अय्यूब 11

सोपरको पहिलो जवाफ: हे अय्यूब, फर्क, आफ्नो जीवन सुधार!

तब नामाती सोपरले जवाफ दिएर भने: 2 “के शब्दहरूको यस थुप्रोलाई जवाफ दिइनुपर्दैन र? अनि के बकबके मानिस धर्मी ठहरिएला? 3 के तिम्रा झूटा कुराहरूले मानिसहरूलाई चुप गराउँछन् र? अनि जब तिमी खिसी गर्छौ, तब के कसैले तिमीलाई लज्जित नपारोस्? 4 किनकि तिमीले भनेका छौ: ‘मेरो शिक्षा चोखो छ, र तपाईंका आँखाहरूमा म शुद्ध छु।’ 5 तर परमेश्‍वर बोल्नु नि! र आफ्ना ओठहरू तिम्रो विरोधमा खोल्नु नि! 6 अनि उहाँले तिमीलाई बुद्धिका रहस्यहरू देखाउनुहुनेथियो, जो भइराखेकोभन्दा दोबर छन्! यसकारण जानिराख, तिम्रो अधर्मले पाउनुपर्नेभन्दा कम परमेश्‍वरले तिमीबाट लिनुहुन्छ।

7 के तिमीले खोजतलाश गरेर परमेश्‍वरलाई पत्ता लगाउन सक्छौ? के तिमीले सर्वशक्तिमान्‌लाई पूर्ण रूपले भेट्टाउन सक्छौ? 8 यो त स्वर्गजतिकै उच्‍च छ; तिमीले के गर्न सक्छौ र? यो त अधोलोकभन्दा गहिरो छ; तिमीले के पो जान्‍न सक्छौ र? 9 यसको नाप पृथ्वीभन्दा लामो छ र समुद्रभन्दा चौड़ा छ। 10 उहाँले काट्नुभयो भने, थुन्‍नुभयो भने, वा भेला पार्नुभयो भने कसले उहाँलाई रोक्न सक्छ र? 11 किनकि उहाँले व्यर्थका मानिसहरूलाई चिन्‍नुहुन्छ; अनि उहाँले दुष्‍टता देख्‍नुहुन्छ; तब के उहाँले यो विचार गर्नुहुनेछैन र? 12 किनकि मानिस जङ्गली गधाको बछेड़ाजस्तो जन्मे तापनि खोक्रो मानिस बुद्धिमान् हुन चाहन्छ?

13 तिमीले आफ्नो हृदय तयार पार्छौ र आफ्ना हातहरू उहाँतिर फैलाउँछौ भने, 14 तिम्रो हातमा अधर्म छ भने त्यसलाई टाढ़ा हटाऊ, र तिम्रा वासस्थानहरूमा कुनै दुष्‍टतालाई वास गर्न नदेऊ! 15 तब निश्‍चय तिमीले विनाकलङ्क आफ्नो चेहरा उठाउनेछौ; अँ, तिमी स्थिर हुनेछौ, र डराउनेछैनौ; 16 किनभने तिमीले आफ्नो दुःख भुल्नेछौ, र बगेर गएको पानीजस्तो त्यसको सम्झना गर्नेछौ; 17 अनि तिम्रो जीवन मध्यदिनभन्दा पनि उज्यालो हुनेछ; तिमी चम्कनेछौ, तिमी बिहानझैं हुनेछौ। 18 अनि तिम्रो आशा भएको हुनाले तिमी ढुक्‍कै हुनेछौ; अँ, तिमीले आफ्नो चारैतिर चियाउनेछौ, र सुरक्षासाथ लेट्नेछौ। 19 अनि तिमी लेट्नेछौ, र कसैले तिमीलाई भयभीत पार्नेछैन; अँ, धेरैजनाले तिम्रो निगाह पाउनलाई विन्‍ती चढ़ाउनेछन्। 20 तर दुष्‍टहरूका आँखाहरू धमिला हुनेछन्; अनि तिनीहरू उम्कनेछैनन्, र तिनीहरूको आशा त प्राण गएको जस्तै हुनेछ।”