भजनसंग्रह 13

प्रधान वादकका लागि; दाऊदको भजन

हे परमप्रभु, तपाईंले मलाई कहिलेसम्म बिर्सनुहुन्छ, के सधैंभरि? कहिलेसम्म तपाईंले आफ्नो चेहरा मदेखि लुकाउनुहुन्छ?

2 दिनहुँ मेरो हृदयमा शोक बोकेर कहिलेसम्म म मेरो मनको सल्‍लाह लिइरहूँ? कहिलेसम्म मेरो शत्रु मभन्दा माथि भइरहन्छ?

3 मप्रति ध्यान दिनुहोस्, हे परमप्रभु मेरा परमेश्‍वर; मेरो विन्‍ती सुन्‍नुहोस्; मेरा आँखाहरू उज्जवल पार्नुहोस्, नत्र ता म मृत्युको निद्रामा पर्नेछु;

4 नत्र ता मेरो शत्रुले भन्‍नेछ: “मैले त्यसलाई जितेको छु;” अनि म डगमगाउँदा मलाई दुःख दिनेहरू रमाउनेछन्।

5 तर मैले तपाईंको दयामाथि भरोसा राखेको छु; तपाईंको उद्धारमा मेरो हृदय रमाउनेछ।

6 म परमप्रभुका निम्ति गाउनेछु; किनकि उहाँले मलाई प्रशस्त गरी दिनुभएको छ।