भजनसंग्रह 19

प्रधान वादकका लागि; दाऊदको भजन

आकाशले परमेश्‍वरको महिमाको वर्णन गर्छ; अनि आकाश-मण्डलले उहाँको हातको काम देखाउँछ।

2 दिनले दिनसित कुरा गर्छ, अनि रातले रातलाई ज्ञान प्रकट गर्छ।

3 न कुनै बोली छ, न भाषा, जहाँ तिनीहरूको आवाज सुनिँदैन।

4 तिनीहरूको ध्वनि सारा पृथ्वीभरि गुञ्‍जायमान्‌ भएको छ; अनि तिनीहरूका शब्दहरूचाहिँ संसारको कुनासम्म पुगेका छन्। तिनीहरूमा उहाँले सूर्यको लागि तम्बू खड़ा गर्नुभएको छ।

5 जो आफ्नो कोठाबाट निस्किरहेको दुलहाजस्तो छ, जो दौड़ दौड़नलाई बलवान् मानिसझैं रमाउँछ।

6 आकाशको एक छेउबाट त्यो निस्केर जान्छ, अनि यसका छेउहरूसम्म त्यसले चक्‍कर मार्छ; अनि त्यसको तापबाट केही कुरा लुकेको छैन।

7 परमप्रभुको व्यवस्था सिद्ध छ, प्राणलाई परिवर्तन गर्ने; परमप्रभुको साक्षी पक्‍का छ, बोधालाई बुद्धिमान् तुल्याउने।

8 परमप्रभुका नियमहरू सही छन्, हृदयलाई आनन्दित गराउने; परमप्रभुको आज्ञा शुद्ध छ, आँखाहरूलाई ज्योतिर्मय पार्ने।

9 परमप्रभुको भय सफा छ, सदा रहिरहने; परमप्रभुका न्याय-वचनहरू पूर्णतया सत्य र धर्ममय छन्।

10 सुनभन्दा बढ़ी, अँ, धेरै निखुर सुनभन्दा बढ़ी तिनीहरूको चाहना गरिनुपर्छ; ती महभन्दा, अँ, महको चाकाभन्दा पनि मीठा छन्।

11 साथै तीद्वारा नै तपाईंको दासले चेताउनी पाउँछ, र तिनको पालन गरेमा ठूलो इनाम छ।

12 आफ्ना भूलचूकहरू कसले बुझ्न सक्छ र? तपाईंले मलाई गुप्‍त पापहरूबाट शुद्ध पार्नुहोस्!

13 ढीठपनका पापहरूबाट तपाईंले आफ्नो दासलाई जोगाइराख्‍नुहोस्; तिनीहरूले ममाथि राज्य गर्न नपाऊन्; तब म सीधा चालको हुनेछु र ठूलो अपराधदेखि निर्दोष रहनेछु।

14 हे परमप्रभु, मेरा बल र मेरा उद्धारक! मेरो मुखका शब्दहरू र मेरो हृदयको ध्यान तपाईंको दृष्‍टिमा ग्रहणयोग्य होऊन्!