्‍नेहरूका ओठहरू बोल्ने तुल्याउँछ।

10 म मेरा प्रियकी हुँ; अनि मप्रति उहाँको चाहना छ।

11 हे मेरा प्रिय, आउनुहोस्! हामी बाहिर मैदानहुँदो जाऔं; हामी गाउँहरूमा वास बसौं!

12 हामी बिहानै उठेर दाखबारीहरूमा जाऔं! दाखको बोटमा कोपिला लाग्यो कि, कोमल अङ्‍गुर लाग्यो कि, दारिमका बोटहरूमा फूल लाग्यो कि हेरौं! त्यहीं म तपाईंलाई मेरो प्रेम दिनेछु।

13 दूधे-फलहरूले सुगन्ध दिइरहेका छन्, हाम्रा ढोकाहरूमाथि सबै प्रकारका मनोहर फलहरू छन्, नयाँ र पुराना, जुन फलहरू मैले, हे मेरा प्रिय, तपाईंका निम्ति साँचेर राखेकी छु।