भजनसंग्रह 61

प्रधान वादकका लागि; ‘नेगिना’मा; दाऊदको भजन

हे परमेश्‍वर, मेरो पुकार सुन्‍नुहोस्; मेरो प्रार्थनामा ध्यान दिनुहोस्!

2 मेरो हृदय व्याकुल हुँदा पृथ्वीको छेउदेखि म तपाईंलाई पुकार्नेछु; मलाई त्यस चट्टानमा डोर्‍याउनुहोस्, जो मभन्दा उच्‍च छ।

3 किनकि तपाईं मेरा निम्ति आश्रय, र शत्रुबाट बाँच्‍न एउटा बलियो धरहरा हुनुभएको छ।

4 सदा-सर्वदा म तपाईंको निवासस्थानमा वास गर्नेछु; म तपाईंका पखेटाहरूको आड़माथि भरोसा पर्नेछु। सेला

5 किनकि हे परमेश्‍वर, तपाईंले मेरा भाकलहरू सुन्‍नुभएको छ; तपाईंले मलाई तपाईंको नामको डर मान्‍नेहरूको अधिकारको भाग दिनुभएको छ।

6 तपाईंले राजाको आयु बढ़ाउनुहुनेछ; उनको उमेर धेरै पुस्ताझैं हुनेछ।

7 सदा-सर्वदा उनी परमेश्‍वरको सामु रहनेछन्; करुणा र सत्यता तयार गर्नुहोस्, तिनैले उनको रक्षा गरून्!

8 यसैले दिनहुँ मेरा भाकलहरू पूरा गर्न म सदा-सर्वदा तपाईंको नामको स्तुति गाउनेछु।