भजनसंग्रह 114

जब इस्राएल मिस्र देशबाट, जब याकूबको घराना बिरानो भाषा बोल्ने मानिसहरूको बीचबाट निस्क्यो,

2 तब यहूदाचाहिँ पवित्रस्थान र इस्राएलचाहिँ उहाँको राज्य बने।

3 यो देखेर समुद्र भाग्यो; यर्दन पछिल्तिर फर्क्यो;

4 पहाड़हरू भेड़ाहरूझैं र साना डाँड़ाहरू पाठाहरूझैं उफ्रे।

5 हे समुद्र, तँलाई के भयो, र तँ भागिस्? हे यर्दन, तँ किन पछिल्तिर फर्किस्?

6 हे पहाड़हरूहो, तिमीहरू किन भेड़ाहरूझैं उफ्र्‍यौ? र हे साना डाँड़ाहरूहो, तिमीहरू किन पाठाहरूझैं उफ्र्‍यौ?

7 हे पृथ्वी, प्रभुको उपस्थितिमा, याकूबका परमेश्‍वरको उपस्थितिमा थरथर काम्;

8 उहाँले चट्टानलाई पानीको तलाउमा, चकमकको पत्थरलाई पानीको धारामा परिवर्तन गर्नुभयो।