भजनसंग्रह 113

तिमीहरूले याहको स्तुति गर! हे परमप्रभुका दासहरूहो, स्तुति गर! परमप्रभुको नामको स्तुति गर!

2 अहिलेदेखि लिएर सदा-सर्वदा परमप्रभुको नाम धन्यको होस्!

3 सूर्योदयदेखि लिएर सूर्यास्तसम्म परमप्रभुको नामको स्तुति गरिओस्!

4 सबै जातिहरूमाथि परमप्रभु उच्‍च हुनुहुन्छ; उहाँको महिमा आकाशभन्दा उच्‍च छ।

5 उच्‍च स्थानमा विराजमान हुनुहुने परमप्रभु हाम्रा परमेश्‍वरजस्तो को छ र?

6 उहाँ आकाश र पृथ्वीका कुराहरू निहार्नका निम्ति झुक्नुहुन्छ।

7 उहाँले गरिबलाई धूलोबाट उठाउनुहुन्छ र दरिद्रलाई घुरानबाट उचाल्नुहुन्छ,

8 उसलाई भारदारहरूको साथमा, अर्थात् आफ्नो निज प्रजाका भारदारहरूको साथमा बसाल्नका निम्ति।

9 उहाँले बाँझी स्त्रीलाई घर गर्ने र छोराछोरीहरूकी हर्षित आमा तुल्याउनुहुन्छ। तिमीहरूले याहको स्तुति गर!